OXFAM៖ ប្រទេសក្រីក្រត្រូវការប្រាក់២៧០០០ពាន់លានដុល្លារ ពីនេះដល់ឆ្នាំ២០៣០ ដើម្បីទប់ទល់វិបត្តិអាកាសធាតុ
ពេញមួយសប្តាហ៍នេះ ថ្នាក់ដឹកនាំនិងអ្នកជំនាញហិរញ្ញវត្ថុ នៃធនាគារពិភពលោក និងមូលនិធិរូបិយវត្ថុអន្តរជាតិ ជួបប្រជុំគ្នានៅទីក្រុងវ៉ាស៊ីនតោន ដើម្បីគូសវាសផែនការហិរញ្ញវត្ថុ ជួយប្រទេសក្រីក្រ ដែលប្រឈមខ្លាំងបំផុតនិងវិបត្តិអាកាសធាតុ។ មានការអំពាវនាវជាច្រើន ទាមទារឲ្យស្ថាប័នហិរញ្ញវត្ថុកំពូលទាំង២នេះ ត្រូវធ្វើកំណែទម្រង់ស៊ីជំរៅ ដល់ប្រតិបត្តិការនិងបេសកកម្មរបស់ខ្លួន ដើម្បីឈានទៅពង្រឹងប្រភពហិរញ្ញវត្ថុវិនិយោគក្នុងវិស័យអាកាសធាតុ និងសុខភាពសាធារណៈជាដើម។
ចុះផ្សាយនៅថ្ងៃ៖
ស្តាប់ - ០១:៥៧
ធនាគារពិភពលោក បានអះអាងថា ខ្លួននឹងប្រឹងធ្វើកំណែទម្រង់ ប្រមូលប្រាក់ចំនួន៥០ពាន់លានដុល្លារបន្ថែមទៀត ក្នុងរវាង១០ឆ្នាំ យកទៅផ្តល់កំចីក្នុងវិស័យអាទិភាព សម្រាប់ប្រទេសក្រីក្រ។ តែយ៉ាងណា ទំហំទឹកប្រាក់នេះ ត្រូវបានអ្នកនាំពាក្យអង្គការ Oxfam ចាត់ទុកថា គឺជាដំណក់ទឹកដ៏តូចមួយ ក្នុងមហាសាគរតែប៉ុណ្ណោះ។ យោងតាមរបាយការណ៍របស់អង្គការនេះ ពិភពលោកត្រូវការប្រាក់យ៉ាងហោច ចំនួន ២៧០០០ ពាន់លានដុល្លារ ពីពេលនេះដល់ឆ្នាំ២០៣០ ដើម្បីជួយប្រទេសក្រីក្រ និងប្រទេសមានចំណូលមធ្យម។
សម្រង់ប្រសាសន៍របស់លោក Louis-Nicolas Jandeaux អ្នកនាំពាក្យអង្គការ Oxfam ដែលបានផ្តល់បទសម្ភាសន៍ ឲ្យវិទ្យុRFI ថ្ងៃចន្ទ១០មេសា២០២៣
"នៅពេលយើងនិយាយអំពីតម្រូវការជាក់ស្តែង គឺយើងសំដៅទៅដល់ការចំណាយនានា ដើម្បីប្រឈមនឹងបម្រែបម្រួលអាកាសធាតុ ដែលមានដូចជា ការខាតបង់ ការប៉ះប៉ូវសំណងខូចខាត ការសម្របខ្លួនជួយនឹងវិបត្តិ ការកាត់បន្ថយភាពប្រឈមធ្ងន់ធ្ងរ រួមទាំងកញ្ចប់ថវិកា ចំណាយលើប្រព័ន្ធសុខាភិបាល វិស័យអប់រំ សេវាសន្តិសុខសង្គម និងបញ្ហាបំណុលលើសសមត្ថភាពជាដើម។
បូកផ្សំតួលេខទាំងអស់នេះ គឺយើងត្រូវការប្រាក់ យ៉ាងហោច ២៧០០០ ពាន់លានដុល្លារ ពីពេលនេះ រហូតដល់ឆ្នាំ២០៣០។ ដូច្នេះ ត្រឹមទំហំទឹកប្រាក់ដែលគេប្រកាស ៥០ពាន់លានដុល្លារ ក្នុងរវាង១០ឆ្នាំនោះ គឺវាកំទេចម្ស៉ៅតែប៉ុណ្ណោះ។ យើង អំពាវនាវឲ្យមានការបើកផ្លូវ ឈានទៅ ធ្វើការដោះដូរបំណុលអាកាសធាតុ។ ក្រុមប្រទេសអ្នកមាន ត្រូវតែចេញមុខខ្ចីប្រាក់ចំនួន ១១០០០ ពាន់លានដុល្លារ ពីទីផ្សារហិរញ្ញវត្ថុ ហើយយកប្រាក់នោះមកជួយប្រទេសកំពុងអភិវឌ្ឍន៍ ដើម្បីឲ្យគ្នាអាចរៀបចំគោលនយោបាយ វិធានការប្រឈមនឹងវិបត្តិអាកាសធាតុ។
យើងក៏អាចបើកផ្លូវឲ្យមូលនិធិរូបិយវត្ថុអន្តរជាតិ អាចប្រើសិទ្ធិ បោះពុម្ពសាច់ប្រាក់ ជាពិសេស ដើម្បីចាក់បញ្ចូលក្នុងទីផ្សារយកទៅវិនិយោគលើវិស័យអាកាសធាតុ។ ប្រទេសអ្នកមាន ត្រូវតែចូលរួមបង្កើនថវិកាវិនិយោគដើម្បីការអភិវឌ្ឍន៍នៅតាមប្រទេសក្រីក្រដែរ។ ជាក់ស្តែងបារាំង គិតមកត្រឹមពេលនេះ បារាំងមិនទាន់បានគោរពការសន្យា កាលពី៥០ឆ្នាំមុននោះទេ។ ជម្រើសបង្កើត តារាងអត្រាពន្ធលើទ្រព្យសម្បតិ្ត ដែលអាចប្រែប្រួលឡើងដល់ ៥% ក៏ជាចំណុចមួយគួរពិចារណាដែរ។ និយាយរួម គឺយើងអាចមានជំរើសច្រើនដែលគួរពិចារណា !"
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ