សហរដ្ឋអាមេរិក ៖ លោក បៃដិន ប្រកាសលុបចោល មួយផ្នែក បំណុលរបស់និស្សិត
ជាពាក្យសន្យា ជាការទន្ទឹងរង់ចាំ និងជាការទាមទារ តាំងពីយូរមកហើយ តែទើបនៅថ្ងៃទី ២៤សីហា២០២២នេះប៉ុណ្ណោះ ដែលលោកប្រធានាធិបតីអាមេរិក ចូ បៃដិន បានប្រកាសលុបចោលមួយភាគ បំណុលរបស់និស្សិត។ ក្រុមនិស្សិតជាប់បំណុល បានសម្តែងអំណរ តែសេចក្តីប្រកាសធ្វើឡើងនៅមុនការបោះឆ្នោតពាក់កណ្តាលអាណត្តិ ក៏ជាសារដែលមានបង្កប់អត្ថន័យនយោបាយដែរ។
ចុះផ្សាយនៅថ្ងៃ៖
ស្តាប់ - ០២:១០
លោក ចូ បៃដិនបានសន្យាដោះស្រាយបញ្ហាបំណុលនិស្សិត តាំងពីចេញឃោសនាបោះឆ្នោតប្រធានាធិបតីឆ្នាំ២០២០មកម្ល៉េះ។ ជាប់ឆ្នោតហើយ អ្នកពាក់ព័ន្ធត្រូវបន្តរង់ចាំទាំងអារម្មណ៍ខកចិត្តម្តងម្កាលផង។ ពីរឆ្នាំក្រោយ ពោលគឺនៅពេលសហរដ្ឋអាមេរិកត្រៀមបើកការឃោសនាបោះឆ្នោតមួយទៀត ទើបលោកប្រធានាធិបតី ប្រកាស លុបបំណុលរបស់និស្សិត មួយផ្នែក ដូចបានសន្យា។
អំណើះតទៅ និស្សិតអាចលុបបំណុលរបស់ខ្លួន ចំនួន ១ម៉ឺនដុល្លារក្នុងមួយឆ្នាំ ពេលចេញធ្វើការមានប្រាក់ចំណូលតិចជាង១២៥០០០ក្នុងមួយឆ្នាំ និង១ម៉ឺនដុល្លារបន្ថែម សម្រាប់និស្សិតទទួលអាហារូបករណ៍។ នេះជាវិធានការសម្រាប់អ្នកមានជីវភាពទាប និង ដែលបានទៅខ្ចីប្រាក់រដ្ឋ មិនមែនសម្រាប់អ្នកដែលទៅខ្ចីប្រាក់តាមធនាគារឯកជនដើម្បីសិក្សាទេ។
លោក ចូបៃដិន បានឆ្លៀតពន្យល់ថា នេះជាវិធានការដ៏ស្តួចស្តើងណាស់សម្រាប់អ្នកខ្លះ តែច្រើនជ្រុលសម្រាប់មួយក្រុមផ្សេង។ ក្រុមអ្នកសាធារណរដ្ឋបានរួមគ្នាបិរហារថាការលុបបំណុលនិស្សិតជាទង្វើបម្រើប្រយោជន៍នយោបាយ ហើយបង្កឱ្យមានអតិផរណា។ តែលោកបៃដិន បានឆ្លើយតបដោយច្បាស់ៗថា ដើម្បីជួយពលរដ្ឋអាមេរិកក្រីក្រ ថ្នាក់កម្មករ និងថ្នាក់មធ្យម លោក មិនសុំទោសជាដាច់ខាត និងជាពិសេសនៅចំពោះមុខក្រុមដែលបានបោះឆ្នោតបញ្ចុះពន្ធ ២ពាន់លានដុល្លារ ដើម្បីការពារតែប្រយោជន៍របស់ពលរដ្ឋអាមេរិកអ្នកមានខ្លាំង និងក្រុមហ៊ុនធំៗ ដែលពន្យឺត និងមិនជួយជំរុញកំណើនសេដ្ឋកិច្ច តែបានបំប៉ោងឱនភាពជាតិឱ្យកាន់តែធំ។ លោក បៃដិន បានរំលើកអំពីជោគជ័យថ្មីៗ ក្នុងការបន្ថយឱនភាពសាធារណៈ និងពិសេសគឺរដ្ឋាភិបាលលោកបានសម្រេចដូចសន្យា បើទោះបីមានការលំបាកយ៉ាងណាក៏ដោយ។
សូមបញ្ជាក់ថា ការសិក្សាថ្នាក់មហាវិទ្យាល័យនៅសហរដ្ឋអាមេរិក អាចមានតម្លៃពី១ម៉ឺន ទៅ៧ម៉ឺនក្នុងមួយឆ្នាំៗ។ ជាញឹកញយនិស្សិតអាមេរិកបានបញ្ចប់ការសិក្សា មានសញ្ញាប័ត្រខ្ពស់ តែក៏មានបំណុលជាប់ខ្លួនដ៏ធ្ងន់ធ្ងរ ដែលត្រូវបង់សងរំលោះវិញនៅពេលចេញធ្វើការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ