អ្នកជំនាញច្រើនរយនាក់រួមគ្នាចេញលិខិតចំហ អំពាវនាវឲ្យផ្អាកការស្រាវជ្រាវលើ “បច្ចេកវិទ្យាបញ្ញាសិប្បនិម្មិត”
ប៉ុន្មានខែចុងក្រោយនេះ ការស្រាវជ្រាវលើបច្ចេកវិទ្យាបញ្ញាសិប្បនិម្មិត បានវិវឌ្ឍន៍យ៉ាងលឿនរហ័ស និងកាន់តែអស្ចារ្យ សឹងតែលើសខួរក្បាលរបស់មនុស្ស។ សន្ទុះប្រកួតប្រជែងគ្នាយ៉ាងខ្លាំងក្លានេះ កំពុងតែបង្កឲ្យមានការព្រួយបារម្ភជាខ្លាំងមកលើមនុស្សជាតិយើង ខណៈបច្ចេកវិទ្យាប្រភេទនេះ អាចត្រូវគេយកទៅប្រើប្រាស់ ដើម្បីបំពុលសង្គម បំភ្លៃប្រឌិតព័ត៌មានក្លែងក្លាយ ឬដោយចេតនាអាក្រក់ណាមួយ។ យ៉ាងណាមិញ ក្រុមអ្នកជំនាញធំៗផ្នែកបច្ចេកវិទ្យាជាច្រើនរយនាក់ បានរួមគ្នាចេញលិខិតចំហមួយ នៅថ្ងៃព្រហស្បតិ៍ទី៣០មីនានេះ អំពាវនាវថា ត្រូវតែផ្អាកការស្រាវជ្រាវលើវិស័យបច្ចេកវិទ្យាបញ្ញាសិប្បនិម្មិតនេះមួយរយៈសិន ដើម្បីយកពេលវេលាទៅគិត និងរៀបចំឲ្យមានលក្ខខណ្ឌគ្រប់គ្រងវាឲ្យបានត្រឹមត្រូវ។
ចុះផ្សាយនៅថ្ងៃ៖
ស្តាប់ - ០៣:២៥
កម្មវិធីបច្ចេកវិទ្យាបញ្ញាសិប្បនិម្មិត ChatGPT 4 បានធ្វើឲ្យផ្អើលពេញពិភពលោក ជាមួយនឹងសមត្ថភាពដ៏ខ្លាំងអស្ចារ្យ អាចធ្វើអ្វីៗបានសឹងតែលើសពីសមត្ថភាពរបស់មនុស្ស។ សន្ទុះនៃការស្រាវជ្រាវ អភិវឌ្ឍន៍បច្ចេកវិទ្យាបញ្ញាសិប្បនិម្មិតនេះ បានកើនល្បឿនយ៉ាងខ្លាំងជាមួយនឹងការប្រកួតប្រជែងគ្នា យកឈ្នះរៀងខ្លួន។ ការវិវឌ្ឍន៍គ្មានព្រំដែននេះ កំពុងតែធ្វើឲ្យមានការព្រួយបារម្ភជាពន់ពេក ព្រោះបច្ចេកវិទ្យានេះ អាចជះឥទ្ធិពលអាក្រក់ដ៏ធ្ងន់ធ្ងរមកលើមនុស្សជាតិយើង។
អ្នកជំនាញបច្ចេកវិទ្យាជាច្រើនរយនាក់ បានរួមគ្នាចុះហត្ថលេខា លើលិខិតចំហមួយ អំពាវនាវថាត្រូវតែផ្អាកការស្រាវជ្រាវទាំងនេះ ចំនួន៦ខែសិន។ លិខិតចំហរ ត្រូវបានចុះផ្សាយនៅលើគេហទំព័រ futureoflife.org មានការចូលរួមចុះហត្ថលេខាពីលោក Elon Musk នាយក Tesla និង SpaceX លោក Yuval Noah Harari អ្នកនិពន្ធសៀវភៅដ៏ល្បីល្បាញឈ្មោះ Sapiens លោក Steve Wozniak ស្ថាបនិកម្នាក់របស់Apple លោក Emad Mostaque អគ្គនាយក Stability AI ព្រមទាំងសមាជិកច្រើននាក់នៃមន្ទីរពិសោធន៍ Google DeepMind និងអ្នកជំនាញ វិស្វករបច្ចេកវិទ្យាបញ្ញាសិប្បនិម្មិតនៅ Microsoft និងនៅសកលវិទ្យាល័យអាមេរិកជាច្រើនសិបនាក់ទៀត។
អ្នកជំនាញធំៗទាំងនេះ បានលើកឡើងថា “សូម្បីតែអ្នកបង្កើតបច្ចេកវិទ្យានេះខ្លួនឯង មិនទាន់ទាំងអាចរកវិធីគ្រប់គ្រងបច្ចេកវិទ្យានេះឲ្យបានផង។ តើយើងអាចបណ្តោយឲ្យបច្ចេកវិទ្យានេះ វាមកផ្សព្វផ្សាយព័ត៌មានបោកប្រាស់ បំពុលសង្គមបានដែរឬទេ? តើយើងអាចបណ្តោយឲ្យបញ្ញាសិប្បនិម្មិតដែលមិនមែនជាមនុស្សនេះ ចូលមកត្រួតត្រាស្មារតីយើង ធ្វើឲ្យមនុស្សយើងអស់ការងារធ្វើ ហើយបាត់បង់អរិយធម៌នៃមនុស្សជាតិដែរឬទេ? ការសម្រេចដ៏ធំធេងនេះ យើងមិនអាចប្រគល់ទៅក្នុងដៃរបស់ក្រុមអ្នកស្រាវជ្រាវបច្ចេកវិទ្យាដែលមិនត្រូវបានប្រជាជន បោះឆ្នោតជ្រើសតាំងនោះឡើយ។”
លិខិតចំហរបានបន្ថែមថា “ត្រូវតែផ្អាក ដើម្បីយកពេលវេលាគិតពិចារណាឲ្យល្អិតល្អន់ ឈានទៅរៀបចំបង្កើតប្រព័ន្ធសន្តិសុខ ដោយមានអាជ្ញាធរមានសមត្ថកិច្ចជាអ្នកត្រួតពិនិត្យតាមដាន បច្ចេកវិទ្យាដ៏គ្រោះថ្នាក់នេះ។ ពិភពលោកត្រូវតែមានយន្តការ ឬវិធីសាស្ត្រដើម្បីអនុញ្ញាតឲ្យមនុស្សយើង អាចបែងចែកថា អ្វីជាការពិត អ្វីដែលជាការប្រឌិតបង្កើតឡើងដោយបច្ចេកវិទ្យាបញ្ញាសិប្បនិម្មិត។ ត្រូវតែបង្កើតឲ្យមានស្ថាប័នមានសមត្ថភាព គ្រប់គ្រងផលវិបាកជាក់ស្តែងបណ្តាលមកពីបច្ចេកវិទ្យានេះ មិនថាមកលើសេដ្ឋកិច្ច សង្គម និងនយោបាយ ជាពិសេសគឺលទ្ធិប្រជាធិបតេយ្យ។"
គួរបញ្ជាក់ថា កាលពីពាក់កណ្តាលខែមីនា ថ្លែងនៅតាមកញ្ចក់ទូរទស្សន៍ ABCNews លោក Sam Altman អគ្គនាយក OpenAI ដែលជាអ្នកបង្កើត ChatGPT បានទទួលស្គាល់ថា បច្ចេកវិទ្យាដែលខ្លួនបានបង្កើតពិតជាគួរឲ្យខ្លាចមែន ប្រសិនបើគេប្រើវាដើម្បីប្រឌិតព័ត៌មានក្នុងទ្រង់ទ្រាយធំ ឬប្រើដើម្បីវាយប្រហារតាមប្រព័ន្ធអ៊ីនធ័រនែត។ ដោយឡែក លោក Yoshua Bengio អ្នកជំនាញបច្ចេកវិទ្យាបញ្ញាសិប្បនិម្មិតកាណាដាដ៏ល្បីម្នាក់ បានលើកឡើងថា ត្រូវតែជជែកពិភាក្សាគ្នាជាលក្ខណៈអន្តរជាតិ លើបច្ចេកវិទ្យានេះ ព្រោះវាជារឿងសកលលោក។ ត្រូវតែរៀបចំយន្តការគ្រប់គ្រងវិស័យបច្ចេកវិទ្យានេះ ឲ្យដូចការគ្រប់គ្រងថាមពលនិងអាវុធនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ