ប្រឈមនឹងអតិផរណាកាន់តែខ្លាំង ធនាគារកណ្តាលអាមេរិកដំឡើងអត្រាការប្រាក់នាំមុខ
អត្រាអតិផរណានៅសហរដ្ឋអាមេរិក បានកើនឡើងខ្ពស់បំផុតមិនធ្លាប់មាន បើគិតក្នុងរវាង៤០ឆ្នាំចុងក្រោយនេះ។ តួលេខចុងខែឧសភាកន្លងទៅ បង្ហាញថាអតិផរណាមានកម្រិតកើនឡើង ដល់ទៅ៨,៦% ក្នុងរយៈពេលមួយឆ្នាំចុងក្រោយ។ ប្រឈមនឹងបញ្ហានេះ កាលពីថ្ងៃពុធ ទី១៥មិថុនា ធនាគារកណ្តាលអាមេរិក បានសម្រេចដំឡើងអត្រាការប្រាក់នាំមុខ ក្នុងកម្រិតខ្ពស់បំផុតដែរ បើគិតចាប់ពីឆ្នាំ១៩៩៤មក។
ចុះផ្សាយនៅថ្ងៃ៖
ស្តាប់ - ០២:៣៥
ធនាគារកណ្តាលសហរដ្ឋអាមេរិក បានសម្រេចដំឡើងអត្រាការប្រាក់នាំមុខ ដល់ទៅ ០,៧៥ ពិន្ទុ។ នៅចំពោះមុខអ្នកកាសែត លោក Jerome Powell អគ្គទេសាភិបាលធនាគារកណ្តាលអាមេរិក បានទទួលស្គាល់ថាការដំឡើងលើកនេះ គឺមានកម្រិតធំណាស់ មិនធ្លាប់មានទេ គិតចាប់ពីឆ្នាំ១៩៩៤មក។ ចាប់ពីពេលនេះទៅ អត្រាការប្រាក់នាំមុខ មានកម្រិតចន្លោះពី ១,៥០ ទៅ ១,៧៥% ទៅតាមប្រភេទកម្ចី។
បន្ថែមពីនេះ លោក Jerome Powell បានអះអាងថា នៅក្នុងកិច្ចប្រជុំរវាងចុងខែកក្កដា គឺធនាគាកណ្តាល អាចនឹងសម្រេចដំឡើងអត្រាការប្រាក់នាំមុខនេះបន្ថែមទៀត។ កម្មវត្ថុរបស់ធនាគារកណ្តាល គឺធ្វើយ៉ាងណា ទាញទំលាក់អត្រាអតិផរណា ឲ្យធ្លាក់មកនៅត្រឹម២%វិញឲ្យបាន។
គួរកត់សំគាល់ថា នេះគឺជាលើកទី៣ បើគិតពីដើមឆ្នាំមក ដែលធនាគារកណ្តាលអាមេរិក បានដំឡើងអត្រាការប្រាក់នាំមុខ។ អត្រាអតិផរណានៅអាមេរិក បានឡើងស្រឺតស្រឺត រហូតដល់ ៨,៦% កាលពីចុងខែឧសភាកន្លងទៅ ដែលនេះគឺជាកម្រិតអតិផរណាខ្ពស់បំផុត ក្នុងរវាង៤០ឆ្នាំចុងក្រោយនេះ។ មន្ត្រីធនាគារកណ្តាលអាមេរិកខ្លះ បានលើកឡើងថា គេរំពឹងថា នៅចុងឆ្នាំ២០២២នេះ អត្រាអតិផរណា អាចនឹងធ្លាក់មកត្រឹម ៥,២%។ យោងតាមការព្យាករណ៍របស់ធនាគារកណ្តាលអាមេរិក ឆ្នាំ២០២២នេះ អាមេរិកអាចមានកំណើនសេដ្ឋកិច្ចត្រឹមតែ ១,៧% ខណៈអត្រាអ្នកអត់ការងារធ្វើ អាចកើនឡើងបន្តិច ប្រមាណជា៣,៧%។
ធនាគារកណ្តាលអាមេរិក បានលើកឡើងថា អត្រាអតិផរណាកើនខ្ពស់បច្ចុប្បន្ននេះ បានឆ្លុះបង្ហាញនូវ ភាពមិនសមមាត្រ រវាងការផ្តល់ឲ្យ និងតម្រូវការ ដែលវាស្ថិតក្នុងបរិបទនៃវិបត្តិ បង្កឡើងជំងឺឆ្លងកូវីដ១៩ ព្រមទាំងការឡើងថ្លៃប្រេងឥន្ធនៈ ព្រមទាំងតម្លៃទំនិញទូទៅ។ ស្ថាប័ននេះ បានបន្ថែមថា សង្គ្រាមឈ្លានពានដែលរុស្ស៊ីកំពុងធ្វើនៅអ៊ុយក្រែន បានធ្វើឲ្យកើនអតិផរណា និងមកបន្ថែមទំងន់បន្ទុកលើសេដ្ឋកិច្ចពិភពលោក ហើយវិធានការបិទខ្ទប់បង្កាកូវីដនៅចិន ប៉ុន្មានខែមកនេះ ក៏បានធ្វើឲ្យរាំងស្ទះដល់បណ្តាញផ្គត់ផ្គង់ទំនិញពិភពលោកដែរ។
គួរបញ្ជាក់ថា មានការព្រួយបារម្ភផងដែរ ថាសេដ្ឋកិច្ចអាមេរិក អាចនឹងដើរឈានចូលក្នុងវិបត្តិ ប្រសិនបើធនាគារកណ្តាលអាមេរិក ដំឡើងអត្រាការប្រាក់នាំមុខខ្ពស់ជ្រុលពេក។ ការប្រាក់ខ្ពស់ នឹងធ្វើឲ្យស្ថាប័នហិរញ្ញវត្ថុ កាត់បន្ថយការផ្តល់កំចី ធ្វើឲ្យគម្រោងវិនិយោគ បោះទុន និងការចំណាយនានា ត្រូវរាំងស្ទះ។ លោក Gregory Daco អ្នកជំនាញសេដ្ឋកិច្ច នៅ EY-Pathernon បានលើកឡើងថា សេដ្ឋកិច្ចអាមេរិកកំពុងតែដើរ ឈានចូលទៅក្នុងវិបត្តិសេដ្ឋកិច្ច កម្រិតស្រាល នៅរវាងចុងឆ្នាំ២០២២ និងដើម ២០២៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ