លោកចូ បៃដិន ថានឹងនិយាយជាមួយលោកស៊ី ជីនពីង អំពី “បន្ទាត់ក្រហម” ដែលមិនត្រូវឈានជើងរំលង
បន្ទាប់ពីចូលរួមក្នុងជំនួបកំពូលអាស៊ាន នៅរាជធានីភ្នំពេញ នាចុងសប្តាហ៍នេះ លោកប្រធានាធិបតីអាមេរិក ចូ បៃដិន នឹងបន្តដំណើរទៅចូលរួមជំនួបកំពូល ក្រុមប្រទេសសេដ្ឋកិច្ចនាំមុខ G20 នៅឯកោះបាលី។ តាមការគ្រោងទុក លោកស៊ី ជីនពីង ក៏នឹងមានវត្តមាននៅទីនោះដែរ។ កាលពីថ្ងៃម្សិលមិញ លោក ចូ បៃដិន បានបញ្ជាក់ប្រាប់អ្នកកាសែតថា លោកនឹងនិយាយជាមួយលោកស៊ី ជីនពីន អំពី “បន្ទាត់ក្រហម” ដែលមិនត្រូវឈានជើងរំលងទាំងសងខាង។ លោកបៃដិន អះអាងថា លោកចង់ស្វែងរកច្រកផ្លូវ ដើម្បីដោះស្រាយវិវាទទាំងឡាយ ដែលអាមេរិកនិងចិន ប្រឈមមុខដាក់គ្នា។
ចុះផ្សាយនៅថ្ងៃ៖
ស្តាប់ - ០២:២២
“អ្វីដែលខ្ញុំចង់ធ្វើ នៅពេលខ្ញុំជួបជាមួយលោកស៊ី ជីនពីង នៅសប្តាហ៍ក្រោយ គឺខ្ញុំចង់និយាយជាមួយគាត់ ដើម្បីគូសគំនូសបន្ទាត់ក្រហម ដែលភាគីទាំងសងខាង ត្រូវតែគោរពឲ្យបាន”។ នេះគឺជាសំដីលើកឡើង របស់លោកចូ បៃដិន ប្រធានាធិបតីអាមេរិក នៅក្នុងសន្និសីទកាសែតឯក្រុងវ៉ាស៊ីនតោន។
លោក ចូ បៃដិន អះអាងថា លោកចង់សិក្សាឆ្វេងយល់ អំពីវិវាទប្រឈមមុខដាក់គ្នា រវាងគោលគំនិតធំៗរបស់លោកស៊ី ជីនពីង ដែលចង់ការពារផលប្រយោជន៍ជាតិរបស់ភាគីចិន និងអ្វីដែលលោកចូ បៃដិន គិតថាវាក៏ជាផលប្រយោជន៍ជាតិរបស់អាមេរិក។ លោកប្រធានាធិបតីអាមេរិក បានប្រាប់អ្នកកាសែតថា លោកមានចេតនាចង់ស្វែងរកច្រកផ្លូវ ដោះស្រាយវិវាទនេះ ព្រោះថា ចិន និងអាមេរិក ប្រឈមមុខដាក់គ្នា កាន់តែតានតឹងខ្លាំងឡើងៗ។
គួរបញ្ជាក់ថា លោក ចូ បៃដិន នឹងទៅចូលរួមកម្មវិធីជំនួបកំពូលក្រុមប្រទេសសេដ្ឋកិច្ចនាំមុខ G20 នៅឯកោះបាលី ប្រទេសឥណ្ឌូណេស៊ី។ ចំណែកជំនួបកំពូល អាស៊ីប៉ាស៊ីហ្វិក ហៅកាត់ថា APEC ដែលគេរៀបចំធ្វើនៅទីក្រុងបាងកក គឺលោកស្រីអនុប្រធានាធិបតី កាម៉ាឡា ហារីស ជាអ្នកមកចូលរួម។ លោកប្រធានាធិបតីចិន ស៊ី ជីនពីង នឹងមានវត្តមាននៅបាលី ក្នុងជំនួបកំពូល G20។
ជំនួបទ្វេភាគី រវាងលោកចូ បៃដិន និងលោកស៊ី ជីនពីង នៅបាលីនេះ ត្រូវបានគេរំពឹងតាមដានជាខ្លាំង បន្ទាប់ពីរដ្ឋាភិបាលលោកចូ បៃដិន បានប្រកាសចាត់ទុកចិន ថាគឺជាដៃគូប្រជែងតែមួយគត់ របស់សហរដ្ឋអាមេរិក។ ក្រៅពីសំណុំរឿងសេដ្ឋកិច្ចពាណិជ្ជកម្ម សំណុំរឿងកោះតៃវ៉ាន់ កំពុងតែឡើងកំដៅយ៉ាងក្តៅគគុក បន្ថែមភាពតានតឹងរវាងមហាអំណាចទាំង២។ ជាងនេះទៀត លោកស៊ី ជីនពីង ទើបតែត្រូវបានគណបក្សកុម្មុយនីស្តចិន តែងតាំងឲ្យធ្វើជាអគ្គលេខាធិការបក្ស និងជាប្រធានាធិបតីមួយអាណត្តិទេ។ ប្រការនេះ បានបង្កើតឲ្យមានការបារម្ភកាន់តែខ្លាំង ទៅលើកោះតៃវ៉ាន់ ព្រោះលោកស៊ី ជីនពីង ធ្លាប់បានប្តេជ្ញាថានឹងយកតៃវ៉ាន់ មករួមរស់ក្នុងមហាគ្រួសារចិនវិញឲ្យបាន។
ទាក់ទងនឹងបញ្ហាកោះតៃវ៉ាន់នេះដែរ លោកចូ បៃដិន បានប្រាប់អ្នកកាសែតថា លោកនឹងលើកយកសំណុំរឿងនេះ ទៅនិយាយជាមួយលោកស៊ី ជីនពីងនៅបាលី។ លោកបានអះអាងទៀតថា ទ្រឹស្តីនយោបាយការទូតរបស់អាមេរិក មិនបានផ្លាស់ប្តូរទេ ក្នុងសំណុំរឿងតៃវ៉ាន់នេះ។ ជាទ្រិស្តី ដែលសហរដ្ឋអាមេរិករក្សាជំហរ ទទួលស្គាល់ប្រទេសចិនតែមួយ តែទន្ទឹមគ្នានេះ គឺបន្តជួយកោះតៃវ៉ាន់ ក្នុងការការពារខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ