លោកដូណាល់ ត្រាំ ត្រូវតុលាការកាត់ឲ្យជាប់ពិរុទ្ធពីការបំពារបំពានផ្លូវភេទ
លោកដូណាល់ ត្រាំ ត្រូវបានគណៈវិនិច្ឆ័យនៃតុលាការញូវយ៉ក សម្រេចឲ្យជាប់ពិរុទ្ធពីការបំពារបំពានផ្លូវភេទ ទៅលើអតីតអ្នកកាសែត Jean Carroll កាលពីឆ្នាំ១៩៩៦កន្លងទៅ ហើយតម្រូវឲ្យបង់លុយ ៥លានដុល្លារ ជាការសងការខូចខាតដល់ជនរងគ្រោះ។
ចុះផ្សាយនៅថ្ងៃ៖
សេចក្តីសម្រេចរបស់តុលាការ ត្រូវបានធ្វើឡើង ក្រោយពីឆ្លងកាត់ដំណើរការជំនុំជម្រះ អស់រយៈពេល ២សប្តាហ៍ ដោយនៅក្នុងនោះ លោកស្រី Jean Carroll ចោទប្រកាន់លោកដូណាល់ ត្រាំ ពីបទរំលោភផ្លូវភេទ និងបរិហារកេរ្តិ៍។ នៅទីបំផុតទៅ គណៈវិនិច្ឆ័យ ដែលមានសមាជិក ៩រូប (ប្រុស ៦នាក់ ស្រី ៣នាក់) បានសម្រេចជាឯកច្ឆន្ទ នៅយប់ថ្ងៃអង្គារ ដោយច្រានចោលការចោទប្រកាន់ពីបទរំលោភផ្លូវភេទ ប៉ុន្តែ សម្រេចឲ្យលោកដូណាល់ ត្រាំ ជាប់ពិរុទ្ធត្រឹមបទបំពារបំពានផ្លូវភេទ និងបរិហារកេរ្តិ៍។ ការបរិហារកេរ្តិ៍ ដែលត្រូវបានធ្វើឡើង ក្រោយពីលោកស្រី Jean Carroll បានទម្លាយពីរឿងលោកដូណាល់ ត្រាំ រំលោភផ្លូវភេទលើលោកស្រី នៅក្នុងសៀវភៅចេញផ្សាយ កាលពីឆ្នាំ២០១៩កន្លងទៅ។
សេចក្តីសម្រេចរបស់តុលាការញូវយ៉ក កាលពីម្សិលមិញនេះ គឺជាសេចក្តីសម្រេច នៅក្នុងសំណុំរឿងរដ្ឋប្បវេណីតែប៉ុណ្ណោះ ដោយលោកដូណាល់ ត្រាំ មិនត្រូវបានចោទប្រកាន់ពីបទព្រហ្មទណ្ឌនោះទេ ដោយសារតែអង្គហេតុបានកើតឡើងតាំងពីឆ្នាំ១៩៩៦ ហើយត្រូវផុតអាជ្ញាយុកាល។
លោកដូណាល់ ត្រាំ ក៏ដូចជាក្រុមការងាររបស់លោក បានបរិហាការរិះគន់សេចក្តីសម្រេចរបស់តុលាការញូវយ៉កថា ជាផ្នែកមួយនៃកិច្ចខិតខំប្រឹងប្រែងរបស់គណបក្សប្រជាធិបតេយ្យ ក្នុងការតាមរុកកួនលោកអតីតប្រធានាធិបតី និងជាបេក្ខជនប្រធានាធិបតីសម្រាប់ការបោះឆ្នោតនៅឆ្នាំ២០២៤ខាងមុខ។ ក្រុមការងាររបស់លោកដូណាល់ ត្រាំ ក៏បានឲ្យដឹងផងដែរថា លោកនឹងប្តឹងឧទ្ធរណ៍ ជំទាស់ទៅនឹងសេចក្តីសម្រេចរបស់តុលាការ កាលពីថ្ងៃអង្គារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ