អាមេរិកអះអាងថា ខ្លួនមិនបានជួយ និងមិនបានលើកទឹកចិត្តឲ្យអ៊ុយក្រែនវាយប្រហាររុស្ស៊ីនៅក្នុងទឹកដីរុស្ស៊ីទេ
នៅសហរដ្ឋអាមេរិក រដ្ឋបាលក្រុងវ៉ាស៊ីនតោនបានថ្លែងច្បាស់ៗថា ខ្លួនមិនបានផ្តល់អាវុធឲ្យអ៊ុយក្រែនដើម្បីវាយប្រហាររុស្ស៊ីនៅក្នុងទឹកដីរុស្ស៊ីទេ។ ការថ្លែងនេះបានធ្វើឡើងដោយរដ្ឋមន្រ្តីការបរទេសលោកអង់តូនី ប៊្លីនកិន រដ្ឋមន្រ្តីក្រសួងការពារជាតិលោកឡយដ៍ អូស្ទីន និងអ្នកនំាពាក្យក្រសួងការបរទេសលោកនែដ ប្រៃយ៍។ គួរបញ្ជាក់ថាក្នុងថ្ងៃចន្ទ ទី៥ ធ្នូ រុស្ស៊ីបានប្រកាសឲ្យដឹងពីការរងការវាយប្រហារដោយដ្រូនលើមូលដ្ឋានទ័ពអាកាសចំនួនពីរកន្លែងរបស់ខ្លួនដែលបណ្តាលស្លាប់មនុស្សចំនួន ៣នាក់ និងខូចខាតយន្តហោះចំនួន ២គ្រឿង។ ដោយមិនបង្អង់យូរ រុស្ស៊ីបានចង្អុលចំមុខអ៊ុយក្រែន តែអ៊ុយក្រែនបានឆ្លើយបដិសេធ។ ចំណែកក្រុមអ្នកជំនាញគិតថា អ៊ុយក្រែនប្រហែលជាបានចូលក្នុងលំហអាកាសរុស្ស៊ីដោយប្រើដ្រូនជំនាន់សហភាពសូវៀត ពោលមិនមែនដ្រូនផ្តល់ដោយបស្ចិមលោកទេ។ ទាក់ទងនឹងជំនួយយោធារបស់បស្ចិមលោកចំពោះអ៊ុយក្រែនត្រូវបានថ្នាក់ដឹកនាំក្នុងរដ្ឋបាលអាមេរិកបញ្ជាក់ច្បាស់ៗថា ជាគ្រឿងសព្វាវុធសម្រាប់ឲ្យអ៊ុយក្រែនការពារខ្លួនប្រឆាំងនឹងការឈ្លានពានរបស់រុស្ស៊ី។ តាមអ្នកនំាពាក្យក្រសួងការបរទេសអាមេរិកលោកនែដ ប្រៃយ៍ អាមេរិកមិនបានលើកទឹកចិត្តឲ្យអ៊ុយក្រែនវាយប្រហាររុស្ស៊ីនៅក្នុងទឹកដីរុស្ស៊ីទេ។
ចុះផ្សាយនៅថ្ងៃ៖
ស្តាប់ - ០១:១៩
« យើងមិនបានផ្គត់ផ្គង់អាវុធឲ្យអ៊ុយក្រែនដើម្បីឲ្យអ៊ុយក្រែនប្រើសម្រាប់វាយប្រហារនៅផ្ទៃក្នុងទឹកដីរុស្ស៊ីទេ។ យើងមានជំហរច្បាស់លាស់ណាស់នៅក្នុងរឿងនេះ។ អាវុធដែលយើងបានផ្តល់ឲ្យអ៊ុយក្រែនសុទ្ធសឹងជាអាវុធសម្រាប់ការពារខ្លួនប្រឆាំងនឹងការឈ្លានពានពីរុស្ស៊ី។ ប្រធានាធិបតីអាមេរិកលោកបៃដិនបាននិយាយច្បាស់ហើយនាពេលថ្មីៗកន្លងទៅនេះ។
យើងមិនបានផ្តល់ឲ្យអ៊ុយក្រែននូវមធ្យោបាយដើម្បីឲ្យអ៊ុយក្រែនបើកការវាយប្រហារនៅក្រៅព្រំដែនរបស់ខ្លួនទេ។ យើងមិនបានលើកទឹកចិត្តឲ្យអ៊ុយក្រែនធ្វើអន្តរាគមន៍ហួសពីព្រំដែនរបស់ខ្លួនឡើយ។ អ្វីដែលយើងបានធ្វើ និងអ្វីដែលពិភពលោកបានធ្វើដើម្បីជួយអ៊ុយក្រែន គឺគាំទ្រឯករាជ្យភាពរបស់អ៊ុយក្រែន អធិបតេយ្យភាពរបស់អ៊ុយក្រែន និងបូរណភាពទឹកដីរបស់អ៊ុយក្រែន។
យើងផ្តល់ឲ្យអ៊ុយក្រែននូវអ្វីដែលអ៊ុយក្រែនត្រូវការដើម្បីប្រើប្រាស់នៅលើដែនដីអធិបតេយ្យរបស់ខ្លួន នៅលើទឹកដីអ៊ុយក្រែនក្នុងការប្រេឈមទប់នឹងអ្នកឈ្លានពានរុស្ស៊ី »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ