ដោយសារវិបត្តិរាំងស្ងួត ព្រែកជីកប៉ាណាម៉ា នឹងកាត់បន្ថយចំនួនឆ្លងកាត់នាវាដឹកទំនិញ រយៈពេល១ឆ្នាំ
ចំនួននាវាដឹកទំនិញ ដែលត្រូវឆ្លងកាត់ព្រែកជីកប៉ាណាម៉ា រវាងមហាសមុទ្រប៉ាស៊ីហ្វិក និងមហាសមុទ្រអាត្លង់ទិក នឹងត្រូវកាត់បន្ថយ ដោយសារតែបញ្ហារាំងស្ងួត គ្មានទឹកគ្រប់គ្រាន់។ ផ្អែកតាមអាជ្ញាធរគ្រប់គ្រងព្រែកជីកប៉ាណាម៉ា ការរិតត្បិតនេះ នឹងមានរយៈពេលមួយឆ្នាំ លើកលែងតែ រវាងប៉ុន្មានខែខាងមុខ កម្រិតទឹកភ្លៀងនឹងធ្លាក់ខ្លាំងមកវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៣
លោកស្រី Ilya Espino ទេសាភិបាលរងនៃព្រែកជីកប៉ាណាម៉ា បានបញ្ជាក់ថា ការកាត់បន្ថយចំនួននាវាឆ្លងកាត់ ត្រូវបានធ្វើសាកល្បង ចាប់ពីថ្ងៃទី៣០កក្កដា។ ជាធម្មតា ពីមុនមាននាវាឆ្លងកាត់ចំនួន៤០គ្រឿងក្នុងមួយថ្ងៃ តែត្រូវកាត់បន្ថយមកនៅត្រឹមតែ៣២គ្រឿងក្នុងមួយថ្ងៃវិញ។ ដោយស្ថានការណ៍រាំងស្ងួត គ្មានទឹកគ្រប់គ្រាន់ អាជ្ញាធរបានសម្រេចបន្តវិធានការនេះ រយៈពេលមួយឆ្នាំតែម្តង ចាប់ពីពេលនេះទៅ។ តែយ៉ាងណា អាជ្ញារគ្រប់គ្រងព្រែកជីក អាចនឹងកែប្រែវិញ ប្រសិនបើនៅខែតុលា ខែវិច្ឆិកាខាងមុខ មានភ្លៀងធ្លាក់ច្រើន អាចបំពេញបឹងធំៗ ដែលព្រែកជីកប្រើប្រាស់ទឹក យកមកចម្លងនាវាដឹកទំនិញ។
លោកស្រីទេសាភិបាលរង នៃព្រែកជីកប៉ាណាម៉ា បានបន្ថែមថា ការប្រកាសដំណឹងនេះ គឺដើម្បីប្រាប់ទៅបណ្តាក្រុមហ៊ុនដឹកទំនិញទាំងអស់ ឲ្យរៀបចំកាលវិភាគធ្វើដំណើររបស់ខ្លួន ដោយឆ្លើយតបទៅនឹងលក្ខខណ្ឌលំបាកថ្មីនេះ ព្រោះវាគឺជាផលវិបាក នៃបម្រែបម្រួលអាកាសធាតុ គ្រោះរាំងស្ងួត បូកផ្សំនឹងបាតុភូត El niño។
គួរកត់សំគាល់ថា ការកាត់បន្ថយចំនួនឆ្លងកាត់របស់នាវាដឹកទំនិញ បានធ្វើឲ្យកកស្ទះជាខ្លាំងនៅមាត់ច្រកចូលទាំងសងខាង នៃព្រែកជីកប៉ាណាម៉ា។ កាលពីថ្ងៃព្រហស្បតិ៍កន្លងទៅ មាននាវាបន្តកន្ទុយគ្នារងចាំឆ្លង ដល់ទៅ១៣០គ្រឿង។ ពេលវេលារងចាំឆ្លងរបស់នាវានីមួយៗ កាលពីមុនមានត្រឹមតែជាមធ្យមពី៣ទៅ៥ថ្ងៃ បានឡើងដល់ទៅ១៩ថ្ងៃ ក្នុងរវាងខែសីហានេះ។
សូមបញ្ជាក់ថា ព្រែកជីកប៉ាណាម៉ា គឺជាច្រកផ្លូវឆ្លងកាត់ដ៏សំខាន់នៃចរាចរណ៍ដឹកទំនិញពិភពលោក ព្រោះវាអនុញ្ញាតឲ្យនាវាដឹកទំនិញអាចឆ្លងរវាងមហាសមុទ្រអាត្លង់ទិក និងមហាសមុទ្រប៉ាស៊ីហ្វិក ដោយមិនចាំបាច់បើកវាងតាមទ្វីបអាមេរិកខាងត្បូង។ ៦%នៃពាណិជ្ជកម្មផ្លូវសមុទ្រពិភពលោក ឆ្លងកាត់ព្រែកជីកដែលមានប្រវែង៨០គីឡូម៉ែត្រនេះ។ ភាគច្រើនបំផុតនៃនាវាដឹកទំនិញឆ្លងកាត់ គឺជារបស់ចិន សហរដ្ឋអាមេរិក និងជប៉ុន។
ដើម្បីអាចចម្លងបណ្តែតនាវាតាមព្រែកជីកនេះបាន គឺគេត្រូវបានការប្រើទឹកយ៉ាងច្រើន ចាក់បំពេញទៅក្នុងអាងទឹកដ៏ធំមហិមា ដែលមានកំពស់ទឹក២៦ម៉ែត្រ ខ្ពស់ជាងកំពង់ទឹកសមុទ្រ ទើបអាចនាំនាវាដឹកទំនិញឲ្យឆ្លងផុតតំបន់ភ្នំ Isthme នៃប្រទេសប៉ាណាម៉ា។ សម្រាប់នាវា១គ្រឿង គេត្រូវការចំណាយប្រើទឹកចំនួន ២០០លានលីត្រ ដែលបានមកពីទឹកបឹងធំៗ២ ដែលគេធ្វើទំនប់ទប់ គឺបឹង Gatun និងបឹង Alajuela។ ដោយសារភ្លៀងធ្លាក់កាន់តែតិចទៅៗ ទឹកបឹងបានថយកំពស់ជាខ្លាំង ដែលតម្រូវឲ្យអាជ្ញាធរគ្រប់គ្រងព្រែកជីក ត្រូវតែរកដំណោះស្រាយសន្សំសំចៃទឹក។ មិនត្រឹមតែប៉ុណ្ណោះ ប្រមាណពាក់កណ្តាលនៃប្រជាជនប៉ាណាប៉ា ទាំង៤លាន២សែននាក់ រំពឹងលើទឹកបឹងទាំងនេះ ដើម្បីបរិភោគនឹងប្រើប្រាស់ប្រចាំថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ