បាញ់រះនៅក្រុងLewiston សហរដ្ឋអាមេរិក ស្លាប់យ៉ាងហោច២២នាក់ របួសជាង៥០នាក់
នៅសហរដ្ឋអាមេរិក មានករណីបាញ់រះមួយទៀតបានកើតឡើង កាលពីយប់ថ្ងៃពុធ ទី២៥តុលា ដែលបានបណ្តាលឲ្យស្លាប់មនុស្សយ៉ាងហោច២២នាក់ និងរបួសជាង៥០នាក់។ គិតត្រឹមព្រឹកថ្ងៃព្រហស្បតិ៍ ទី២៦តុលា ជនដៃដល់កំពុងតែរត់គេចខ្លួននៅឡើយ ដោយសមត្ថកិច្ចអាមេរិក កំពុងតែបើកប្រតិបត្តិការតាមចាប់ យ៉ាងសកម្មបំផុត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៤៦
ហេតុការណ៍បាញ់រះបានកើតឡើង នៅក្នុងទីក្រុង Lewiston ក្នុងរដ្ឋMaine ភាគឦសានសហរដ្ឋអាមេរិក ដោយជនដៃដល់ បានចូលទៅបាញ់រះ នៅក្នុងទីតាំងចំនួនយ៉ាងហោច២កន្លែង គឺនៅក្នុងកន្លែងកម្សាន្តលេងប៊ូលីងមួយកន្លែង និងនៅក្នុងភោជនីយដ្ឋានមួយកន្លែង។ ដោយឡែក បណ្តាញព័ត៌មានអាមេរិកបានផ្សាយថា មានករណីបាញ់រះមួយទៀតនៅវេលាយប់ថ្ងៃពុធដែរ នៅទីតាំងឃ្លាំងទំនិញមួយកន្លែង។ តែយ៉ាងណា គេមិនទាន់អាចបញ្ជាក់បានទេ ថាជាស្នាដៃរបស់ជនដៃដល់តែមួយ ឬជាករណីដាច់ដោយឡែក។
ផ្អែកតាមសមត្ថកិច្ចនគរបាល គឺជនដៃដល់ ភេទប្រុស ត្រូវគេស្គាល់ថា ឈ្មោះ Robert Card អាយុ៤០ឆ្នាំ។ នៅក្នុងរូបភាព ថតបានដោយកាម៉េរ៉ាសុវត្ថិភាព គេឃើញជននេះ បាក់អាវពណ៌ត្នោត ស្លៀកខោពណ៌ខៀវក្រម៉ៅ បានប្រើប្រាស់កាំភ្លើងពាក់កណ្តាលស្វ័យប្រវត្តិ បាញ់រះទៅលើមនុស្សដោយឥតរើសមុខ មុននឹងបានគេចខ្លួនបាត់។
ទូរទស្សន៍CNN ដែលបានស្រង់ប្រភពពីសមត្ថកិច្ចនគរបាល បានផ្សាយថា ជនដៃដល់ គឺជាទាហានបំរុង ហើយមានជំនាញជាគ្រូបង្រៀនហាត់បាញ់កាំភ្លើងថែមទៀតផង។ ហើយផ្អែកតាមប្រភពខ្លះទៀត បានអះអាងថា ជនដៃដល់នេះ ធ្លាប់ត្រូវបានបញ្ជូនទៅព្យាបាលនៅមន្ទីរពេទ្យ ដោយសារតែមានជំងឺផ្លូវចិត្ត ចេះតែឮសំឡេងអ្វីម្យ៉ាងនិយាយនៅក្នុងត្រចៀក។
ពេញមួយយប់ថ្ងៃពុធ ទី២៥តុលា សមត្ថកិច្ចនគរបាលតំបន់ជាច្រើនរយនាក់ ដោយសហការជាមួយសមត្ថកិច្ចFBI ផង បានបើកប្រតិបត្តិការតាមរកជនដៃដល់ យ៉ាងសកម្មបំផុត ពេញក្នុងរដ្ឋMaine ។ អាជ្ញាធរនគរបាលបានផ្សព្វផ្សាយរូបថតជនដៃដល់ និងរូបថតរថយន្តរបស់ជននេះ ដើម្បីឲ្យប្រជាជនមានការប្រុងប្រយ័ត្ន និងរាយការណ៍មកសមត្ថកិច្ច ប្រសិនបើបានប្រទះឃើញ។ ជាមួយគ្នានេះដែរ អាជ្ញាធរបានជូនដំណឹង ទៅដល់ប្រជាជននៅតាមតំបន់ជាច្រើន ឲ្យសំងំនៅក្នុងផ្ទះ កុំចេញក្រៅ ហើយនៅថ្ងៃព្រហស្បតិ៍ សាលារៀនទាំងអស់នៅក្រុងLewiston ត្រូវបិទទ្វារជាបណ្តោះអាសន្នសិន ដើម្បីបង្ការសុវត្ថិភាព។
លោក Robert McCarthy តំណាងរាស្ត្រម្នាក់ប្រចាំនៅក្រុង Lewiston ដែលមានប្រជាជនប្រមាណតែ ៣៦០០០នាក់ បានថ្លែងថា អ្នករបួសមានចំនួន ចន្លោះពី៥០ ទៅ៦០នាក់ ។ ពោលគឺជាចំនួនច្រើនណាស់ ដែលមន្ទីរពេទ្យនៅទីក្រុងនេះ មិនអាចមានលទ្ធភាពសង្គ្រោះបានទេ។ ដោយឡែក លោក Mike Sauschuck មន្ត្រីទទួលបន្ទុកសន្តិសុខសាធារណៈប្រចាំតំបន់ បានបដិសេធមិនទាន់បញ្ជាក់ អំពីចំនួនមនុស្សស្លាប់និងរបួសទេ ដោយលើកឡើងថាតួលេខអាចប្រែប្រួល។ ផ្អែកតាមសេតវិមាន លោកប្រធានាធិបតីចូ បៃដិន បានទូរស័ព្ទទៅនិយាយជាមួយថ្នាក់ដឹកនាំជាច្រើននាក់ ប្រចាំនៅរដ្ឋMaine និងបានធានាថារដ្ឋសហព័ន្ធ នឹងសហការជួយគ្រប់តម្រូវការចាំបាច់ទាំងអស់។
គួរបញ្ជាក់ថា យោងតាមតួលេខ របស់សមាគម Gun Violence Archive (GVA) គិតពីដើមឆ្នាំ២០២៣មក នៅសហរដ្ឋអាមេរិក មានមនុស្សស្លាប់ចំនួនយ៉ាងហោច ១៥០០០នាក់ ដោយសារតែអំពើហិង្សាប្រើប្រាស់កាំភ្លើង ដោយមិនរាប់ករណីធ្វើអត្តឃាតទេ។ ករណីបាញ់រះ តែងតែកើតឡើងជាប្រចាំ ហើយជារៀងរាល់លើក វាបានបង្កឲ្យមានការតវ៉ាទាមទារ ថាសហរដ្ឋអាមេរិកត្រូវតែរឹតបន្តឹងច្បាប់ ដើម្បីគ្រប់គ្រងចរាចរណ៍អាវុធឲ្យបានតឹងតែបំផុត។ តែយ៉ាងណា សភាខុនហ្ក្រេសអាមេរិក នៅតែមិនអាចអនុម័តច្បាប់តឹងតែងបាន ដោយសារតែសមាជិកសភាស្តាំនិយមច្រើននាក់ ស្ថិតនៅក្រោមឥទ្ធិពលដ៏ខ្លាំងរបស់ក្រុមឡុបប៊ីអាវុធ National Rifle Association (NRA)។ សម្រាប់ប្រជាជនអាមេរិកខ្លះ សិទ្ធិកាន់កាប់អាវុធ គឺជាសិទ្ធិការពារខ្លួនជាមូលដ្ឋាន ដែលត្រូវបានការពារដោយរដ្ឋធម្មនុញ្ញសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ