អាមេរិក អូស្ត្រាលី អង់គ្លេស ប្រកាសជាផ្លូវការនូវសម្ព័ន្ធភាពយុទ្ធសាស្ត្រកងទ័ពតំបន់ឥណ្ឌូប៉ាស៊ីហ្វិក ធ្វើឲ្យចិនខឹងច្រលោត
លោកប្រធានាធិបតីចូ បៃដិន បានប្រកាសជាផ្លូវការ កាលពីថ្ងៃចន្ទម្សិលមិញនៅឯមូលដ្ឋានទ័ពជើងទឹក ក្រុងSan Diego រដ្ឋកាលីហ្វ័រញ៉ា ដោយមានការចូលរួមដោយលោកនាយករដ្ឋមន្ត្រីអង់គ្លេស រីស៊ី ស៊ូណាក់ និងលោកនាយករដ្ឋមន្ត្រីអូស្ត្រាលី អង់តូនី អាល់បាណេស នូវគម្រោងដ៏ធំមួយ ដែលជាការសហការផ្នែកកងទ័ព នៅក្នុងតំបន់ឥណ្ឌូប៉ាស៊ីហ្វិក ជាមួយអូស្ត្រាលី និង អង់គ្លេស តាមរយៈផែនការស្ថាបនាសាងសង់នាវាមុជទឹកបាតសមុទ្ទប្រភេទទំនើបថ្មី។ សម្ព័ន្ធភាពនេះមានឈ្មោះថា AUKUS ដែលនឹងចាប់ផ្តើម ដោយការប្រតិបត្តិការនាវាមុជទឹកបាតសមុទ្ទ នៅតំបន់ឥណ្ឌូប៉ាស៊ីហ្វិក មុននឹងឈានទៅផលិតនាវាមុជទឹកប្រភេទថ្មី ដើរដោយថាមពលនុយក្លែអ៊ែរ។
ចុះផ្សាយនៅថ្ងៃ៖
ស្តាប់ - ០១:១០
ដំណាក់កាលទី១នៃគម្រោងនេះ គឺអាមេរិកនឹងបញ្ជូននាវាមុជទឹកបាតសមុទ្ទ៤គ្រឿង និងអង់គ្លេសបញ្ជូន១គ្រឿង ទៅប្រតិបត្តិការនៅមូលដ្ឋានទ័ពជើងទឹកអូស្ត្រាលី នៅទីក្រុងភើត ចាប់ពីឆ្នាំ២០២៧ទៅ។ ហើយដំណាក់កាលទី២ គឺអូស្ត្រាលីនឹងទិញពីអាមេរិក នូវនាវាមុជទឹកបាតសមុទ្ទដើរដោយថាមពលនុយក្លេអ៊ែរ ប្រភេទថ្នាក់Virginia ចំនួន៣គ្រឿង ជាមួយនឹងជំរើសថែម២គ្រឿងទៀត ប្រសិនអាចទៅរួច ដោយការប្រគល់ឲ្យ នឹងធ្វើនៅរវាងឆ្នាំ២០៣០។ ចំណែកដំណាក់កាលទី៣ និងដ៏សំខាន់បំផុតនោះ គឺការសហការគ្នាទាំង៣នាក់ អាមេរិក អូស្ត្រាលី អង់គ្លេស ក្នុងការសាងសង់នាវាមុជទឹកបាតសមុទ្ទវាយប្រហារ ប្រភេទថ្មី ដែលគេនឹងដាក់ឈ្មោះហៅថា SSN AUKUS។ លោកចូ បៃដិន បានសង្កត់ធ្ងន់ថា នាវាមុជទឹកបាតសមុទ្រដែលគេនឹងសាសង់នេះ ដើរដោយថាមពលនុយក្លេអ៊ែរ តែនឹងមិនបំពាក់ដោយអាវុធនុយក្លេអ៊ែរនោះទេ។
សម្រង់ប្រសាសន៍លោកចូ បៃដិន ប្រកាសចាប់ផ្តើមជាផ្លូវការនូវគម្រោងទី១ នៃសម្ព័ន្ធភាព AUKUS ថ្ងៃទី១៣ មីនា ២០២៣
“ ថ្ងៃនេះ យើងប្រកាសចាប់ផ្តើមអនុវត្តគម្រោងទីមួយ នៃសម្ព័ន្ធភាព AUKUS។ គឺជាគម្រោងសាងសង់នាវាមុជទឹកបាតសមុទ្ទ ដើរដោយថាមពលនុយក្លេអ៊ែរ សម្រាប់អូស្ត្រាលី។ AUKUSមានកម្មវត្ថុធំចំបង គឺពង្រឹងស្ថិរភាពតំបន់ឥណ្ឌូប៉ាស៊ីហ្វិក ជាទីដែលស្ថានភាពអាចប្រែប្រួល យ៉ាងឆាប់រហ័ស។ អ្វីៗទើបតែចាប់ផ្តើមតែប៉ុណ្ណោះ ជាមួយនឹងគម្រោងទី១នេះ។ វានឹងមានសហប្រតិបត្តិការផ្សេងបន្ថែមទៀត ទៅថ្ងៃអនាគត ដើម្បីធ្វើឲ្យកាន់តែមានសន្តិភាពនិងសន្តិសុខ។ បើនិយាយឲ្យសាមញ្ញទៅ គឺថាយើងនឹងត្រៀមខ្លួន ឈរនៅលើជំហរដែលមានកម្លាំង ដើម្បីប្រឈមជាមួយនឹងឧបសគ្គនៅថ្ងៃនេះ និងនៅថ្ងៃអនាគត។ យើងរួមកម្លាំងគ្នា។ ដូច្នេះ ខ្ញុំសូមថ្លែងអំណរគុណជាថ្មីម្តងទៀត ដល់លោកនាយករដ្ឋមន្ត្រី អាល់បាណេស និងលោកនាយករដ្ឋមន្ត្រីស៊ូណាក់។ អ្នកទាំង២ គឺជាមិត្តនិងជាដៃគូដ៏ល្អបំផុត ដែលសហរដ្ឋអាមេរិក ស្រម៉ៃចង់បាន។"
គួរបញ្ជាក់ថា ទោះគេមិនបានបញ្ចេញឈ្មោះ តែកម្រោងសម្ព័ន្ធភាព AUKUS រវាងអាមេរិក អូស្ត្រាលី និងអង់គ្លេសនេះ គឺជាការរួមកម្លាំងគ្នា ទប់ទល់នឹងឥទ្ធិពលវាតទីរបស់ចិន នៅក្នុងតំបន់ឥណ្ឌូប៉ាស៊ីហ្វិក។ សកម្មភាពរបស់កងទ័ពចិននៅក្នុងតំបន់នេះ កំពុងតែធ្វើឲ្យអាមេរិក ជាពិសេសអូស្ត្រាលីតែម្តង ព្រួយបារម្ភជាខ្លាំង ថាវាអាចនឹងបង្កឲ្យបាត់បង់តុល្យភាពសន្តិសុខតំបន់។
ក្រោយការប្រកាសគម្រោងនេះជាផ្លូវការ ចិនដែលដឹងខ្លួន បានប្រតិកម្មឆ្លើយតបវិញភ្លាម។ លោក វ៉ាង វែនពីន អ្នកនាំពាក្យក្រសួងការបរទេសចិន បានលើកឡើងថា៖ “អាមេរិក អូស្ត្រាលី និងអង់គ្លេស កំពុងតែដឹកដៃគ្នាដើរទៅកាន់ផ្លូវខុស និងដ៏គ្រោះថ្នាក់បំផុត ដោយគិតតែពីប្រយោជន៍ភូមិសាស្ត្រនយោបាយរបស់ខ្លួន ហើយមិនខ្វល់ពីការបារម្ភរបស់សហគមន៍អន្តរជាតិទាល់តែសោះ”។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ