អង្គការសហប្រជាជាតិ ជំរុញឲ្យប្រធានក្រុមហ៊ុនធ្វីតធ័រ គោរពសិទ្ធិមនុស្ស
-នៅថ្ងៃសៅរ៍ អង្គការសហប្រជាជាតិ បានស្នើជំរុញឲ្យប្រធានក្រុមហ៊ុនថ្មី របស់ធ្វីតធ័រ គឺលោក Elon Musk ឲ្យគោរពសិទ្ធិមនុស្ស។ ការអំពាវនាវនេះ គឺបន្ទាប់ពីលោក Elon Musk បានកែទម្រង់ក្រុមហ៊ុនធ្វីតធ័រ ដ៏ប្រញាប់ប្រញាល់ខ្លាំងពេក។ គ្រាន់តែទិញក្រុមហ៊ុននេះភ្លាម គឺលោកបានបណ្តេញអគ្គនាយកនិងថ្នាក់ដឹកនាំជាច្រើននាក់របស់ក្រុមហ៊ុន ហើយនៅក្នុងសប្តាហ៍នេះ លោកបានបញ្ឈប់បុគ្គលិករាប់ពាន់នាក់ពីការងារដោយគ្មានជូនដំណឹងជាមុនឡើយ។
ចុះផ្សាយនៅថ្ងៃ៖
ស្តាប់ - ០១:៤៦
ឧត្តមស្នងការសិទ្ធិមនុស្ស នៃ អង្គការសហប្រជាជាតិ បានប្រកាសឲ្យលោក Elon Musk ចៅហ្វាយថ្មីរបស់ក្រុមហ៊ុន ធ្វីតធ័រ ថាសូមឲ្យលោកគោរពគោលការណ៍សិទ្ធិមនុស្ស នៅក្នុងដំណើរចាត់ចែងក្រុមហ៊ុន។ ការគោរពសិទ្ធិមនុស្សនេះ គឺត្រូវគោរពទាំងនៅក្នុងដំណើរប្រព្រឹត្តិរបស់បណ្តាញសង្គមផ្ទាល់ផង និងនៅក្នុងរង្វង់ក្រុមហ៊ុនថែមទៀត។ នេះបើតាមខ្លឹមសារនៃលិខិតចំហរបស់ ឧត្តមស្នងការសិទ្ធិមនុស្ស លោក Volker Türk ដែលបានសរសេរពីក្រុងហ្សឺណែវ ផ្តាំផ្ញើត្រង់ទៅកាន់លោក Elon Musk។
គ្រាន់តែក្នុងសប្តាហ៍នេះ លោក Elon Musk បានបណ្តេញចេញនិងបញ្ឈប់បុគ្គលិក រួមទាំងវិស្វករ ប្រមាណជាពាក់កណ្តាល ពីក្រុមហ៊ុនធ្វីតធ័រ នៅ San Francisco ។ ពោលគឺបុគ្គលិកសរុប ប្រមាណជា ៧ ៥០០នាក់។ នៅប៉ុន្មានខែមុននេះ មានបុគ្គលិក ប្រមាណជា ៧០០នាក់ បានសុំឈប់ដោយស្ម័គ្រចិត្ត តាំងពីមុនការមកដល់របស់លោក Elon Musk ទៅទៀត។
អតីតបុគ្គលិកមួយចំនួនបានប្តឹងទៅតុលាការ ដោយសំអាងហេតុថា ធ្វីតធ័របញ្ឈប់ពួកគេដោយគ្មានជូនដំណឹងជាមុន។ បើតាមច្បាប់អាមេរិក ត្រូវជូនដំណឹងជាមុនចំនួន៦០ថ្ងៃ។ ករណីនេះ ចៅហ្វាយថ្មីរបស់ធ្វីតធ័រអាចនឹងត្រូវសងជំងឺចិត្តច្រើនរយលានដុល្លារ។
អ្នកខ្លះនៅបន្តមានទំនុកចិត្តចំពោះមហាសេដ្ឋីរូបនេះ ដែលមានគំនិតច្នៃប្រឌិតខ្ពស់ ពីព្រោះ គេជឿថាលោកអាចនាំការរីកចម្រើនដល់ក្រុមហ៊ុនធ្វីតធ័រ ដោយហេតុ លោកបានដឹកនាំក្រុមហ៊ុនបីក្នុងវិស័យខុសគ្នាបានជោគជ័យកន្លងមក នោះគឺ Paypal ខាងហិរញ្ញវត្ថុ, Tesla ខាងរថយន្តនិងអគ្គិសនី ហើយនិង SpaceX ខាងអវកាស។
នៅចុងសប្តាហ៍នេះ លោក Elon Musk បានថ្លែងសូមក្តីអធ្យាស្រ័យអភ័យទោសចំពោះបុគ្គលិក ធ្វីតធ័រ ថាព្រោះតែលោកបានចង់ធ្វើឲ្យក្រុមហ៊ុនដើរលឿនពេក ហើយដូច្នេះលោកសូមទទួលខុសត្រូវ។
ក្រោយពីបណ្តេញបុគ្គលិកថ្នាក់ដឹកនាំ និងបញ្ឈប់អ្នកធ្វើការរាប់ពាន់ពាន់ រួមទាំងវិស្វករ ប្រមាណ ជិត១០% រយៈពេលចុងក្រោយនេះ លោកចៅហ្វាយក្រុមហ៊ុនថ្មី បានសម្រេចដកក្រុមហ៊ុនចេញពីទីផ្សារភាគហ៊ុន ហើយនិងបានប្រកាសពីគម្រោងការឲ្យអ្នកប្រើធ្វីតធ័រ បង់លុយប្រចាំខែ ជិត៨ដុល្លារ ប្រសិនបើគេចង់បង្ហាញគណនីផ្លូវការ មានភ្ជាប់សញ្ញាគូសគ្រីស។ បន្ថែមពីនេះ ក្រុមហ៊ុននឹងកែប្រែគោលការណ៍ប្រើប្រាស់ធ្វីតធ័រមួយចំនួនទៀត ដែលនាំឲ្យមានភាពចម្រូងចម្រាស់ជុំវិញសិទ្ធិបញ្ចេញមតិ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ