លោកស៊ី ជីនពីង និងលោកចូ បៃដិន ភ្ជាប់ទំនាក់ទំនងឡើងវិញ តែនៅតែជំទាស់គ្នារឿងតៃវ៉ាន់
កាលពីថ្ងៃពុធ ទី១៥វិច្ឆិកា លោកប្រធានាធិបតីចិន ស៊ី ជីនពីង បានជួបប្រជុំជាមួយលោក ចូ បៃដិន នៅឯទីក្រុងសាន់ហ្វ្រាន់ស៊ីស្កូ។ តាមរយៈជំនួបនេះ លោកប្រធានាធិបតីនៃមហាអំណាចទាំង២ បានព្រមព្រៀងគ្នា ភ្ជាប់ទំនាក់ទំនងឡើងវិញ បន្ទាប់ពីជួបភាពរកាំរកូសខ្លាំង ប្រមាណ១ឆ្នាំមកនេះ។ តែទន្ទឹមនឹងនេះ ភាគីទាំងពីរបានបង្ហាញជំហរ និងការយល់ឃើញខុសគ្នា លើច្រើនសំណុំរឿង ជាពិសេសក្នុងរឿងកោះតៃវ៉ាន់។
ចុះផ្សាយនៅថ្ងៃ៖
ស្តាប់ - ០៣:២១
យោងតាមប្រភពផ្លូវការ លទ្ធផលនៃជំនួបនៅសាន់ហ្វ្រាន់ស៊ីស្កូ បានអនុញ្ញាតឲ្យមហាយក្សទាំង២ បង្កើតបាននូវបណ្តាញទំនាក់ទំនងជាន់ខ្ពស់មួយ ផ្នែកកងទ័ព។ ប្រព័ន្ធទាក់ទងគ្នាជាប្រចាំរវាងកងទ័ពទាំង២ ដែលបានព្យួរចោលអស់រយៈពេលជាង១ឆ្នាំមកហើយ ដោយសារតែវិវាទជាបន្តបន្តាប់។
លោក ចូ បៃដិន បានប្រាប់អ្នកកាសែតថា ជំនួបរយៈពេល៤ម៉ោងជាមួយលោកស៊ី ជីនពីង ព្រមទាំងមន្ត្រីជាន់ខ្ពស់ចិន គឺបានធ្វើឡើងក្នុងបរិយាកាសល្អ ប្រកបដោយការស្ថាបនា។ លោកបានអះអាងទៀតថា ចាប់ពីពេលនេះទៅ ក្នុងករណីមានវិបត្តិកើតឡើង គឺលោកនិងលោកស៊ី ជីនពីង អាចទូរស័ព្ទទាក់ទងគ្នា “ដោយផ្ទាល់ និងភ្លាមៗ” តែម្តង។ ដើម្បីបង្ហាញពីភាពប្រសើរឡើង នៃទំនាក់ទំនងរវាងប្រធានាធិបតីទាំង២ លោកស៊ី ជីនពីង និងលោកចូ បៃដិន បានដើរប្រកៀកស្មាក្នុងសួនច្បារ សាសងគ្នាយ៉ាងស្និទ្ធស្នាល ដើម្បីឲ្យអ្នកកាសែតថតរូប។
តែយ៉ាងណា បញ្ហាវិវាទប្រឈមមុខដាក់គ្នា រវាងមហាអំណាចទាំង២ គឺនៅតែដដែល បើទោះបីមេដឹកនាំទាំង២ បានចាប់ផ្តើម និយាយគ្នាឡើងវិញ។ នៅក្នុងសន្និសីទកាសែត ក្រោយចប់ការប្រជុំ លោកប្រធានាធិបតី ចូ បៃដិន បានរក្សាសំដីលោកដដែល ដោយលោកបានចាត់ទុកលោកស៊ី ជីនពីង ថាជាប្រធានាធិបតីផ្តាច់ការ។
ក្នុងពេលប្រជុំ លោកប្រធានាធិបតីចិន បានសន្យាថារដ្ឋាភិបាលលោក និងចាត់វិធានការចាំបាច់មួយចំនួន ដើម្បីកាត់បន្ថយការនាំចូលសារធាតុ Fentanyl ពីចិនមកសហរដ្ឋអាមេរិក។ សារធាតុ Fentanyl គឺជាសារធាតុគីមី ធ្វើឲ្យអ្នកប្រើប្រាស់វាញៀន និងបានបណ្តាលឲ្យមនុស្សជាច្រើនម៉ឺននាក់ស្លាប់ ក្នុងមួយឆ្នាំៗ នៅសហរដ្ឋអាមេរិក។ ប្រធានាធិបតីទាំង២ ក៏បានព្រមព្រៀងគ្នាដែរ ក្នុងការបង្កើតឲ្យមានក្រុមការងារជំនាញមួយក្រុម ទទួលបន្ទុកជជែកពិគ្រោះយោបល់គ្នា អំពីបច្ចេកវិទ្យាបញ្ញាសិប្បនិម្មិត។
គួរកត់សំគាល់ដែរថា ការសុខចិត្តបន្ទន់ឥរិយាបថ របស់លោកប្រធានាធិបតីចិន មកជួបលោកចូ បៃដិន នៅលើទឹកដីសហរដ្ឋអាមេរិក អាចបណ្តាលមកពីកត្តាលំបាកមួយចំនួន ដែលសេដ្ឋកិច្ចចិនកំពុងតែប្រឈម។ តែទន្ទឹមគ្នានេះ លោកស៊ី ជីនពីង បានព្យាយាមរក្សាជំហរ បង្ហាញថាលោកមិនទន់ជ្រាយ ឬចាញ់ប្រៀបលោកចូ បៃដិនឡើយ ជាពិសេសនៅក្នុងសំណុំរឿងកោះតៃវ៉ាន់ ដែលការបោះឆ្នោតប្រធានាធិបតីថ្មី កាន់តែខិតជិតមកដល់។
ក្នុងពេលជួបគ្នា លោកចូ បៃដិនបានប្រាប់ទៅលោកស៊ី ជីនពីង ថាចិនត្រូវតែគោរពដំណើរការប្រជាធិបតេយ្យនៅតៃវ៉ាន់ផង។ តាមរយៈសំដីនេះ លោកចូ បៃដិនបានព្យាយាមប្រាប់ទៅចិន ថាអាមេរិកមិនគាំទ្រការប្រកាសឯករាជ្យរបស់តៃវ៉ាន់ទេ តែអាមេរិកក៏មិនគាំទ្រឲ្យចិន លើកទ័ពប្រើកម្លាំងក្តាប់យកតៃវ៉ាន់ដែរ។ ផ្អែកតាមប្រភពមន្ត្រីទូតចិន គឺលោកស៊ី ជីនពីង បានថ្លែងប្រាប់ទៅលោកបៃដិនវិញថា អាមេរិកត្រូវតែឈប់បំពាក់អាវុធឲ្យតៃវ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ