អាមេរិកអះអាងថាបានរងការវាយប្រហារទ្រង់ទ្រាយធំ ដោយចោរព័ត៌មានវិទ្យារបស់ចិន
អាជ្ញាធរសន្តិសុខព័ត៌មានវិទ្យាអាមេរិក រួមជាមួយកាណាដា អូស្ត្រាលី និងនូវែលហ្សេឡង់ បានចេញលិខិតប្រកាសរួមគ្នា ទាញសញ្ញាអាសន្ន អំពីការវាយប្រហារទ្រង់ទ្រាយធំ របស់ក្រុមចោរព័ត៌មានវិទ្យាមួយក្រុម ដែលគេជឿថា ស្ថិតក្រោមបង្គាប់របស់រដ្ឋាភិបាលចិន។ ក្រុមចោរព័ត៌មានវិទ្យាចិននេះ ចូលទៅពួនសំងំប្រមូលទិន្នន័យ និងអាចវាយប្រហារធ្វើឲ្យរាំងស្ទះប្រព័ន្ធហេដ្ឋារចនាសម្ព័ន្ធចាំបាច់ នៅទូទៅទាំងពិភពលោក។
ចុះផ្សាយនៅថ្ងៃ៖
ស្តាប់ - ០២:២៤
ក្រុមចោរព័ត៌មានវិទ្យាចិនមួយក្រុម ឈ្មោះ Volt Typhoon ត្រូវគេជឿថាគឺជាអ្នកធ្វើសកម្មភាព ចូលមកបន្លំខ្លួន ពួនសំងំនៅតាមប្រព័ន្ធព័ត៌មានវិទ្យាអាមេរិក ដ៏សំខាន់ៗជាច្រើន។ ទីភ្នាក់ងារសន្តិសុខព័ត៌មានវិទ្យាអាមេរិក បានចេញលិខិតរួមគ្នាជាមួយសមភាគី កាណាដា អូស្ត្រាលី នូវែលហ្សេឡង់ ប្រាប់ឲ្យពិភពលោកទាំងមូល មានការប្រុងប្រយ័ត្នខ្ពស់ ព្រោះក្រុមនេះអាចនឹងប្រើបច្ចេកទេសនេះ ដើម្បីវាយប្រហារនៅតាមប្រទេសផ្សេងៗ។ លិខិតនេះ អះអាងថា Volt Typhoon គឺ ជាក្រុមចោរព័ត៌មានវិទ្យា ដែលធ្វើការបំរើឲ្យរដ្ឋាភិបាលចិន។
ដោយឡែក ក្រុមហ៊ុនMicrosoft ក៏បានចេញលិខិតប្រកាសមួយផ្សេងទៀតដែរ ដោយបានអះអាងថា Volt Typhoon បានចេញធ្វើសកម្មភាពតាំងតែពីពាក់កណ្តាលឆ្នាំ២០២១ ដោយបានបន្លំខ្លួន ចូលទៅនៅក្នុងប្រព័ន្ធព័ត៌មានវិទ្យារបស់កោះGuam ជាទីដែលអាមេរិកមានមូលដ្ឋានទ័ពដ៏ធំ ក្នុងតំបន់មហាសមុទ្រប៉ាស៊ីហ្វិក។
Microsoft លើកឡើងថា Volt Typhoon អាចនឹងបើកការវាយប្រហារ ធ្វើឲ្យរាំងស្ទះដល់បណ្តាញទំនាក់ទំនងធំៗ រវាងអាមេរិក ជាមួយនឹងបណ្តាប្រទេសនៅអាស៊ី ក្នុងករណីដែលមានវិបត្តិអន្តរជាតិណាមួយកើតឡើង ទៅថ្ងៃអនាគត។ ក្រុមហ៊ុន ឬវិស័យដែលអាចរងគ្រោះដោយការវាយប្រហារនេះ គឺមានដូចជា វិស័យទូរគមនាគមន៍ ឧស្សាហកម្ម សេវាសាធារណៈ ការដឹកជញ្ជូន វិស័យសមុទ្រ និងបច្ចេកវិទ្យាព័ត៌មានវិទ្យា ព្រមទាំងវិស័យអប់រំជាដើម។ Microsoft អះអាងថា បច្ចេកទេសរបស់ក្រុមចោរ Volt Typhoon គឺជាការពួនសំងំនៅក្នុងប្រព័ន្ធ ដោយគ្មាននរណាដឹង រងចាំឱកាសវាយឆ្មក់។
លោកAlastair McGibbon នាយកយុទ្ធសាស្ត្រនៃក្រុមហ៊ុនសន្តិសុខព័ត៌មានវិទ្យាអូស្ត្រាលី CyberCX បានលើកឡើងថា ល្បិចរបស់ Volt Typhoon គឺមិនខុសពីទាហានឈ្លបតែងខ្លួនបន្លំភ្នែក ហើយមានកាំភ្លើងរងចាំបាញ់នោះឡើយ។ លោកស្រី Jen Easterly នាយកទីភ្នាក់ងារសន្តិសុខព័ត៌មានវិទ្យាអាមេរិក បានអះអាងថា ជាច្រើនឆ្នាំមកហើយ ដែលគេតាមដានដឹងថា ចិនបានធ្វើសកម្មភាពនៅលើប្រព័ន្ធព័ត៌មានវិទ្យា ដើម្បីឈ្លបយកការណ៍ ប្រមូលកម្មសិទ្ធិបញ្ញា និងប្រមូលទិន្នន័យសំខាន់នៅទូទាំងពិភពលោក។ លោកស្រីបន្ថែមថា ការស្រាវជ្រាវ វែកមុខឃើញ Volt Typhoon នាពេលនេះ គឺជារឿងចាំបាច់ណាស់ ដើម្បីប្រាប់ទៅពិភពលោកឲ្យប្រុងប្រយ័ត្ន រកវិធីទប់ស្កាត់ កាត់បន្ថយហានិភ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ