បើគ្មានប្រែប្រួលអាកាសធាតុ ក៏គ្មានសីតុណ្ហភាពក្តៅជាង៥០អង្សានៅអាមេរិក ឬជាង៤០អង្សានៅអេស្ប៉ាញ
នៅថ្ងៃអង្គារ៍ ទី២៥កក្កដា បណ្តាញក្រុមអ្នកវិទ្យាសាស្រ្តឈ្មោះ WWA - World Weather Attribution បានបញ្ជាក់ថា បើគ្មានការប្រែប្រួលអាកាសធាតុទេ ម្ល៉េះក៏គ្មានសីតុណ្ហភាពឡើងដល់ជាង ៥០អង្សានៅអាមេរិក ឬជាង ៤០អង្សា នៅអេស្ប៉ាញដែរ។ ក្រុមអ្នកវិទ្យាសាស្រ្តនេះ ផ្តុំដោយអ្នកជំនាញជាតិអាមេរិក អង់គ្លេស និងហូឡង់ បានលើកឡើងទៀតថា ចាប់អំពីអំណឺះតទៅ រលកកម្តៅក្តៅខ្លាំង នឹងកាត់តែបន្តកើតមាន កាន់តែញឹកញាប់ និងរយៈពេលក្តៅកាន់តែយូរ ជាងពីលើកមុនៗ។
ចុះផ្សាយនៅថ្ងៃ៖
ក្នុងរដូវក្តៅឆ្នាំនេះ ស៊ីតុណ្ហភាពក្តៅឡើងខ្លាំងជាងសព្វដង។ សហរដ្ឋអាមេរិក បានជួបកម្តៅក្តៅខ្លាំង ជាង ៥០អង្សា នៅជ្រលងភ្នំមរណៈ។ កម្តៅ ប្រមាណ ៤៥,៣ ក្តៅខ្លាំងជាប្រវត្តិសាស្ត្រ នៅក្រុង Phoenixរបស់អាមេរិក ហើយក្តៅបំផុតមិនធ្លាប់ជួបនៅតំបន់ Catalogne របស់អេស្ប៉ាញ់ ប្រមាណ ៤៣ អង្សាសេ។
បាតុភូតកម្តៅក្តៅខ្លាំងនេះ ដចេញពីការប្រែប្រួលអាកាសធាតុ ដែលវាកាន់តែបញ្ចេញឫទ្ធានុភាពរបស់វា។ បើតាមក្រុមអ្នកវិទ្យាសាស្រ្តWWA ការប្រែប្រួលអាកាសធាតុ កើតចេញពីការបញ្ចេញផ្សែងពុលក្នុងឧស្សាហកម្មនិងកើតចេញពីសកម្មភាពរបស់មនុស្ស ដែលវាបានជំរុញធ្វើឲ្យរលកកម្តៅកាន់តែក្តៅខ្លាំង និងមានរយៈពេលយូរ ព្រមទាំង កើតមានញឹកញយ។
ក្នុងកក្កដានេះ បណ្តាញក្រុមអ្នកវិទ្យាសាស្រ្តWWA បានតាមដានសង្កេតទិន្នន័យរលកកម្តៅនៅក្នុងប្រទេសឧស្សាហកម្មធំៗ និងបានអះអាងថា ប្រសិនបើជាគ្មានកែប្រែប្រួលអាកាសធាតុទេ ក៏គ្មានរលកកម្តៅក្តៅខ្លាំងបែបនេះ កើតមានទៅរួចដែរ។ ក្រុមអ្នកវិទ្យាសាស្រ្ត ផ្តុំដោយជនជាតិអាមេរិក អង់គ្លេស និងហូឡង់ បានពិនិត្យទិន្នន័យកម្តៅសីតុណ្ហភាពដ៏គ្រោះថ្នាក់ខ្លាំង ចន្លោះថ្ងៃទី ១២-១៨កក្កដា នៅអឺរ៉ុបខាងត្បូង ពីថ្ងៃទី១ដល់ទី១៨កក្កដា នៅសហរដ្ឋអាមេរិក នៅក្នុងរដ្ឋតិចសាស់ និងប៉ែកជើងខាងម៉ិចស៊ិក ហើយព្រមទាំង ពីថ្ងៃទី៥ដល់ទី១៨កក្កដា នៅប្រទេសចិន។
ស្រដៀងគ្នានឹងអ្នកវិទ្យាសាស្រ្តWWAដែរ ក្រុមអ្នកវិទ្យាសាស្ត្រអាមេរិក Nasa និងអ្នកវិទ្យាសាស្ត្រអឺរ៉ុប Copernicus បានទាញសន្និដ្ឋានថា ខែកក្កដាឆ្នាំ២០២៣នេះ ជាខែក្តៅខ្លាំងបំផុត និងក្តៅខ្លាំងជាងគេនៅក្នុងប្រវត្តិរដូវក្តៅ នៃខែកក្កដា។
សីតុណ្ហភាពក្តៅខ្លាំង ធ្វើឲ្យឆេះព្រៃច្រើនកន្លែងនៅអឺរ៉ុបនិងប្រទេសផ្សេងទៀត។ ជាក់ស្តែង នៅក្រិក សីតុណ្ហភាព ជាង ៤០ អង្សា បណ្តាលឲ្យឆេះព្រៃ ប្រមាណជិត ៥០ កន្លែង។ នៅអាល់ហ្សេរី អតីតដែនដីក្រោមចំណុះបារាំង កម្តៅក្តៅខ្លាំងតាំងពីថ្ងៃអាទិត្យ បង្កការឆេះព្រៃ ជិត ១០០ កន្លែង និងសម្លាប់ផ្តាច់អាយុជីវិតមនុស្ស ៣៤ នាក់ ហើយច្រើនរយពាន់នាក់ រត់រកទីជម្រកសុវត្ថិភាព។ នេះបើតាមក្រសួងមហាផ្ទៃអាល់ហ្សេរី។ ចំណែក នៅ ទុយនេស៊ី កម្តៅក៏ឡើងដល់ ៤៩ អង្សាឯណោះ។
អ្នកជំនាញអាកាសធាតុជាតិអង់គ្លេស អ្នកស្រី Friederike Otto បានប្រកាសអាសន្នឲ្យថ្នាក់ដឹកនាំពិភពលោក យកចិត្តទុកដាក់ កាត់បន្ថយការបញ្ចេញផ្សែងពុល និងជួយទប់ស្កាត់ការប្រែប្រួលអាកាសធាតុជាបន្ទាន់។ ហើយបើគេនៅតែបណ្តែតបណ្តោយតទៀត នោះ អាយុជីវិតមនុស្សរាប់ពាន់លាននាក់នឹងស្លាប់។ អ្នកស្រី ក៏សង្ឈឹមថា កិច្ចប្រជុំកំពូលអាកាសធាតុនៅក្រុងឌូប៉ៃ នាចុងឆ្នាំនេះ នឹងសម្រេចបានច្បាប់អន្តរជាតិថ្មី ស្តីពីការលុបបំបាត់ការបញ្ចេញផ្សែងពុល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ