អាមេរិកថា រុស្ស៊ីព្យួរកិច្ចព្រមព្រៀង New Start ជាទង្វើ គ្មានទំនួលខុសត្រូវ
សេចក្តីប្រកាសរបស់រុស្ស៊ី ព្យួរកិច្ចព្រមព្រៀងទ្វេភាគីជាមួយសហរដ្ឋអាមេរិក ស្តីពីការរំសាយអាវុធនុយក្លេអ៊េរNew Start បានជំរុញឱ្យមានប្រតិកម្មជាបន្តបន្ទាប់ ពីសំណាក់ បារាំង អង់គ្លេស អាមេរិក ... ជាសេចក្តីសម្រេចគួរឱ្យសោកស្តាយ និងគ្មានទំនួលខុសត្រូវទេ។ នេះជាប្រសាសន៍របស់ប្រមុខការទូតអាមេរិក លោក អង់តូនី ប្លីងកិន ដោយប្រកាសបើកចំហច្រកចរចាចាំរុស្ស៊ីជានិច្ច។
ចុះផ្សាយនៅថ្ងៃ៖
ស្តាប់ - ០១:៥០
ជាការសម្រេចចិត្តគួរឱ្យសោកស្តាយ និងគ្មានទំនួលខុសត្រូវទេ ប៉ុន្តែសហរដ្ឋអាមេរិកបន្តតាមដានសកម្មភាពជាក់ស្តែងរបស់រុស្ស៊ី យ៉ាងល្អិនល្អន់បំផុត ហើយត្រៀមលក្ខណៈចរចាជាមួយរុស្ស៊ីជុំវិញការកំរិតអាវុធនុយក្លែអ៊ែរ គ្រប់ពេលវេលាទាំងអស់ មិនទាក់ទងនឹងវិបត្តិពិភពលោក ឬ ទំនាក់ទំនងរវាងប្រទេសទាំងពីរទេ។ នេះជាប្រតិកម្មរបស់លោកប្រមុខការទូតអាមេរិក អង់តូនី ប្លីងកិន ក្រោយពីលោកពូទីន បានប្រកាសព្យួរសន្ធិសញ្ញាអាមេរិក-រុស្ស៊ី New Start ស្តីពីការរំសាយអាវុធនុយក្លេអ៊ែរភ្លាម។
ចុះហត្ថលេខានៅឆ្នាំ២០១០ សន្ធិសញ្ញា New Start ជាកិច្ចព្រមព្រៀងទ្វេភាគីចុងក្រោយដែលផ្សារភ្ជាប់ទំនាក់ទំនងសហរដ្ឋអាមេរិក និងរុស្ស៊ី និងមានទិសដៅ កំរិតបរិមាណក្បាលគ្រាប់នុយក្លេអ៊ែរ។ កាលពីខែសីហា២០២២ មូស្គូបានប្រកាសផ្អាកមិនឱ្យក្រុមអធិការកិច្ចអាមេរិកចុះទៅត្រួតពិនិត្យទីតាំងយោធាមានចែងក្នុងកិច្ចព្រមព្រៀងរួចមកហើយ ដោយសំអាងជាចម្លើយតបទៅនឹងសកម្មភាពរារាំងរបស់ក្រុមអធិការកិច្ចរុស្ស៊ីនៅអាមេរិក។
នៅក្នុងសុន្ទរកថា នាព្រឹកថ្ងៃអង្គារទី ២១កុម្ភៈ រយៈពេលមួយម៉ោងនិង៤៥នាទី លោកប្រធានាធិបតីរុស្ស៊ី ពូទីន បានថែមអំពាវនាវឱ្យអាជ្ញាធររុស្ស៊ីត្រៀមលក្ខណៈសាកល្បងនុយក្លេអ៊ែរភ្លាម ប្រសិនបើវ៉ាស៊ីនតោនហ៊ានបាញ់មុន និងប្តេជ្ញាបន្តការវាយលុកលើអ៊ុយក្រែន។
ទន្ទឹមនឹងសេចក្តីប្រកាសរបស់លោកពូទីន ក្រសួងការបរទេសរុស្ស៊ីបានកោះហៅឯកអគ្គរដ្ឋទូតអាមេរិកប្រចាំមូស្គូ មកប្រាប់អំពីការទាមទារឱ្យអាមេរិកដកទ័ពនិងសព្វាវុធអូតង់ (ជំនួយយោធារបស់បស្ចិមលោក) ចេញពីទឹកដីអ៊ុយក្រែន។
សម្រាប់ទីប្រឹក្សាសន្តិសុខជាតិអាមេរិក សំដីបែបប្រឆាំងនឹងក្រុមបស្ចិមលោករបស់លោកពូទីន មិនសមហេតុផលទេ។ ចំណែកប្រមុខអង្គការអូតង់ក៏សម្តែងការសោកស្តាយចំពោះសវិធានការថ្មីរបស់រុស្ស៊ីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ