អាមេរិក៖នាវាមុជទឹកទេសចរណ៍ផ្ទុកមនុស្ស ៥នាក់ទៅមើលបំណែកនាវាទីតានិកក្នុងជម្រៅ ៤ ០០០ម៉ែត្របានបាត់ខ្លួន
នៅថ្ងៃអង្គារ ទី២០ មិថុនានេះ កងឆ្មាំសមុទ្រអាមេរិក និងកាណាដាកំពុងបន្តប្រតិបត្តិការស្វែងរកនាវាមុជទឹកទេសចរណ៍មួយឈ្មោះ ទីតាន (Titan )ដែលមានដឹកមនុស្សចំនួន ៥នាក់។ បេសកកម្មរបស់នាវាមុជទឹកទីតាន គឺនាំមនុស្សដែលចង់ចុះទៅមើលបំណែកនាវាទីតានិកនៅក្នុងមហាសមុទ្រអាត្លង់ទិកខាងជើងក្នុងជម្រៅ ៤ ០០០ម៉ែត្រ។ ប្រតិបត្តិការស្វែងរកកំពុងបន្តយ៉ាងសកម្ម ព្រោះនាវាមុជទឹកទីតានមានខ្យល់អុកស៊ីសែនសម្រាប់មនុស្សទាំង ៥នាក់តែពី ៧០ម៉ោងទៅ ៩៦ម៉ោងប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:៣៤
ដំណឹងនៃការបាត់នាវាមុជទឹកទីតានត្រូវបានឧត្តមនាវីទោអាមេរិក John Mauger បញ្ជាក់នៅក្នុងសន្និសីទកាសែតនាថ្ងៃចន្ទ ទី១៩ មិថុនា។ តាមលោក Mauger ការបាត់នាវាមុជទឹកទីតានត្រូវបានក្រុមហ៊ុន OceanGate Expedition ដែលជាម្ចាស់បញ្ជាក់ប្រាប់កងឆ្មាំអាមេរិកនារសៀលថ្ងៃអាទិត្យ ទី១៨ មិថុនា។ ឧត្តមនាវីទោអាមេរិករូបនេះដដែលបានបញ្ជាក់ថា ការស្វែងរកនាវាទីតានបានធ្វើនៅលើផ្ទៃទឹក និងក្នុងមហាសមុទ្រអាត្លង់ទិកខាងជើងក្នុងជម្រៅប្រមាណជា ៤ ០០០ម៉ែត្រ។ គួរបញ្ជាក់ថា អ្នកដែលចង់ជិះនាវាមុជទឹកទីតានទៅមើលបំណែកនាវាទីតានិកនៅបាតសមុទ្រត្រូវចុះហត្ថលេខាទទួលខុសត្រូវខ្លួនឯង និងត្រូវបង់លុយចំនួន ២៥ម៉ឺនដុល្លារ។
នៅពេលពន្លិចខ្លួនចូលក្នុងសមុទ្រ នាវាទីតាននឹងត្រូវបញ្ជាដោយក្រុមការងារនៅខាងលើ ហើយតាមធម្មតា នាវានោះត្រូវផ្តល់សញ្ញានៅរាល់ ១៥នាទីម្តង។ តែបើតាមកងឆ្មាំសមុទ្រអាមេរិក នាវាទីតានបានឈប់ផ្តល់សញ្ញា បន្ទាប់ពីបានពន្លិចខ្លួនចូលក្នុងសមុទ្ររយៈពេល ១ម៉ោង និង ៤៥នាទី។ នៅក្នុងអតីតកាល នាវាទីតានក៏ធ្លាប់បាត់ទំនាក់ទំនងជាមួយក្រុមការងារនៅខាងលើដែរ តែមិនយូរដូចលើកនេះទេ។ ដូច្នេះ វាជាពេលវេលាបន្ទាន់ដើម្បីស្វែងរកនាវាទីតានឲ្យឃើញ ហើយវាកាន់តែបន្ទាន់ខ្លាំងជាងនេះ ព្រោះនៅក្នុងនាវានោះ គឺមានខ្យល់អុកស៊ីសែនសម្រាប់មនុស្សទាំង ៥នាក់តែរយៈពេលពី ៧០ម៉ោងទៅ ៩៦ម៉ោងប៉ុណ្ណោះ។
អាទិភាពមុនគេនៅក្នុងប្រតិបត្តិការរបស់កងឆ្មាំសមុទ្រអាមេរិក និងកាណាដា គឺស្វែងរកឲ្យឃើញនូវទីតាំងរបស់នាវាដើម្បីចុះទៅរំដោះមនុស្សទាំង ៥នាក់ក្នុងនោះ មានម្នាក់ជាអ្នកជំនួញអង់គ្លេសវ័យ ៥៨ឆ្នាំដែលមានទម្លាប់ធ្វើដំណើរផ្សងព្រេងក្នុងសមុទ្រ លើអាកាស ឬនៅក្នុងអវកាស។ មានការលើកឡើងនូវសេណារីយ៉ូចំនួនពីរចំពោះការបាត់នាវាមុជទឹកទីតាន ទី១ មានបញ្ហាអគ្គិសនី ឬឧបករណ៍ទាក់ទង។ ក្នុងករណីនេះ នាវាទីតានអាចងើបឡើងអណ្តែតលើផ្ទៃទឹក ហើយសេណារីយ៉ូទី២ តួនាវាទីតានរងការធ្លុះធ្លាយចូលពេញដោយទឹកសមុទ្រ។ ក្នុងករណីនេះ អ្វីៗត្រូវចប់ ពិសេសជីវិតមនុស្សទាំង ៥នាក់នៅក្នុងនាវាមុជទឹកទីតាននោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ