ប្រជាជនអេក្វាទ័របោះឆ្នោតប្រជាមតិ សម្រេចបិទអណ្តូងប្រេងកាតនៅតំបន់ព្រៃអភិរក្សយ៉ាស៊ូនី
អស់រយៈពេល១០ឆ្នាំមកហើយ ដែលក្រុមអង្គការបរិស្ថាន បានទាមទារឲ្យមានការបោះឆ្នោតប្រជាមតិ ដើម្បីឲ្យពលរដ្ឋអេក្វាទ័រ សម្រេចបន្ដដំណើរការឬបិទ អណ្តូងជីងខួងយករ៉ែប្រេងកាត នៅក្នុងតំបន់ព្រៃអភិរក្ស យ៉ាស៊ូនី (Yasuni) ស្ថិតក្នុងតំបន់ព្រៃអាម៉ាហ្សូន។ ទីបំផុត តុលាការកំពូលអេក្វាទ័របានសម្រេចកាលពីខែឧសភា កំណត់ឲ្យមានការបោះឆ្នោតប្រជាមតិនេះ ហើយដែលវាបានប្រព្រឹត្តិធ្វើទៅ ស្របពេលជាមួយគ្នានឹងការបោះឆ្នោតសភាមុនអាណត្តិ កាលពីថ្ងៃអាទិត្យ ទី២០សីហា។ លទ្ធផលបានបង្ហាញថា ប្រជាជនអេក្វាទ័រប្រមាណ៥៩% បានគាំទ្រ ឲ្យបិទសកម្មភាពជីងខួងយករ៉ែប្រេងកាត នៅតំបន់ព្រៃអភិរក្សយ៉ាស៊ូនី។
ចុះផ្សាយនៅថ្ងៃ៖
ស្តាប់ - ០៣:១៩
សម្ព័ន្ធអង្គការ Yasunidos Amazon Frontlines និង Alianza Ceibo ដែលជាអ្នកផ្តួចផ្តើមគំនិតប្រជាមតិនេះ បានថ្លែងអបអរនៅក្នុងលិខិតប្រកាសរួមគ្នាមួយ ថានេះគឺជាលើកទី១ហើយ ដែលប្រទេសមួយបានបោះឆ្នោតសម្រេចការពារអាយុជីវិត ដោយសុខចិត្តទុកប្រេងកាតកប់នៅក្នុងដី។ លិខិតបន្តថា វាគឺជាជោគជ័យដ៏ធំ ជាគម្រូមួយដ៏ប្រសើរសម្រាប់ប្រទេសឯទៀត ដែលពលរដ្ឋរួមគ្នាប្រើប្រាស់លទ្ធិប្រជាធិបតេយ្យ អំណាចសំឡេងឆ្នោតដោយផ្ទាល់ ដើម្បីសម្រេចការពារអាយុជីវិត ការរស់នៅរបស់សហគមន៍ជនជាតិដើមភាគតិច ការពារព្រៃត្រូពិក ធនធានធម្មជាតិ ប្រព័ន្ធជីវចម្រុះ ព្រមទាំងឈានទៅកំណត់គោលនយោបាយ ដោះស្រាយវិបត្តិអាកាសធាតុ។
សូមបញ្ជាក់ថា តំបន់ព្រៃអភិរក្សយ៉ាស៊ូនី មានទំហំប្រមាណ១លានហិកតា ស្ថិតនៅក្នុងតំបន់ព្រៃអាម៉ាហ្សូន គឺជាតំបន់ព្រៃធម្មជាតិដ៏សំបូរបែប។ តំបន់នេះ ក៏គឺជាជម្រកដែនដីរស់នៅ នៃសហគមន៍ជនជាតិដើមភាគតិចជាច្រើនក្រុម មានដូចជាក្រុមជនជាតិ Waorani ជនជាតិ Kichwa ជនជាតិ Tagaeri ជនជាតិTraromenane និង ជនជាតិ Dugakaeri ដែលក្រុមជនជាតិដើមទាំងនេះ បានសម្រេចចិត្តរស់នៅឆ្ងាយពីអរិយធម៌ទំនើប។
គួរបញ្ជាក់ដែរថា ការធ្វើប្រជាមតិបិទអណ្តូងរ៉ែប្រេងកាតក្នុងព្រៃយ៉ាស៊ូនីនេះ គឺពាក់ព័ន្ធនឹងអណ្តូងរ៉ែចំនួន៣កន្លែង ដែលគេស្គាល់ជាទូទៅថា តំបន់អណ្តូងរ៉ែ Bloc 43។ ក្នុងចំណោមប្រេងកាតផលិតដោយប្រទេសអេក្វាទ័រ ចំនួនប្រមាណ៥សែនធុងបារីលក្នុងមួយថ្ងៃ គឺមានប្រមាណ១២% ដែលបូមចេញពីតំបន់ Bloc 43។ មានន័យថា នៅតែមានអណ្តូងប្រេងកាតផ្សេងទៀត ដែលនឹងបន្តដំណើរការនៅអេក្វាទ័រ។
សូមរំលឹកថា ក្រុមហ៊ុនប្រេងជាតិប្រេងកាត Petroecuador ដែលជាអ្នកធ្វើសកម្មភាពជីកខួង មានសិទ្ធប្រតិបត្តិការ លើផ្ទៃដីចំនួន៣០០ហិកតា នៅក្នុងតំបន់ព្រៃអភិរក្សយ៉ាស៊ូនី។ តែកន្លងមកក្រុមហ៊ុននេះ អះអាងថាខ្លួនធ្វើសកម្មភាព បានត្រឹមតែ លើផ្ទៃដី៨០ហិកតាប៉ុណ្ណោះ។ យោងតាមលិខិតប្រកាសចេញផ្សាយថ្ងៃចន្ទទី២១សីហា ក្រុមហ៊ុននេះ បានអះអាងថា ខ្លួននឹងគោរពលទ្ធផលប្រជាមតិ ដែលជាការសម្រេចចិត្តរបស់ពលរដ្ឋអេក្វទ័រ។ ដោយឡែក ផ្អែកតាមរដ្ឋាភិបាលអេក្វាទ័រ ដែលតែងតែប្រឆាំងនឹងការធ្វើប្រជាមតិនេះ គឺការបិទអណ្តូងរ៉ែប្រេងកាត Bloc 43 នឹងធ្វើឲ្យរដ្ឋបាត់បង់ប្រាក់ចំណូល ជាង១៦ពាន់លានដុល្លារ ក្នុងរយៈពេល២០ឆ្នាំទៅមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ