បំណែកយានទីតាន និងបំណែកសាកសពមនុស្ស ត្រូវបានស្រង់យកមកវិភាគ
ផ្អែកតាមលិខិតប្រកាស របស់ឆ្មាំសមុទ្រអាមេរិក កាលពីថ្ងៃពុធទី២៨មិថុនា គឺគេបានស្រង់យកបំណែករបស់យានទីតានចេញពីក្នុងសមុទ្រហើយ។ នៅក្នុងបំណែកទាំងនេះ ក៏មានផងដែរនូវបំណែកសាកសពមនុស្ស ដែលបានស្លាប់ នៅក្នុងគ្រោះថ្នាកដ៏អកុសលនេះ។ ក្រុមជំនាញ នឹងយកបំណែកយាន ព្រមទាំងបំណែកសាកសពមនុស្ស ទៅសិក្សាវិភាគ ដើម្បីរកឲ្យឃើញពីមូលហេតុពិតប្រាកដ នៃគ្រោះថ្នាក់នេះ
ចុះផ្សាយនៅថ្ងៃ៖
ស្តាប់ - ០២:១៣
លោកកាពីទែន Jason Neubauer ដែលជាប្រធានក្រុមឆ្មាំសមុទ្រអាមេរិក រុករកនាវាទីតាន បានបញ្ជាក់ឲ្យដឹងថា ក្រុមការងារ បានប្រមូលស្រង់ឡើងមកលើ ដោយប្រុងប្រយ័ត្នបំផុត នូវបំណែកនាវាទីតាន ព្រមទាំងបំណែកសាកសពមនុស្សផងដែរ។
បំណែកទាំងនេះ ត្រូវបានប្រមូលយកពីបាតសមុទ្រ អាត្លង់ទិកខាងជើង ក្នុងជម្រៅជិត៤០០០ម៉ែត្រ ត្រង់តំបន់ដែលមានចំងាយប្រមាណ៥០០ម៉ែត្រ ពីបំណែកនាវាទីតានិក។ កាលពីថ្ងៃពុធ ក្រុមជំនាញបាន យកបំណែកដែលស្រង់បាន ទៅកាន់កំពង់ផែ Saint-Jean de Terre Neuve ភាគខាងកើតកាណាដា មុននឹងត្រូវបញ្ជូនតាមនាវាឆ្មាំសមុទ្រអាមេរិក ឆ្ពោះទៅកាន់ទីតាំងវិភាគស្រាវជ្រាវ នៅសហរដ្ឋអាមេរិក។
បណ្តាញព័ត៌មានកាណាដា បានផ្សព្វផ្សាយរូបភាព បង្ហាញឲ្យឃើញបំណែក ដែលគេស្រង់បាន ជាផ្នែកខាងមុខនៃនាវាទីតាន ព្រមទាំងតួខ្លួននៃនាវានេះខ្លះផង។ អ្នកទទួលខុសត្រូវម្នាក់ នៃក្រុមហ៊ុន Pelagic Research Services ដែលទទួលបន្ទុកប្រើយានរ៉ូបូ ចុះទៅរុករកនៅបាតសមុទ្រ បានបញ្ជាក់ថា ការងាររបស់ខ្លួនបានចប់សព្វគ្រប់ហើយ។ ជាការងារដ៏លំបាកបំផុត ដែលក្រុមការងារបានធ្វើ រយៈពេលពេញ២៤ម៉ោង ដោយមិនបានសម្រាក។
សូមរំលឹកថា នាវាមុជទឹកបាតសមុទ្រ ទីតាន ដែលមានរាងមូលទ្រវែង ប្រវែង៦ម៉ែត្រកន្លះ បានចុះទៅបាតសមុទ្រ នៅថ្ងៃទី១៨មិថុនា នាំមនុស្ស៥នាក់ ទៅមើលបំណែកនាវាទីតានិក ដែលបានលិចកាលពីឆ្នាំ១៩១២។ ដំណើរចុះទៅបាតសមុទ្រដែលត្រូវត្រលប់ឡើងមកវិញក្នុងរយៈពេល៧ម៉ោង តែស្រាប់តែនាវាទីតាន បានបាត់ដំណឹងរលកសញ្ញា បន្ទាប់បានចុះទៅបានជិត២ម៉ោង។
ការស៊ើបអង្កេត ត្រូវបានបើកដោយអាជ្ញាធរកាណាដា និងនៅសហរដ្ឋអាមេរិក ដើម្បីកំណត់អំពីមូលហេតុ ដែលបណ្តាលឲ្យនាវាទេសចរណ៍នេះ ផ្ទុះនៅបាតសមុទ្រ។ មានមតិរិះគន់កាន់តែខ្លាំងផងដែរ ទៅលើក្រុមហ៊ុន OceanGate Expeditions ដែលជាម្ចាស់នាវាទីតាន ថាមានការធ្វេសប្រហែសខ្លាំងណាស់។ អតីតអ្នកទទួលខុសត្រូវម្នាក់ នៃក្រុមហ៊ុននេះ ធ្លាប់បានក្រឿនរំលឹកថា បង្អួចកញ្ចក់តែមួយរបស់នាវានេះ មិនត្រូវបានស្ថាបនាឡើង ដើម្បីអាចទប់កម្លាំងសម្ពាធដ៏ខ្លាំងនៅបាតសមុទ្របានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ