អាមេរិក៖ លោក Mike Johnson ជាប់ឆ្នោត ជាប្រធានសភាតំណាង (Speaker)
សមាជិកសភាតំណាងអាមេរិក បានបោះឆ្នោតកាលពីថ្ងៃទី២៥តុលា ជ្រើសរើសលោក Mike Johnson ឲ្យកាន់មុខតំណែងប្រធានសភាតំណាង បន្ទាប់ពីស្ថាប័នកំពូលនេះ គ្មានប្រធានអស់រយៈពេល២២ថ្ងៃ ក្រោយលោក Kevin McCarthy ត្រូវក្រុមសមាជិកបក្សសាធារណរដ្ឋគ្នាឯង បោះឆ្នោតទម្លាក់។
ចុះផ្សាយនៅថ្ងៃ៖
ស្តាប់ - ០៣:០៣
លោក Mike Johnson ត្រូវគេស្គាល់ថា គឺជាសមាជិកសភាបក្សសាធារណរដ្ឋ ដែលមានទំនោរស្និទ្ធនឹងលោកក្រុមគាំទ្រលោកដូណាល់ ត្រាំ។ មានអាយុ៥១ឆ្នាំ លោកគឺជាមេធាវី និងបានជាប់ឆ្នោតជាសមាជិកសភាតំណាង នៅឆ្នាំ២០១៧ ជាមួយនឹងទំនោរនយោបាយ ស្តាំអភិរក្សនិយមខ្លាំងបំផុត។ ការពិតទៅ លោក Mike Johnson ស្ថិតនៅលេងរៀងទី៤ ក្នុងចំណោមបេក្ខជនឈរឈ្មោះ ដែលបក្សសាធារណរដ្ឋចង់ស្នើឲ្យសភាបោះឆ្នោត ជ្រើសរើសធ្វើជាប្រធានសភាតំណាង។ តែទីបំផុត ក្រោយបរាជ័យជាបន្តបន្ទាប់ របស់បេក្ខជនផ្សេងៗទៀត លោក Mike Johnson បានរំកិលខ្លួនទទួលបានសំលេងឆ្នោតគាំទ្រ ចំនួន២២០សំឡេង។
គួរបញ្ជាក់ថា អស់រយៈពេលជាង២០ថ្ងៃមកហើយ ដែលនយោបាយអាមេរិក ត្រូវរាំងស្ទះ ដោយសារតែសភាតំណាង គ្មានប្រធានដើម្បីដឹកនាំការប្រជុំពិភាក្សា និងបោះឆ្នោតលើច្បាប់ផ្សេងៗ។ បេក្ខភាពរបស់លោក Mike Johnson បានទទួលការគាំទ្រ ពីលោក Matt Gaetz មនុស្សស្និទ្ធនឹងលោកដូណាល់ ត្រាំ ដែលជាអ្នកបានចេញមុខ ប្រមូលសាមជិកសភាបក្សសាធារណរដ្ឋ ឲ្យបោះឆ្នោតទម្លាក់លោក Kevin McCarthy ពីតំណែងកាលពីថ្ងៃទី៣តុលា។
ទន្ទឹមគ្នានេះ ការឡើងមកធ្វើប្រធានសភា របស់មនុស្សអភិរក្សស្តាំនិយម ដូចរូបលោក Mike Johnson បានធ្វើឲ្យមានការព្រួយបារម្ភជាខ្លាំង ពីសំណាក់បក្សប្រជាធិបតេយ្យ ដោយលើកឡើងថា សភាតំណាងកំពុងតែធ្លាក់ទៅក្នុងដៃរបស់ក្រុមលោកដូណាល់ ត្រាំ។ លោក Mike Johnson ត្រូវគេដឹងថា បានចូលរួមចុះហត្ថលេខា ជាមួយសមាជិកសភាបក្សសាធារណរដ្ឋជាង១០០នាក់ លើលិខិតមួយដើម្បីគាំទ្រពាក្យបណ្តឹង ដែលទាមទារឲ្យចាត់ទុកជាមោឃៈ នូវលទ្ធផលបោះឆ្នោតប្រធានាធិបតីកាលពីចុងឆ្នាំ២០២០។
យ៉ាងណាក៏ដោយ សភាតំណាងអាមេរិកមានប្រធាន ក៏មិនប្រាកដថាដំណើរការនយោបាយអាមេរិក នឹងដើរទៅដោយរលូនដែរ ព្រោះថា លោកប្រធានសភាថ្មីត្រូវធ្វើការដោយលំបាក នៅក្នុងការផ្សះផ្សារការបាក់បែកគ្នា រវាងផ្ទៃក្នុងសមាជិកសភាបក្សសាធារណៈគ្នាឯង។ មតិពីសមាជិកសភាខ្លះអះអាងថា ថ្វីបើលោក Mike Johnson ស្និទ្ធខ្លាំងនឹងក្រុមលោកដូណាល់ ត្រាំមែន តែលោកម្នាក់នេះ មានទំនាក់ទំនងល្អ ជាមួយក្រុមផ្សេងទៀតក្នុងបក្សសាធារណរដ្ឋ។
ឧបសគ្គដ៏ធំបំផុតដែលនឹងមកដល់ សម្រាប់លោក Mike Johnson ក្នុងនាមជាប្រធានសភាតំណាង គឺការចរចាអនុម័តច្បាប់ថវិកាជាតិ ដើម្បីបញ្ចៀសបញ្ហា « Shutdown » ។ លោកដូណាល់ ត្រាំ បានបញ្ជាប្រាប់ទៅសមាជិកសភាបក្សពួកខ្លួន ថាត្រូវតែដាក់សំពាធលើរដ្ឋាភិបាលលោកចូ បៃដិន ធ្វើឲ្យរដ្ឋបាលសហព័ន្ធរាំងស្ទះធ្វើការលែងកើត ដរាបណារដ្ឋបាលលោកចូ បៃដិនមិនព្រមកាត់បន្ថយការចំណាយ ទៅតាមការទាមទារចង់បានរបស់ពួកគេទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ