អ្នកនិពន្ធ សាលមាន់ រុសឌី ដែលរិះគន់ថ្នាក់ដឹកនាំអ៊ីរ៉ង់ ត្រូវខ្មាន់កាំបិត ចាក់របួសធ្ងន់
នៅសហរដ្ឋអាមេរិក ថ្ងៃទី១៣សីហា អ្នកនិពន្ធ សាលមាន់ រុសឌី ដែលល្បីខាងរិះគន់ថ្នាក់ដឹកនាំអ៊ីរ៉ង់ ត្រូវបុរសខ្មាន់កាំបិតម្នាក់ ចាក់យ៉ាងកំរោលបណ្តាលឲ្យរងរបួសធ្ងន់ នៅពេលដែលអ្នកនិពន្ធរូបនេះ ចូលរួមកិច្ចពិភាក្សា នៅមណ្ឌលវប្បធម៌មួយកន្លែង នៅក្នុង រដ្ឋញូវយ៉ក។ ជនរងគ្រោះត្រូវដឹកតាមឧទ្ធម្ភាគចក្រ ទៅវះកាត់សង្គ្រោះបន្ទាន់នៅមន្ទីរពេទ្យដែលជិតបំផុត និងត្រូវបំពាក់បំពងដកដង្ហើមដោយអុកស៊ីសែន ហើយបើតាមប្រភពពីអ្នកស្និទនឹងជនរងគ្រោះ, គឺលោក សាលមាន់ រុសឌី ទំនងជាអាចខ្វាក់ភ្នែកម្ខាងហើយ។ ចំណែក ខ្មាន់កាំបិត គឺត្រូវចាប់ឃាត់ខ្លួនបាន ភ្លាមៗ។
ចុះផ្សាយនៅថ្ងៃ៖
ស្តាប់ - ០២:២១
អាយុ៧៥ឆ្នាំ អ្នកនិពន្ធ សាលមាន់ រុសឌី ជាជនជាតិអង់គ្លេស ដើមកំណើតឥណ្ឌា។ លោកប្រសូត្រនៅទីក្រុង Bambay ក្នុងត្រកូលគ្រួសារអភិជន បញ្ញវន្ត និង កាន់សាសនាអ៊ីស្លាម។ លោកបាននិពន្ធសៀវភៅជាច្រើន នៅក្នុងនោះ មានវណ្ណកម្មមួយដែលលេចធ្លោខ្លាំង «Versets sataniques» បោះពុម្ពផ្សាយនៅឆ្នាំ១៩៨៨ ដែលសរសេរផ្អែកតាមព្រឹត្តិការណ៍ប្រវត្តិសាស្ត្រអ៊ីរ៉ង់ និងរិះគន់ថ្នាក់ដឹកនាំអ៊ីរ៉ង់ ព្រមទាំងថ្កោលទោសសាសនាអ៊ីស្លាមដែលជ្រុលនិយម។ មួយឆ្នាំក្រោយពីបោះពុម្ពផ្សាយសៀវភៅនេះ អ្នកនិពន្ធ សាលមាន់ រុសឌី ក៏ត្រូវថ្នាក់ដឹកនាំអ៊ីរ៉ង់ អាលី ខាំមេនីយ ប្រកាសជាសាធារណៈកាត់ទោសប្រហារជីវិត។
ជាង៣០ឆ្នាំក្រោយមក នៅថ្ងៃកើតហេតុនេះ កាសែតរដ្ឋប្រចាំថ្ងៃអ៊ីរ៉ង់ ហើយចៅហ្វាយសារព័ត៌មាននេះ ត្រូវតែងតាំងដោយ ថ្នាក់ដឹកនាំអ៊ីរ៉ង់អាលី ខាំមេនីយ បានកោតសរសើរខ្មាន់កាំបិត ថា«បុរសនេះ ក្លាហាន និងមានស្មារតីភ្ញាក់រលឹក ហើយវាយប្រហារលើ ជនក្បត់សាសនា សាលមាន់ រុសឌី។»។ ទន្ទឹមនឹងគ្នានេះ ថ្នាក់ដឹកនាំអ៊ីរ៉ង់ដែលទទួលបន្ទុកចរចាសំណុំរឿងនុយក្លេអែរ លោក Mohammad Marandi ក៏បន្ថែមដែរថា លោកមិនស្រក់ទឹកភ្នែកទេ ចំពោះអ្នកនិពន្ធដែលរិះគន់ដោយភាពស្អប់ខ្ពើមនិងមាក់ងាយចំពោះប្រជាជននិងសាសនាអ៊ីស្លាម។
ចំពោះហេតុការណ៍ចាក់នឹងកាំបិត ទៅលើអ្នកនិពន្ធដ៏ល្បីល្បាញរូបនេះ គឺត្រូវរិះគន់ថ្កោលទោស យ៉ាងខ្លាំង ពីប្រទេសលោកសេរី។ នាយករដ្ឋមន្ត្រីអង់គ្លេស បូរីស ចនសុន មានប្រសាសន៍ថា ការវាយប្រហារចាក់នឹងកាំបិតទៅលើអ្នកនិពន្ធ សាលមាន់ រុសឌី គឺធ្វើឡើងពេលដែលលោកកំពុងតែបំពេញសិទ្ធបញ្ចេញមតិរបស់គាត់ និងជាសិទ្ធិសេរីភាពដែលយើងតែងតែការពារ។
ប្រធានាធិបតីបារាំង អេម៉ានុយអែល ម៉ាក្រុង លើកឡើងថា ការប្រយុទ្ធតស៊ូមតិរបស់ អ្នកនិពន្ធ សាលមាន់ រុសឌី ដើម្បីសេរីភាពបញ្ចេញមតិ គឺជាការតស៊ូរបស់យើងទាំងអស់គ្នា។
ចំណែក អ្នកនាំពាក្យរដ្ឋបាលប្រធានាធិបតីអាមេរិក ចូ បៃឌិន បានរិះគន់ថ្កោលទោសអំពើឃោរឃៅរបស់ខ្មាន់កាំបិត និងជូនពរដោយសង្ឃឹមថាលោកនឹងជាសះស្បើយឡើងវិញ។ ជាមួយគ្នានេះ អគ្គលេខាធិការអង្គការសហប្រជាជាតិ អង់តូនីញ៉ូ ហ្គូតែរ តាមរយៈអ្នកនាំពាក្យ គឺបានថ្លែងរិះគន់អំពើហិង្សានេះ និងបញ្ជាក់ថា គេមិនត្រូវឆ្លើយតបបែបហិង្សាយ៉ាងនេះ ចំពោះមនុស្សគ្រាន់តែបញ្ចេញសម្តីនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ