ប្រមុខការទូតរុស្ស៊ីទៅប្រេស៊ីល ខណៈអាមេរិករិះគន់ប្រេស៊ីល ថាកំពុងប្រឹងបន្ទរសំឡេងតាមរុស្ស៊ីនិងចិន
លោកស៊ែរហ្កី ឡាវរ៉ូវ ប្រមុខការទូតរុស្ស៊ីបានទៅដល់រដ្ឋធានីប្រាស៊ីលីយ៉ា កាលពីថ្ងៃចន្ទទិ១៧មេសា ដើម្បីជួបសន្ទនាជាមួយលោកប្រធានាធិបតីលូឡា។ ជាទស្សនកិច្ចដែលបានបង្ហាញអំពីភាពស្អិតរមួត រវាងប្រេស៊ីល និងរុស្ស៊ី ខណៈដែលលោកប្រធានាធិបតីប្រេស៊ីល ទើបតែបានត្រលប់មកពីធ្វើទស្សនកិច្ចនៅចិន។ ទន្ទឹមគ្នានេះដែរ អ្នកនាំពាក្យក្រុមប្រឹក្សាសន្តិសុខជាតិអាមេរិក បានថ្លែងរិះគន់ប្រេស៊ីលថា កំពុងតែប្រឹងបន្ទរសំឡេង តាមរុស្ស៊ីនិងចិនថែមទៀតផង ទាក់ទិននឹងសង្គ្រាមនៅអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:២៦
ពុំមានសេចក្តីប្រកាសជាផ្លូវការ ក្រោយជំនួបរវាងលោកស៊ែរហ្កី ឡាវរ៉ូវ និងលោកប្រធានាធិបតីលូឡាទេ។ តែលោកប្រមុខការទូតរុស្ស៊ី បានថ្លែងក្នុងសន្និសីទកាសែតថា រុស្ស៊ីសូមអរគុណចំពោះប្រេស៊ីល ដែលបានជួយចូលរួម នៅក្នុងការប្រឹងប្រែងរកដំណោះស្រាយ។ លោកឡារ៉ូវ អះអាងថា រុស្ស៊ី និងប្រេស៊ីល មាលគោលជំហរដូចគ្នា គឺការប្តេជ្ញាចិត្តចង់បានឲ្យពិភពលោកនេះ មាន “ពហុចំណុចកណ្តាល” មិនមែនប្រទេសណាមួយខ្លាំងតែម្នាក់ឯង ហើយដើរដាក់សំពាធលើគេគ្រប់គ្នានោះទេ។ លោកប្រមុខការទូតរុស្ស៊ីអះអាងទៀតថា ក្នុងសំណុំរឿងអ៊ុយក្រែន គឺរុស្ស៊ីពិតជាចង់ឲ្យវិបត្តិឆាប់ចប់ តែត្រូវតែមានដំណោះស្រាយស្ថិតស្ថេរ មិនមែនជាដំណោះស្រាយឲ្យរួចតែមួយគ្រានោះឡើយ។
សូមបញ្ជាក់ថា ភាពស្អិតរមួយរវាងប្រេងស៊ីល ជាមួយចិន និងរុស្ស៊ី ត្រូវបានគេសង្កេតឃើញកាន់តែច្បាស់ ក្នុងអំឡុងពេលនេះ។ ក្នុងពេលធ្វើដំណើរត្រលប់ពីទស្សនកិច្ចនៅប៉េកាំង ពេលចុះប្តូរយន្តហោះនៅអេមៀរ៉ាត់អារ៉ាប់រួម លោកលូឡា ប្រធានាធិបតីប្រេស៊ីល បានលើកឡើងថា សហរដ្ឋអាមេរិកនិងសហភាពអឺរ៉ុប ល្មមឈប់នាំគ្នាចូលរួមបន្តធ្វើសង្គ្រាមតទៅទៀតទៅ ហើយត្រូវចាប់គិតជំរុញឲ្យភាគីជម្លោះចូលតុចរចាហើយ។
គួរកត់សំគាល់ថា ពាក្យសំដីរិះគន់ មកលើអាមេរិកនិងអឺរ៉ុប ថាគិតតែពីជំរុញឲ្យអ៊ុយក្រែនបន្តធ្វើសង្គ្រាមនេះ គឺមានខ្លឹមសារដូចអ្វីដែលរដ្ឋាភិបាលរុស្ស៊ី និងចិន បានព្យាយាមស្រែកបន្លឺកន្លងមក។ ចិននិងរុស្ស៊ី ចោទបន្ទោសក្រុមប្រទេសលោកខាងលិច ថាជាអ្នកបន្តធ្វើសង្គ្រាម តាមរយៈការប្រគល់គ្រឿងសព្វាវុធឲ្យអ៊ុយក្រែន។
យ៉ាងណាមិញ ពាក្យសំដីរបស់លោកប្រធានាធិបតីប្រេស៊ីលនេះ ត្រូវបានសេតវិមានអាមេរិករិះគន់ទៅវិញ។ លោក John Kirby អ្នកនាំពាក្យក្រុមប្រឹក្សាសន្តិសុខជាតិអាមេរិក បានបរិហារថា ប្រេស៊ីលកំពុងតែប្រឹងបន្ទរសំឡេងស្រែកតាមរុស្ស៊ីនិងចិន។ អ្នកនាំពាក្យរូបនេះ បន្តទៀតថា ការលើកឡើងរបស់ភាគីប្រេស៊ីល ដែលហៅឲ្យអ៊ុយក្រែនព្រមកាត់ទឹកដីតំបន់គ្រីម៉េទៅឲ្យរុស្ស៊ីដើម្បីបានទទួលសន្តិភាពនោះ វាគឺសម្តីខ្វះការពិចារណាឲ្យបានគ្រប់ជ្រុងជ្រោយ ហើយមិនយល់ពីអង្គហេតុពិតប្រាកដ។
ក្រោយការរិះគន់ពីសំណាក់រដ្ឋាភិបាលអាមេរិកនេះ លោក Mauro Vieira រដ្ឋមន្ត្រីការបរទេសប្រេស៊ីល បានច្រានចោលការចោទប្រកាន់ និងបានលើកឡើងថា ភាគីប្រេស៊ីលមិនយល់ទាល់តែសោះ ថាហេតុអ្វីភាគីអាមេរិក គិតសន្និដ្ឋានដោយខុសឆ្គងបែបនេះ មកលើប្រេស៊ីល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ