ក្រោយស្ទាក់ស្ទើរចង់លេបសំដីវិញ ទីបំផុតលោកអេឡុន មើស្ក៍ ប្រកាសថានឹងឈប់គ្រប់គ្រងTwitter
លោកអេឡុន មើស្ក៍ ដែលជាម្ចាស់និងជាអគ្គនាយកក្រុមហ៊ុនបណ្តាញសង្គមTwitter បានប្រកាសថា លោកនឹងចាកចេញឈប់គ្រប់គ្រងក្រុមហ៊ុននេះ ដើម្បីទុកមុខងារនេះ ទៅឲ្យមនុស្សម្នាក់ផ្សេងទៀត។ សូមបញ្ជាក់ថា លោកអេឡុន មើស្ក៍ បានបើកការស្ទាបស្ទង់មតិ ឲ្យអ្នកប្រើប្រាស់បណ្តាញTwitter បញ្ចេញមតិថាតើលោកត្រូវនៅគ្រប់គ្រង Twitter ឬក៏ត្រូវឈប់។ លទ្ធផលបានបង្ហាញថា មានមតិ៥៧%ដែលចង់ឃើញលោកឈប់ធ្វើជាអគ្គនាយកគ្រប់គ្រងTwitter តទៅទៀត។ ការប្រកាសលាឈប់ពីការគ្រប់គ្រងបណ្តាញTwitterនេះ គឺត្រូវបានធ្វើឡើង បន្ទាប់ពីលោក អេឡុន មើស្ក៍បានបង្ហាញភាពស្ទាក់ស្ទើរ ចង់លេបសំដីខ្លួនឯងវិញ។
ចុះផ្សាយនៅថ្ងៃ៖
ស្តាប់ - ០២:៤២
លោកអេឡុន មើស្ក៍កំពូលមហាសេដ្ឋី ម្ចាស់ក្រុមហ៊ុន Tesla SpaceX និង Twitter តែងតែមានទំលាប់ បើកឲ្យមានការចូលរួមយោបល់នៅលើបណ្តាញសង្គម ដើម្បីសម្រេចធ្វើអ្វីថ្មីមួយ ដែលលោកចង់ធ្វើ។ ហើយជានិច្ចជាកាល គឺលទ្ធផលនៃការស្ទាបស្ទង់មតិ តែងតែស្របទៅនឹងគំនិតចង់បានរបស់លោក ជាក់ស្តែងដូចជាការបើកឲ្យដំណើរការឡើងវិញ នូវគណនីTwitter របស់លោកដូណាល់ ត្រាំជាដើម។
កាលពីថ្ងៃចន្ទ ដើមសប្តាហ៍នេះ លោក អាឡុន មើស្ក៍បានបើកឲ្យអ្នកប្រើប្រាស់ Twitter ទាំង១៧លាននាក់ បញ្ចេញមតិមកថា តើគាំទ្រឬមិនគាំទ្រ ឲ្យលោកធ្វើជាអគ្គនាយក Twitterតទៅទៀត។ ទោះលទ្ធផលយ៉ាងណា គឺលោកនឹងគោរពលទ្ធផលនោះ។ ចំណេះជិះកឯង លទ្ធផលស្ទាបស្ទង់មតិ បានបង្ហាញថា ៥៧% នៃអ្នកបានបញ្ចេញមតិ គឺមិនគាំទ្រឲ្យលោកគ្រប់គ្រង Twitter តទៅទៀតទេ។
ក្រោយបានលទ្ធផលនេះភ្លាម កំពូលមហាសេដ្ឋីរូបនេះ ហាក់បានបង្ហាញភាពស្ទាក់ស្ទើរ ចង់លេបសំដីខ្លួនឯងវិញ ដោយនៅស្ងាត់ស្ងៀម មុននឹងអះអាងថាមានបញ្ហាបច្ចេកទេស ទើបបានធ្វើឲ្យលទ្ធផលស្ទាបស្ទង់មតិចេញមកបែបនេះ។ បន្ទាប់មកទៀត នៅថ្ងៃអង្គារ លោកអេឡុន មើស្ក៍ បានផ្សាយលទ្ធផលស្ទាបស្ទង់មតិមួយទៀត ដែលលោកបានទិញសេវាកម្មឲ្យវិទ្យាស្ថានស្ថិតិ HarrisX ជាអ្នកធ្វើ ហើយដែលលទ្ធផលបង្ហាញថា ៦១%នៃមនុស្សដែលគេបានសួរ គឺចង់ឲ្យលោកបន្តធ្វើជាអគ្គនាយក Twitter។ តែទីបំផុត ប្រឈមនឹងការរិះគន់សើចចំអក ពីសំណាក់អ្នកប្រើប្រាស់Twitter លោកអេឡុន មើស្ក៍ បានប្រកាសនៅថ្ងៃពុធទី២១ធ្នូថា លោកនឹងចុះពីកៅអីអគ្គនាយក នៅពេលណារកអ្នកមកជំនួសបាន។
សូមរំលឹកថា លោកអេឡុន មើស្ក៍បានទិញបណ្តាញសង្គម Twitter ក្នុងតម្លៃ៤៤ពាន់លានអឺរ៉ូ។ ក្រោយក្លាយជាម្ចាស់ និងជាអគ្គនាយកផ្តាច់មុខតែម្នាក់ឯង លោកបានបណ្តេញបុគ្គលិកTwitter ចំនួនពាក់កណ្តាលចោល ហើយថែមទាំងបានប្រកាសធ្វើកំណែទម្រង់ថ្មីៗ ដូចជាការដាក់កំហិត ឲ្យអ្នកប្រើប្រាស់ត្រូវបង់ប្រាក់ជាដើម។ ក្រៅពីនេះ លោកអេឡុន មើស្ក៍ បានបើកឲ្យដំណើរការឡើងវិញ នូវគណនីមួយចំនួន ដែលធ្លាប់ត្រូវបានគេព្យួរ ហើយថែមទាំងបានបិទគណនី របស់អ្នកកាសែតជាច្រើននាក់ថែមទៀត។
ភាពក្រអឺតក្រទម និងគំនិតអត្តនោម័តរបស់មហាសេដ្ឋីរូបនេះ បានធ្វើមានការព្រួយបារម្ភផងដែរ ទៅដល់ទីផ្សារភាគហ៊ុន។ ៣ខែមកនេះ តម្លៃភាគហ៊ុនរបស់ Tesla នៅWall Street បានធ្លាក់ថ្លៃចំនួន៥៥% ហើយបើគិតពីពេលដែល លោកអេឡុន មើស្ក៍បានទិញTwitter គឺភាគហ៊ុនរបស់ Tesla បានធ្លាក់ថ្លៃចំនួន៣៣%។ អនាគតរបស់Twitter ក៏មិនសូវជាស្រស់បំព្រងដែរ ព្រោះក្រុមហ៊ុនផ្សព្វផ្សាយពាណិជ្ជកម្មជាច្រើន កំពុងពិចារណាដកខ្លួនចេញពីTwitter៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ