លោក ចូ បៃដិន ប្រកាសអំពីទស្សនវិស័យថ្មី ដើម្បីដោះស្រាយបញ្ហាអន្តោប្រវេសន៍ នៅទ្វីបអាមេរិក
ថ្ងៃពុធទី ៨មិថុនា ជំនួបកំពូលអាមេរិកលើកទី៩ បានចាប់ផ្តើមបើកទ្វារ នៅទីក្រុង Los Angeles ។ លោកប្រធានាធិបតី ចូ បៃដិន បានទទួលស្វាគមន៍ ថ្នាក់ដឹកនាំទាំងអស់ នៃបណ្តាប្រទេសទ្វីបអាមេរិក ដែលសហរដ្ឋអាមេរិក បានអញ្ជើញឲ្យចូលរួម។ ដោយឡែក នីហ្ការ៉ាហ្កាយ គុយបា និង វ៉េណេស៊ុយអេឡា មិនត្រូវបានសហរដ្ឋអាមេរិក អញ្ជើញឲ្យចូលរួមក្នុងវេទិការកំពូលនេះទេ ដោយសារតែប្រទេសទាំងនេះ គ្មានលទ្ធិប្រជាធិបតេយ្យ។ ការលើកកំពស់លទ្ធិប្រជាធិបតេយ្យនៅក្នុងតំបន់អាមេរិក គឺជាកម្មវត្ថុចំបង នៃរដ្ឋាភិបាល របស់លោកចូ បៃដិន។ បន្ថែមពីនេះ ការដោះស្រាយបញ្ហាអន្តោប្រវេសន៍ ក៏ជាអាទិភាពធំផងដែរ ខណៈសហរដ្ឋអាមេរិក ប្រឈមកាន់តែខ្លាំងឡើងៗ នឹងរលកអន្តោប្រវេសន៍មកពីបណ្តាប្រទេសអាមេរិកខាងត្បូង។
ចុះផ្សាយនៅថ្ងៃ៖
សម្រង់ប្រសាសន៍ លោក ចូ បៃដិន ថ្លែងបើកជំនួបកំពូល "Summit of The Americas"
"បំណងរបស់យើង គឺដើម្បីឆ្លើយតប ទៅនឹងសេចក្តីរំពឹងចង់បានរបស់មនុស្សគ្រប់គ្នា។ ជាការចង់បានដ៏សាមញ្ញ នោះគឺ កិត្តិយសថ្លៃថ្នូរ និងសេចក្តីសុខសុវត្ថិភាព។ នៅពេលណា យើងមិនអាចបំពេញតម្រូវការចាំបាច់ដ៏សាមញ្ញទាំងនេះបាន នោះមនុស្សនឹងងាកទៅរកវា ពីអ្នកផ្សេង នៅទីកន្លែងផ្សេងទៀត។
ដូច្នេះ នៅថ្ងៃសុក្រនេះ យើងនឹងប្រមូលផ្តុំ ជួបជុំគ្នា ដើម្បីចាប់ផ្តើមប្រកាសរួមគ្នានៅ Los Angeles។ យើងនឹងប្រកាសនូវទស្សនវិស័យថ្មីមួយ ដើម្បីគ្រប់គ្រង ដោះស្រាយបញ្ហាអន្តោប្រវេសន៍ ហើយបែងចែកការទទួលខុសត្រូវទៅវិញទៅមក នៅទូទាំងតំបន់ភាគខាងជើង។
ការប្រកាសនេះ គឺជាការចូលរួមសន្យាទាំងអស់គ្នា ក្នុងការចំណាយប្រាក់វិនិយោគ ទៅលើដំណោះស្រាយផ្សេងៗនៅក្នុងតំបន់ ដើម្បីកែលំអស្ថិរភាព ផ្តល់ឱកាសឲ្យកាន់តែប្រសើរ ដល់ការធ្វើចំណាកស្រុកដែលមានសុវត្ថិភាព មានការរៀបចំត្រឹមត្រូវ។ យើងត្រូវតែប្រយុទ្ធប្រឆាំង ចំពោះក្រុមឈ្មួញទុច្ចរិត មេខ្យល់ដឹកជញ្ជូនមនុស្សដោយខុសច្បាប់ ដែលកេងប្រវញ្ច ពីលើទុក្ខលំបាករបស់អ្នកងាយរងគ្រោះ។ អន្តោប្រវេសន៍ស្របច្បាប់ ដែលមានសុវត្ថិភាព មានការរៀបចំត្រឹមត្រូវ គឺវាអាចហុចគុណប្រយោជន៍ ដល់សេដ្ឋកិច្ចទាំងអស់គ្នា រាប់ទាំងសហរដ្ឋអាមេរិកផង។ ពោលគឺវាអាចចូលរួមចំណែក ដល់ការចម្រុងចម្រើន ជារៀងដរាប។"
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ