តើចិនមិនមែនជាដង្កូវដែលកំពុងចូលរុករានឲ្យមានការបែកបាក់នៅផ្ទៃក្នុង Mercosur ទេឬ?
នៅថ្ងៃព្រហស្បតិ៍ ទី២១ កក្កដា ថ្នាក់ដឹកនាំនៃក្រុមប្រទេសស្ថិតក្នុងសហគមន៍សេដ្ឋកិច្ចប៉ែកខាងត្បូងហៅកាត់ Mercosur បើកកិច្ចប្រជុំក្នុងប្រទេសប៉ារ៉ាហ្កាយ។ Mercosur ដែលបានចាប់កំណើតក្នុងខែមីនា ឆ្នាំ ១៩៩១ មានសមាជិកចំនួន ៤ប្រទេស គឺអាហ្សង់ទីន ប្រេស៊ីល ប៉ារ៉ាហ្កាយ និងប្រទេសអ៊ុយរូហ្កាយ។ ប្រធានបទនៃកិច្ចប្រជុំ គឺសេចក្តីព្រាងកិច្ចព្រមព្រៀងដោះដូរសេរីដ៏ចម្រូងចម្រាសរវាងប្រទេសចិន និងប្រទេសអ៊ុយរូហ្កាយ។
ចុះផ្សាយនៅថ្ងៃ៖
ស្តាប់ - ០២:២៧
អាហ្សង់ទីនជាប្រទេសដែលបានចេញមុខប្រឆាំងនឹងសេចក្តីព្រាងនៃកិច្ចព្រមព្រៀងដោះដូរសេរីដែលប្រទេសអ៊ុយរូហ្កាយចង់ចុះហត្ថលេខាជាមួយប្រទេសចិន។ នេះមិនមែនជាលើកទី១ ទេដែលសំណុំរឿងមួយនេះបានចូលបំពុលនៅក្នុងកិច្ចប្រជុំនៃក្រុមប្រទេសស្ថិតក្នុងសហគមន៍សេដ្ឋកិច្ចប៉ែកខាងត្បូងហៅកាត់ Mercosur។ ក្នុងឆ្នាំ ២០២១ ប្រធានាធិបតីអ៊ុយរូហ្កាយលោកល្វី ឡាកាយេ ប៉ូបានព្រមានថា Mercosur ត្រូវបើកទ្វារទៅកាន់ពិភពលោក។ ការលើកឡើងរបស់លោកល្វី ឡាកាយេ ប៉ូកាលណោះបានធ្វើឲ្យប្រធានាធិបតីអាហ្សង់ទីនលោកអាល់ប៊ែរតូ ហ៊្វែរណង់ដេក្តៅស្លឹកត្រចៀក និងឆ្លើយបកវិញថា អ៊ុយរូហ្កាយមានសិទ្ធិចេញពី Mercosur បើអ៊ុយរូហ្កាយចង់ចេញ។
ទោះជាមានការប្រឆាំងដាច់អហង្ការពីអាហ្សង់ទីនក៏ដោយក៏លោកល្វី ឡាកាយេ ប៉ូបានអះអាងក្នុងសប្តាហ៍កន្លងទៅថា អ៊ុយរូហ្កាយនឹងផ្តើមកិច្ចចរចាជាផ្លូវការជាមួយប្រទេសចិន និងបញ្ជាក់ជាថ្មីពីការបន្តស្ថិតក្នុង Mercosur ដោយបានអំពាវនាវឲ្យប្រទេសសមាជិកផ្សេងចូលរួមជាមួយខ្លួន។ តែលោកល្វី ឡាកាយេ ប៉ូមិនភ្លេចព្រមានថា បើគ្មានប្រទេសសមាជិកណាចូលរួមទេ អ៊ុយរូហ្កាយត្រៀមខ្លួនដើម្បីធ្វើម្នាក់ឯង។ គួរបញ្ជាក់ថា ចិនដែលជាដៃគូពាណិជ្ជកម្មទី១ របស់អ៊ុយរូហ្កាយបានមើលឃើញថា កិច្ចព្រមព្រៀងដោះដូរសេរីជាមួយប្រទេសតូចនៅអាមេរិកឡាទីនដែលមានពលរដ្ឋតែ ៣លាន ៥សែននាក់មួយនេះនឹងអនុញ្ញាតឲ្យខ្លួនបោះជំហានចូលក្នុងទីផ្សារ Mercosur ដែលមានពលរដ្ឋសរុប ២៦៥លាននាក់។
គឺទីផ្សារប្រទេសប្រេស៊ីល និងអាហ្សង់ទីនដែលចិនកំពុងសំឡឹងមិនដាក់ភ្នែក។ ដើម្បីខ្ទប់លំហូរផលិតផលចិនចូលទីផ្សារ Mercosur ដោយរួចពន្ធ ប្រេស៊ីល អាហ្សង់ទីន និងប៉ារ៉ាហ្កាយអាចបង្ខំចិត្តដាក់អ៊ុយរូហ្កាយឲ្យនៅឯកោ ឬបណ្តេញចេញពីទីផ្សារ Mercosur តែម្តង។ ចុះតើអាចមានការដកអ៊ុយរូហ្កាយចេញពីសមាជិក Mercosur ដែរ ឬទេ។ នៅមិនទាន់អាចឆ្លើយយ៉ាងម៉េចបានទេ ព្រោះទី១ អ៊ុយរូហ្កាយកំពុងត្រៀមខ្លួនធ្វើជាប្រធានប្តូរវេន Mercosur និងទី២ ប្រេស៊ីលដែលមិនសូវចេញមុខប្រឆាំងខ្លាំងក្លាដូចអាហ្សង់ទីនអាចគាំទ្រគំនិតផ្តួចផ្តើមរបស់អ៊ុយរូហ្កាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ