កាដាណា ហាមឃាត់ក្រុមហ៊ុនចិន៣ មិនឲ្យវិនិយោគក្នុងឧស្សាហកម្មជីករ៉ែកម្រ ក្រោមហេតុផលសន្តិសុខជាតិ
កាណាដាទើបតែបានអនុម័តច្បាប់ថ្មី ដែលរិតបន្តឹងការវិនិយោគពីក្រុមហ៊ុនបរទេស នៅក្នុងវិស័យយុទ្ធសាស្ត្រ ដែលពាក់ព័ន្ធដល់សន្តិសុខជាតិ។ ដោយយោងតាមច្បាប់ថ្មីនេះ រដ្ឋាភិបាលកាណាដា បានសម្រេចកាលពីថ្ងៃពុធ ទី២វិច្ឆិកា ម្សិលមិញ ដកអាជ្ញាបណ្ណ លែងឲ្យក្រុមហ៊ុនចិនចំនួន៣ក្រុមហ៊ុន វិនិយោគនៅក្នុងវិស័យឧស្សាហកម្មជីករ៉ែកម្រ នៅកាណាដា។
ចុះផ្សាយនៅថ្ងៃ៖
ស្តាប់ - ០២:២៥
ក្រុមហ៊ុនចិនចំនួន៣ ដែលត្រូវបោះបង់ការវិនិយោគនៅកាណាដា គឺមាន Sinomine Rare Metals Resources Co Ltd ក្រុមហ៊ុន Chengze Lithium International Limited និងក្រុមហ៊ុន Zangge Mining Investment Co Ltd។ នេះបើផ្អែក តាមលិខិតប្រកាស របស់រដ្ឋាភិបាលកាណាដា ចេញផ្សាយកាលពីថ្ងៃពុធ ទី២វិច្ឆិកា។
លោក François-Philippe Champagne រដ្ឋមន្ត្រីក្រសួងវិទ្យាសាស្ត្រនិងឧស្សាហកម្មកាណាដា បានបញ្ជាក់ថា ការសម្រេចចិត្តនេះ ត្រូវបានធ្វើឡើង បន្ទាប់ពីបានឆ្លងកាត់ “ការពិនិត្យយ៉ាងជ្រៅជ្រះ” ធ្វើឡើងដោយអង្គភាពកាណាដា ទទួលបន្ទុកកិច្ចការសន្តិសុខជាតិ និងចារកិច្ច។
លោករដ្ឋមន្ត្រីបានអះអាងថា កាណាដា នៅតែបើកទ្វារចំហរជានិច្ច ទទួលការបោះទុនវិនិយោគដោយផ្ទាល់ ពីក្រុមហ៊ុនបរទេស។ ក៏ប៉ុន្តែកាណាដានឹងបង្កើនការប្រុងប្រយ័ត្នខ្ពស់ មិនធ្វេសប្រហែសឡើយ ប្រសិនបើការវិនិយោគនោះអាចបង្កជាការគំរាម ដល់សន្តិសុខជាតិ ក៏ដូចជាការផ្គង់ផ្គង់វត្ថុធាតុដើមយុទ្ធសាស្ត្រសំខាន់ៗ ជាក់ស្តែងដូចជា ធនធានរ៉ែកម្រ ដែលសំខាន់មិនថាសម្រាប់កាណាដា និងសម្រាប់ពិភពលោក។
សូមបញ្ជាក់ថា ការសម្រេចហាមឃាត់ក្រុមហ៊ុនចិនទាំង៣ លែងឲ្យវិនិយោគក្នុងវិស័យឧស្សាហកម្មរ៉ែកម្រនៅកាណាដានេះ គឺត្រូវបានធ្វើឡើង៥ថ្ងៃ បន្ទាប់ពីកាណាដា មានច្បាប់ថ្មីមួយ ដែលរិតបន្តឹងការវិនិយោគក្នុងវិស័យជីករ៉ែកម្រ។ ចាប់ពីពេលនេះទៅ ការវិនិយោគរបស់ក្រុមហ៊ុនបរទេស នៅក្នុងវិស័យជីករ៉ែកម្រ គឺអាចត្រូវបានអនុញ្ញាត តែនៅក្នុងករណីពិសេសតែប៉ុណ្ណោះ។
រដ្ឋាភិបាលកាណាដា បានចេញបញ្ជីរាយឈ្មោះរ៉ែ ចំនួន៣១ប្រភេទ ដែលជាប្រភេទរ៉ែកម្រ ហើយមានសារៈសំខាន់ចាំបាច់ ស្ថិតក្នុងវិសាលភាពនៃច្បាប់ថ្មីនេះ។ ក្នុងចំណោមនោះ មានដូចជា រ៉ែកូបាល់ត៍ រ៉ែលីត្យ៉ូម និងម៉ង់កាណែស ជាដើម ដែលសុទ្ធតែជារ៉ែចាំបាច់ ប្រើក្នុងឧស្សាហកម្មផលិតផ្ទាំងសូឡា កង្ហារខ្យល់ផលិតរចន្តអគ្គិសនី និងថ្មសម្រាប់រថយន្តអគ្គិសនីជាដើម។
គួររំលឹកដែរថា ក្នុងរវាងប្រមាណជា២០ឆ្នាំចុងក្រោយនេះ ចិន ដែលជាប្រទេសផលិត កែច្នៃរ៉ែកម្រ ធំជាងគេបង្អស់នោះ បានចំណាយប្រាក់ជាច្រើនពាន់លានដុល្លារ ដើម្បីវិនិយោគនៅកាណាដា។ ជាការវិនិយោគដើម្បីធានា ការពារស្តុករ៉ែកម្ររបស់ចិន ឲ្យបានយូរអង្វែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ