លទ្ធផលតេស្តគ្លីនិក បញ្ជាក់អំពីប្រសិទ្ធភាពនៃថ្នាំថ្មីដំបូង សម្រាប់ព្យាបាលជំងឺវង្វេងវង្វាន់
អ្នកវិទ្យាសាស្ត្របានអបអរនៅថ្ងៃពុធទី ៣០វិច្ឆិកា២០២២ នេះ លទ្ធផលលម្អិត នៃការសិក្សាសាកល្បងគ្លីនិកថ្នាំសម្រាប់ព្យាបាលជំងឺវង្វេងវង្វាន់។ ថ្នាំថ្មីនេះ ពិតជាមានប្រសិទ្ធភាព ពន្យឺត ការបាត់បង់សមត្ថភាពខួរក្បាលរបស់អ្នកជំងឺខូចប្រព័ន្ធប្រសាទវង្វេងបានមែន។ ប៉ុន្តែថ្នាំនេះក៏អាចផ្តល់ផលរំខានខ្លាំងនិងធ្ងន់ធ្ងរដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
ផលិតដោយក្រុមហ៊ុនឱសថជប៉ុនEissai និងអាមេរិក Biogen ថ្នាំ Lecanemab អាចកាត់បន្ថយការបាត់បង់សមត្ថភាពខួរក្បាល របស់អ្នកជំងឺបាន២៧%។ នេះបើតាមលទ្ធផលនៃការសាកល្បងដំណាក់កាលទីបី ដែលជាដំណាក់កាលចុងក្រោយ។ លទ្ធផលនេះក៏ជាការបញ្ជាក់អំពីប្រសិទ្ធភាពដ៏គួរឱ្យកត់សម្គាល់នៃថ្នាំ ថាពិតជាដូចអ្វីដែលក្រុមហ៊ុនធ្លាប់ប្រកាសកាលពីខែកញ្ញា២០២២។
ប៉ុន្តែនៅក្នុងការសិក្សាដ៏ពេលលេញ ដែលចុះផ្សាយក្នុងទំព័រទស្សនាវដ្តីសុខភាព New England Journal of Medecine នាថ្ងៃពុធទី ៣០វិច្ឆិកានេះ អ្នកវិទ្យាសាស្ត្របានរកឃើញដែរ អំពីផលរំខាននៃថ្នាំ ឡឺកានឺម៉ាប់ ដែលជួនធ្ងន់ធ្ងរខ្លាំង ហើយអាចកើតមានញឹកញយទៀត។ អ្នកជំងឺវង្វេងវង្វាន់ព្យាបាលដោយថ្នាំថ្មី ចំនួន ១៧,៣% មានបញ្ហាហូរឈាមក្នុងខួរក្បាល ទល់នឹង៩%សម្រាប់អ្នកប្រើប្លាសឺបូ។ ១២,៦%នៃអ្នកជំងឺលេបថ្នាំពិសោធន៍ ហើមខួរក្បាល ឯអ្នកមិនលេបថ្នាំមានគ្រោះហើមខួរក្បាលតែ១,៧%ប៉ុណ្ណោះ។ ចំណែកអត្រាមរណៈមានប្រហាក់ប្រហែលគ្នាទេ។
យ៉ាងណាក៏ដោយ ក៏អ្នកវិទ្យាសាស្ត្រនាំគ្នាអបអរសាទរដែរ ព្រោះ ឡឺកានឺម៉ាប់ ជាថ្នាំទីមួយ ដែលផ្តល់លទ្ធភាពព្យាបាលដល់អ្នកមានជំងឺវង្វេងវង្វាន់។ ទោះបីប្រសិទ្ធភាពគ្លីនិកនៅមានកំរិតមែនប៉ុន្តែគេនឹងអាចដឹងប្រយោជន៍ពិត នៅពេលប្រើថ្នាំរយៈពេលយូរ។ នេះបើតាមសាស្រ្តាចារ្យវេជ្ជបណ្ឌិត Bart Strooper នាយកវិទ្យាស្ថានស្រាវជ្រាវជំងឺវង្វេងរបស់អង់គ្លេស។
ទំនងបង្កឡើងដោយប្រូតេអ៊ីនពីរ គឺប្រូតេអ៊ីន Tau និង ប្រូតេអ៊ីន bêta amyloïde ដែលទៅកកផ្តុំយ៉ាងអនាថាលើខួរក្បាលរហូតទាល់តែកោសិកាខួរក្បាលងាប់ និងរួមតូច ហើយធ្វើឱ្យភ្លេចភ្លាំង ថ្នាំឡឺកានឺម៉ាប់ នឹងទៅជម្រុះកំណកប្រូតេអ៊ីនបេតាអាមីឡូអ៊ីត ដែលទើបមកកកតោង ពោលគឺក្នុងដំណាក់កាលដំបូងនៃជំងឺ ប៉ុន្តែជាទូទៅគេច្រើនតែវែករកជំងឺឃើញក្នុងដំណាក់កាលធ្ងន់បន្តិចទៅហើយ។ ហេតុដូច្នេះហើយបានជាបម្រើបម្រាស់និងប្រសិទ្ធភាពរបស់ លីកានូម៉ាប់ ត្រូវមានកំរិត។
កាលពីឆ្នាំ២០២១ ក្រុមហ៊ុនឱសថទាំងពីរនេះ ធ្លាប់ដាក់សេចក្តីយ៉ាងខ្លាំងលើថ្នាំ Aduhelm ថាជាថ្នាំព្យាបាលជំងឺវង្វេងវង្វាន់ទីមួយ ដែលអនុញ្ញាតឱ្យប្រើប្រាស់នៅអាមេរិក។ ប៉ុន្តែ នៅក្នុងការសាកល្បងគ្លីនិក គណៈកម្មការជំនាញបានប្រកាសថាគ្មានប្រសិទ្ធិភាពគ្រប់គ្រាន់ទេ ទើបកំហិតការប្រើប្រាស់វិញ។
ជំងឺវង្វេងវង្វាន់ជាបន្ទុកសុខភាពសាធារណៈដ៏ចម្បងមួយ សម្រាប់ពិភពលោកដែលរាប់ឃើញមានមនុស្សជាង៤០នាក់កើតជំងឺនេះ។ មន្ទីរពិសោធន៍ធំៗនៅលើពិភពលោក បាននិងកំពុងពុះពារស្រាវជ្រាវរកវិធីព្យាបាលជំងឺវង្វេងវង្វាន់ ដែលគ្មានអ្វីអាចព្យាបាលសម្រាប់ពេលនេះ ព្រោះគេនៅពុំទាន់ដឹងមូលហេតុនិងយន្តការច្បាស់លាស់។
ថ្នាំ ឡឺកានឺម៉ាប់ របស់អាមេរិកនិងជប៉ុននេះ ក៏មិនអាចព្យាបាលឱ្យជាដាច់ពីជំងឺវង្វេងវង្វាន់ដែរ គឺគ្រាន់តែពន្យឺតល្បឿននៃការបាត់បង់សមត្ថភាពចងចាំប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ