កាណាដាចង់ធ្វើជាគំរូ ដោយប្រកាសផ្តល់ប្រាក់ជំនួយដល់ប្រទេសក្រីក្រដើម្បីការពារជីវចម្រុះ
នៅកាណាដា ការចរចាដើម្បីឈានទៅរកកិច្ចព្រមព្រៀងដើម្បីការពារប្រព័ន្ធជីវចម្រុះនៅក្នុងពិភពលោកហាក់មិនសូវបោះជំហានទៅមុខ ដោយសារតែការខ្វែងគំនិតគ្នាជុំវិញ ជំនួយហិរញ្ញវត្ថុសម្រាប់ជួយប្រទេសក្រីក្រ។ ដើម្បីធ្វើជាគំរូគេ និងចង់លើកទឹកចិត្តឲ្យមានការបរិច្ចាគដើម្បីបុព្វហេតុការពារធម្មជាតិនៅលើផែនដី កាណាដាប្រទេសម្ចាស់ផ្ទះរៀបចំ សន្និសីទអន្តរជាតិស្ដីពីជីវចម្រុះ COP១៥ បានប្រកាសផ្តល់ជំនួយ ២៥៥លានដុល្លារកាណាដា ដែលស្មើនឹង១៨៦លានដុល្លារអាមេរិកដើម្បីឲ្យប្រទេសដែលមានប្រាក់ចំណូលទាបអាចមានលទ្ធភាពការពារប្រព័ន្ធអេកូឡូស៊ី និងជីវចម្រុះ។
ចុះផ្សាយនៅថ្ងៃ៖
ស្តាប់ - ០២:៣៦
ជាប្រទេសម្ចាស់ផ្ទះ រៀបចំសន្និសីទអន្តរជាតិស្តីពីជីវចម្រុះCop១៥ កាណាដាចង់ផ្តល់សន្ទុះដល់ការចរចា ដោយប្រកាសបង្កើនជំនួយអន្តរជាតិសម្រាប់ប្រទេសកំពុងអភិវឌ្ឍ។ នៅក្នុងសន្និសីទដែលកំពុងប្រព្រឹត្តទៅនៅទីក្រុងម៉ុងរ៉េអាល់ រដ្ឋមន្រ្តីបរិស្ថានរបស់កាណាដា បានប្រកាសថា កាណាដានឹងបង្កើនប្រាក់ជំនួយ ១៨៦លានដុល្លារអាមេរិកបន្ថែមទៀត សម្រាប់ជួយក្រុមប្រទេសកំពុងអភិវឌ្ឍ ក្នុងការការពារធម្មជាតិ និងសម្របខ្លួនទៅនឹងការប្រែប្រួលអាកាសធាតុ។ តាមរដ្ឋមន្រ្តីកាណាដា កញ្ចប់ជំនួយបន្ថែមនឹងធ្វើឲ្យប្រាក់ជំនួយសរុបរបស់កាណាដា សម្រាប់ការពារប្រព័ន្ធជីវចម្រុះ កើនឡើងដល់១,៥ពាន់លានដុល្លារកាណាដា។
ការប្រកាសផ្តល់ជំនួយរបស់កាណាដា ដែលស្ថិតនៅក្នុងភាគីក្រុមប្រទេសអ្នកមាន កើតមានឡើងនៅខណៈពេលដែលការចរចាដើម្បីឈានទៅបង្កើតកិច្ចព្រមព្រៀងការពារប្រព័ន្ធជីវចម្រុះនៅលើផែនដី កំពុងជាប់គាំងខ្លាំងដោយសារសំណុំរឿងហិរញ្ញវត្ថុសម្រាប់ប្រទេសក្រីក្រ។
ដូចការចរចាដើម្បីបង្កើតកិច្ចព្រមព្រៀងស្តីពីអាកាសធាតុ នៅប្រទេសអេហ្ស៊ីប កាលពីដើមខែធ្នូ ក្រុមប្រទេសខាងត្បូង ប្រទេសក្រីក្រ ជាថ្មីម្តងទៀតបានទាមទារឲ្យក្រុមប្រទេសអ្នកមាន នៅខាងជើងជាអ្នកផ្តល់ជំនួយឧបត្ថម្ភសម្រាប់សកម្មភាពការពារប្រព័ន្ធជីវចម្រុះ។
ប្រេស៊ីល ឥណ្ឌា ឥណ្ឌូណេស៊ីនិងប្រទេសនៅតំបន់អាហ្វ្រិកបានទាមទារថវិកាយ៉ាងតិច ១០០ពាន់លានដុល្លារពីប្រទេសអ្នកមាន។ នៅថ្ងៃព្រហស្បតិ៍ អ្នកតំណាងក្រុមប្រទេសអ្នកមាន ប្រមាណ ១២ប្រទេស ដែលមានដូចជាជប៉ុន អូស្ត្រាលី និងបណ្តាប្រទេសនៅអឺរ៉ុបបានរំលឹកថា ពួកគេបានគោរពការសន្យាដោយបានបង្កើនថវិកាជំនួយទ្វេដង។ លើសពីនោះពួកគេប្រកាសត្រៀមខ្លួនដើម្បីជួយប្រទេសនៅខាងត្បូង។
ការសន្យារបស់ក្រុមប្រទេសអ្នកមាននៅតែមិនទាន់មានឥទ្ធិពល ទៅបញ្ចុះបញ្ចូលឲ្យគេចរចាបង្កើតកិច្ចព្រមព្រៀងដ៏មានមហិច្ឆតាមួយ។ នៅពេលសន្និសីទត្រូវបញ្ចប់នៅថ្ងៃចន្ទទី ១៩ធ្នូ ពេលវេលានៃការចរចាកាន់តែខើច។ ម្យ៉ាងពិភពលោកមិនមានពេលវេលាច្រើនទៀតនោះទេ ព្រោះថា ៧០%នៃប្រព័ន្ធអេកូឡូស៊ី និងជីវចម្រុះនៅក្នុងពិភពលោកកំពុងរងការបំផ្លាញដោយសារស្នាដៃមនុស្ស។ ប្រភទេសត្វ ជាង១លានដែលជាប្រភពទ្រទ្រង់ជីវិតនៅលើផែនដី កំពុងប្រឈមនឹងការរលាយផុតពូជ។ ក្រៅពីកាតព្វកិច្ចសីលធម៌ គេត្រូវដឹងដែរថា ពាក់កណ្តាលនៃផលិតផលក្នុងស្រុកសរុបក្នុងពិភពលោក ដែលមានប្រមាណ ៤៤ទ្រីលានដុល្លារ ត្រូវពឹងអាស្រ័យទាំងស្រុងលើអនាគតជីវចម្រុះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ