លោក ចូ បៃដិន ព្រមានអារ៉ាប៊ីសាអូឌីតដែលរួមដៃជាមួយរុស្ស៊ីធ្វើឱ្យប្រេងឡើងថ្លៃ
កាលនៅជាបេក្ខជនប្រធានាធិបតី លោក បៃដិន បានសន្យាហៅ អារ៉ាប៊ីសាអូឌីត ជាប្រទេសដែលមិនគួររាប់រក។ នៅខែកក្កដាកន្លងទៅថ្មីៗនេះ ប្រធានាធិបតីអាមេរិក បានសាកល្បងបង្ខិតខ្លួនទៅរកអារ៉ាប៊ីសាអូឌីត ប៉ុន្តែនៅថ្ងៃអង្គារទី ១១តុលា ២០២២ម្សិលមិញនេះ លោក ចូ បៃដិន បានដំឡើងសំឡេងព្រមានរាជាណាចក្រប្រេងមួយនេះ បន្ទាប់ពីក្រុងរីយ៉ាដ បានសម្រេចកាត់បន្ថយការបូមប្រេង ក្នុងពេលពិភពលោកកំពុងប្រឈមនឹងវិបត្តិថាមពល។
ចុះផ្សាយនៅថ្ងៃ៖
ស្តាប់ - ០២:១៤
ដោយសំដៅលើសេចក្តីសម្រេចរបស់Opep+ ដឹកនាំដោយប្រទេសអារ៉ាប៊ីសាអូឌីត កាត់បន្ថយកូតាបូមប្រេងដែលធ្វើឱ្យតម្លៃប្រេងឡើងថ្លៃ និងដែលបានជួយបំពេញហិបរុស្ស៊ីពីការលក់ប្រេងដើម្បីមានលុយធ្វើសង្គ្រាមនៅអ៊ុយក្រែន លោកប្រធានាធិបតីអាមេរិក បានព្រមានថា “រួមដៃជាមួយរុស្ស៊ី នឹងទទួលផលវិបាក”។ ប៉ុន្តែលោកមិនបញ្ជាក់ថាជាផលវិបាកបែបណាទេ។
អ្នកនាំពាក្យទីប្រឹក្សាសន្តិសុខជាតិរបស់សេតវិមាន បានព្រលយឱ្យដឹងជាមុនថានៅចំពោះមុខស្ថានភាពបច្ចុប្បន្ន និងសេចក្តីសម្រេចរបស់Opep+ ប្រធានាធិបតីអាមេរិកត្រូវសើរើមើលទំនាក់ទំនងទ្វេភាគីជាមួយអារ៉ាប៊ីសាអូឌីតឡើងវិញ និងត្រៀមពិចារណាជាមួយសភាក្នុងការកំណត់ទម្រង់នៃទំនាក់ទំនងអាមេរិក-អារ៉ាប៊ីសាអូឌីត។
កាលពីខែកក្កដា ប្រធានាធិបតីអាមេរិក បានប្តូរចិត្ត ប្តូរសំឡេង ធ្វើដំណើរទៅជួបរាជបុត្រស្នងរាជអារ៉ាប៊ីសាឌីតដោយផ្ទាល់ ដើម្បីបញ្ចុះបញ្ចូលរាជាណាចក្រប្រេងនេះ ឱ្យបង្កើនផលិតកម្មបូមប្រេង ជួយពិភពលោកដែលកំពុងមានវិបត្តិថាមពលបង្កឡើងដោយសង្គ្រាមនៅអ៊ុយក្រែន។ ផ្ទុយពីការទាមទារ Opep+ ដែលមានសមាជិក១៣ប្រទេសជាអ្នកនាំចេញប្រេង ដឹកនាំដោយអារ៉ាប៊ីសាអូឌីត និងដៃគូ១០ប្រទេសនាំមុខដោយរុស្ស៊ី បានកាច់នយោបាយការទូតរបស់លោកបៃដិន ដោយសម្រេចបន្ថយការបូមប្រេង ក្រោមហេតុផលសេដ្ឋកិច្ចនិងទ្រទ្រង់ទីផ្សារប្រេងឱ្យមាននិរន្តរភាព។
សេចក្តីសម្រេចនេះ បានធ្វើឱ្យសមាជិកសភាអាមេរិកផ្ទុះកំហឹងយ៉ាងខ្លាំង ជាពិសេសសមាជិកសភាបក្សប្រជាធិបតេយ្យរបស់លោកចូបៃដិន។ ប្រធានគណៈកម្មការកិច្ចការបរទេសនៅព្រឹទ្ធសភាអាមេរិក បានគំរាមបិទខ្ទប់មិនឱ្យមានការលក់អាវុធទៅឱ្យអារ៉ាប៊ីសាអូឌីតនៅពេលអនាគត និងចង់លើកសំណើច្បាប់បិទបញ្ចប់ការនាំចេញអាវុធនេះផង។
សូមរំលឹកថា អាមេរិកនិងអារ៉ាប៊ីសាអូឌីត បានផ្សារភ្ជាប់ភាពជាដៃគូនឹងគ្នាតាំងពីក្រោយសង្គ្រាមលោកលើកទីពីរមក ដោយអាមេរិកធានាការពាររាជាណាចក្រ តាមផ្លូវយោធាជាថ្នូរនឹងការទិញប្រេង។ អាមេរិកក្នុងសម័យដឹកនាំដោយលោកដូណាល់ ត្រាំ បានផ្តល់សន្ទុះខ្លាំងដល់ការលក់អាវុធដល់សម្ព័ន្ធមិត្តដ៏ចំណាស់មួយនេះ។ បើតាមវិទ្យាស្ថានStockholm International Peace Research Institute (SIPRI) ពីឆ្នាំ២០១៦ទៅ២០២០ អាមេរិកបានលក់អាវុធទៅឱ្យអារ៉ាប៊ីសាអូឌីតចំនួន២៤%នៃការនាំចេញអាវុធសរុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ