ខ្យល់ព្យុះអ៊ូរ៉ាហ្កង់ Ian បោកសង្គ្រប់លើរដ្ឋផ្លរីដា បង្កជាទឹកជំនន់ដ៏ធ្ងន់ធ្ងរ
រដ្ឋផ្លរីដា ភាគអាគ្នេយ៍សហរដ្ឋអាមេរិក កំពុងតែរងគ្រោះដោយហន្តរាយធម្មជាតិ ក្រោមកម្លាំងខ្យល់ព្យុះអ៊ូរ៉ាហ្កង់ អ៊ីយ៉ាន (Ian) ។ ខ្យល់ព្យុះដ៏ខ្លាំងក្លានេះ បានបង្កឲ្យមានទឹកជំនន់ជន់លិច និងបានផ្តាច់ចរន្តអគ្គិសនី ផ្ទះសំបែងជាច្រើនលានខ្នង ចាប់ពីរសៀលថ្ងៃពុធទី២៨កញ្ញា ។
ចុះផ្សាយនៅថ្ងៃ៖
ស្តាប់ - ០២:៣៦
ក្រោមកម្លាំងខ្យល់ប្រមាណ ១៨៥គីឡូម៉ែត្រក្នុងមួយម៉ោង ព្យុះអ៊ូរ៉ាហ្កង់Ian បានបោកពន្លិចទូកដឹកជនភៀសខ្លួនមួយគ្រឿង នៅតំបន់ប្រជុំកោះKeys ភាគខាងត្បូងរដ្ឋផ្លរីដា។ ឆ្មាំសមុទ្រកំពុងតែស្វែងរក មនុស្សចំនួន២០នាក់ ដែលបាត់ខ្លួននៅក្នុងទឹកសមុទ្រ។
យោងតាមមជ្ឈមណ្ឌលជាតិអ៊ូរ៉ាហ្កង់ ខ្យល់ព្យុះ Ian បានបោកបក់មកដល់ឆ្នេរតំបន់ Cayo Costa នៅវេលាម៉ោង ៣រសៀល ថ្ងៃពុធទី២៨កញ្ញា ហើយបានបង្កជាទឹកជំនន់យ៉ាងធ្ងន់ធ្ងរ។ គេហទំព័រ PowerOutage បានបញ្ជាក់ថា យ៉ាងហោចណាស់ ផ្ទះសំបែងចំនួន២លានខ្នង ត្រូវបានដាច់ចរន្តអគ្គិសនី។ គ្រប់តំបន់ ដែលស្ថិតនៅតាមផ្លូវឆ្លងកាត់ របស់ព្យុះអ៊ូរ៉ាហ្កង់នេះ គឺចរន្តភ្លើងត្រូវដាច់ងងឹតឈឹងតែម្តង។ ដំបូលអាគារ ផ្ទាំងបដា និងស្លាកសញ្ញាចរាចរណ៍ ត្រូវកម្លាំងខ្យល់បក់គួចត្របាញ់ បាក់បែក ហោះប្រណាំងនឹងមែកឈើ។
យោងតាមរូបភាព ផ្សាយដោយបណ្តាញទូរទស្សន៍ MSNBC ទីក្រុង Naples ស្ថិតនៅភាគនិរតីរដ្ឋផ្លរីដា ត្រូវស្ថិតនៅក្នុងទឹកជំនន់ទាំងស្រុង។ លោក Ron DeSantis អភិបាលរដ្ឋផ្លរីដា អះអាងថាទីកន្លែងខ្លះ ទឹកជំនន់មានកំពស់ដល់ទៅ៣ម៉ែត្រ។ លោកបានលើកឡើងថា ព្យុះអ៊ូរ៉ាហ្កង់ Ian អាចប្រហែលជាខ្យល់ព្យុះដ៏កាចសាហាវ១ ក្នុងចំណោម៥ ដែលរដ្ឋផ្លរីដា មិនដែលធ្លាប់បានជួបប្រទះ។ លោកស្រីអគ្គនាយកទីភ្នាក់ងារសហព័ន្ធទទួលបន្ទុកមហន្តរាយធម្មជាតិ បានលើកឡើងថា ខ្យល់ព្យុះIan នឹងចុះថយកម្លាំងបន្តិចម្តងៗមែន តែវានឹងនៅតែអាចបង្កគ្រោះថ្នាក់ខ្លាំង នៅថ្ងៃបន្តបន្ទាប់។
គួរបញ្ជាក់ថា មុននឹងមកដល់រដ្ឋផ្លរីដា ខ្យល់ព្យុះអ៊ូរ៉ាហ្កង់នេះ បានបោកបក់សង្គ្រប់ពីលើកោះគុយបា កាលពីថ្ងៃអង្គារ ហើយបានផ្តាច់ចរន្តអគ្គិសនីប្រទេសក្រីក្រនេះ ឲ្យងងឹតសូន្យសុង។
យោងតាមលោក Gary Lackmann សាស្ត្រាចារ្យវិទ្យាសាស្ត្របរិយាកាស នៅសកលវិទ្យាល័យរដ្ឋការ៉ូលីនខាងជើង គឺផ្អែកលើការសិក្សាជាច្រើនបានបង្ហាញថា វាពិតជាមានទំនាក់ទំនងហេតុនិងផល រវាងការប្រែប្រួលអាកាសធាតុ ជាមួយនឹងអភូតហេតុធម្មជាតិ ខ្យល់ព្យុះកាន់តែកាចសាហាវបែបនេះ។ សីតុណ្ហភាពលើផ្ទៃទឹកសមុទ្រកាន់តែឡើងក្តៅខ្លាំង អាចជាកត្តារុញច្រាន ធ្វើឲ្យខ្យល់ព្យុះកម្លាំងខ្សោយល្មម ប្រែក្លាយទៅជាព្យុះអ៊ូរ៉ាហ្កង់កាចសាហាវ ក្នុងពេលយ៉ាងខ្លីភ្លាមៗ។ ជាក់ស្តែង ខ្យល់ព្យុះ Ian នេះ បានប្រែក្លាយពីខ្យល់ព្យុះត្រូពិកធម្មតា ទៅជាខ្យល់ព្យុះអ៊ូរ៉ាហ្កង់ខ្លាំងក្លា ក្នុងរយៈពេលត្រឹមតែ២៤ម៉ោង តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ