ក្រសួងយុត្តិធម៌អាមេរិកប្តឹងឧទ្ធរណ៍ ចំពោះសាលក្រុមតុលាការរដ្ឋតិចសាស់ ដែលហាមឃាត់ការលក់ថ្នាំគ្រប់រំលូតកូន
នៅសហរដ្ឋអាមេរិក បញ្ហាសិទ្ធិរំលូតកូនរបស់ស្ត្រី កំពុងតែចោទឡើង និងបានដើរថយក្រោយកាន់តែខ្លាំង។ កាលពីថ្ងៃសុក្រទី៧មេសា ចៅក្រមសហព័ន្ធម្នាក់នៅតុលាការរដ្ឋតិចសាស់ បានចេញសាលក្រម បញ្ជាឲ្យទីភ្នាក់ងារឱសថអាមេរិក ត្រូវតែដកអាជ្ញាបណ្ណចែកចាយថ្នាំរំលូតកូន ឈប់ឲ្យចរាចរលក់តទៅទៀត។ ក្រសួងយុត្តិធម៌អាមេរិក បានចេញប្រតិកម្មភ្លាមៗ ដោយបានដាក់ពាក្យប្តឹងឧទ្ធរណ៍ ចំពោះសាលក្រមនេះ ដែលគេចាត់ទុកថា វាជាការរារាំងសិទ្ធិសេរីភាពរបស់ស្ត្រីនៅក្នុងការរំលូតកូន។
ចុះផ្សាយនៅថ្ងៃ៖
ស្តាប់ - ០២:២៩
ពាក្យបណ្តឹង ត្រូវបានដាក់ដោយក្រុមសម្ព័ន្ធ គ្រូពេទ្យនិងអង្គការមួយចំនួនប្រឆាំងនឹងការរំលូតកូន។ នៅក្នុងសាលក្រម កម្រាស់ជាង៦០ទំព័រ លោកចៅក្រម Kacsmaryk នៅតុលាការសហព័ន្ធ រដ្ឋតិចសាស់ បានលើកឡើងថា ថ្នាំគ្រាប់ mifépristone (RU 486) ដែលជាថ្នាំរំលូតកូន អាចបង្កគ្រោះថ្នាក់ដល់សុខភាពធ្ងន់ធ្ងរណាស់។ ចៅក្រមរូបនេះ បានស្តីបន្ទោសទៅលើទីភ្នាក់ងារឱសថអាមេរិក FDA ថាបានអនុញ្ញាតឲ្យចរាចរថ្នាំដ៏គ្រោះថ្នាក់នេះ ដោយគ្មានពិនិត្យឲ្យបានល្អិតល្អន់ និងដោយរងសំពាធនយោបាយ ពីក្រុមអ្នកនិយមបើកសិទ្ធិឲ្យស្ត្រីរំលូតកូន។
សាលក្រមដ៏ចម្រូងចម្រាសនេះ បានបង្កជាព្យុះ រញ្ជួយដល់បណ្តាញព័ត៌មានអាមេរិក តាមរយៈការជជែកវែកញែកតឹងសរសៃក រវាងអ្នកគាំទ្រ និងអ្នកប្រឆាំង។ សាលក្រមនឹងចូលជាធរមាន ក្នុងមួយសប្តាហ៍ទៀត ដើម្បីទុកពេលឲ្យរដ្ឋាភិបាលអាចដាក់ពាក្យប្តឹងឧទ្ធរណ៍។
យ៉ាងណាមិញ លោក Merrick Garland រដ្ឋមន្ត្រីក្រសួងយុត្តិធម៌បានប្រកាសភ្លាមៗ ថារដ្ឋាភិបាលនឹងប្តឹងឧទ្ធរណ៍ រដ្ឋាភិបាលជំទាស់ជាដាច់ខាត ចំពោះអ្វីដែលសាលក្រមនេះបានលើកឡើង។ លោកប្រធានាធិបតី ចូ បៃដិន បានប្រតិកម្មថា សាលក្រមរបស់តុលាការរដ្ឋតិចសាស់នេះ គឺជាការការប៉ុនប៉ងបំផ្លាញសិទ្ធិរំលូតកូនរបស់ស្ត្រី។
នៅក្នុងលិខិតប្រកាសរបស់ខ្លួន ទីភ្នាក់ងារគ្រប់គ្រងឱសថអាមេរិក បានអះអាងថា ជាង២០ឆ្នាំមកហើយ ដែលថ្នាំគ្រាប់នេះ ត្រូវបានអនុញ្ញាតឲ្យចរាចរលើទីផ្សារ ដោយឆ្លងកាត់ការពិនិត្យគុណភាព ប្រសិទ្ធភាព និងផលវិបាកយ៉ាងម៉ដ្ឋចត់បំផុត។ ភស្តុតាងវិទ្យាសាស្ត្រ និងការស្រាវជ្រាវជាច្រើន គឺជាបង្អែកដ៏រឹងមាំមុននឹងមានការអនុញ្ញាតឲ្យចរាចរថ្នាំគ្រាប់រំលូតកូននេះ។
គួរបញ្ជាក់ថា លោកចៅក្រម Matthew Kacsmaryk ត្រូវគេស្គាល់ថា ធ្លាប់ធ្វើជាអ្នកច្បាប់ឲ្យអង្គការសាសនាគ្រិស្តជ្រុលនិយមមួយ នៅរដ្ឋតិចសាស់ មុននឹងត្រូវបានលោកដូណាល់ ត្រាំ តែងតាំងឲ្យធ្វើជាចៅក្រមតុលាការសហព័ន្ធ។
ក្រោយការប្រកាសសាលក្រមដ៏ចម្រូងចម្រាស់នេះ លោកស្រី ណាន់ស៊ី ប៉េឡូស៊ី អតីតប្រធានសភាតំណាងមកពីបក្សប្រជាធិបតេយ្យ បានចាត់ទុកចៅក្រម Kacsmaryk ថាជាចៅក្រុម « ជ្រុលនិយម »។
អង្គភាពដើម្បីផែនការគ្រួសារអាមេរិក Planned Parenthood ដែលគ្រប់គ្រងចាត់ចែងគ្លីនិករំលូតកូនជាច្រើនទីតាំងនៅអាមេរិក បានចាត់ទុកសាលក្រមនេះ ជាគ្រោះថ្នាក់ធំណាស់។ លោកស្រី Alexis McGill Johnson ប្រធានអង្គភាពនេះ លើកឡើងថា គ្រប់ជាន់ថ្នាក់ត្រូវតែរួមគ្នាក្រោកឡើងប្រឆាំងនឹងសាលក្រមបែបនេះ ព្រោះគេមិនអាចទុកឲ្យចៅក្រមម្នាក់ មកបដិសេធភស្តុតាងវិទ្យាសាស្ត្រដ៏រឹងមាំបែបនេះបានទេ។ បើបណ្តោយវានឹងជះឥទ្ធិពលអាក្រក់ ទៅលើរឿងផ្សេងទៀត លើសពីបញ្ហាសិទ្ធិរំលូតកូនរបស់ស្ត្រី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ