APECប្តេជ្ញាសហការសេដ្ឋកិច្ចនិងបរិស្ថាន តែបញ្ជាក់គំនិតខ្វែងគ្នាខ្លាំងរឿងហ្កាហ្សា
ជំនួបកំពូលក្រុមប្រទេសនៅជុំវិញមហាសមុទ្ទប៉ាស៊ីហ្វិក ហៅកាត់ថាAPEC បានចេញសេចក្តីថ្លែងការណ៍ប្តេជ្ញាពង្រឹងកិច្ចសហប្រតិបត្តិការសេដ្ឋកិច្ច ប៉ុន្តែដោយគ្មានការភ្ញាក់ផ្អើល ជំនួបAPECបានបញ្ជាក់អំពីគំនិតខ្វែងគ្នាយ៉ាងខ្លាំងលើវិបត្តិហ្កាហ្សានិងអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:០៨
APECដែលមានសមាជិក២១ប្រទេសនៅជុំវិញមហាសមុទ្ទប៉ាស៊ីហ្វិក បានចេញសេចក្តីថ្លែងការណ៍រួមប្តេជ្ញាលើកកម្ពស់កំណើនសេដ្ឋកិច្ច ឱ្យបានសមស្របដើម្បីឆ្លើយតបទៅនឹងស្ថានភាពបរិស្ថាន ពោលគឺការប្រែប្រួលអាកាសធាតុ។ ប៉ុន្តែគ្មានទេឆន្ទៈរួមទាក់ទងនឹងសំណុំរឿងភូមិសាស្ត្រនយោបាយដែលកំពុងពុះកញ្ជ្រោលយ៉ាងក្តៅគគុក។ តាមសំណើរបស់ក្រុមប្រទេសជាសមាជិកខ្លះដែលយល់ថាAPEC គ្មានប្រវត្តិសមត្ថកិច្ចពិភាក្សាលើប្រធានបទភូមិសាស្ត្រនយោបាយ ជំនួបកំពូលបានចេញសេចក្តីថ្លែងការណ៍ដាច់ដោយឡែកមួយផ្សេងទៀត។
ក្នុងវិបត្តិអ៊ុយក្រែន សមាជិកមួយភាគធំបានថ្កោលទោសយ៉ាងដាច់ណាត់អំពើឈ្លានពានលើអ៊ុយក្រែនពីសំណាក់រុស្ស៊ីដែលបានបញ្ជូនឧបនាយករដ្ឋមន្ត្រី អាឡិចសី អូវឺជុក Alexeï Overchukមកចូលរួម។ នេះជាតំណាងជាន់ខ្ពស់បំផុតរបស់រុស្ស៊ីមកកាន់ទឹកដីអាមេរិកជាលើកទីមួយគិតតាំងពីផ្ទុះសង្គ្រាមនៅអ៊ុយក្រែនមក។
ស្តីអំពីសង្គ្រាមនៅហ្កាហ្សាវិញ សេចក្តីថ្លែងការណ៍ដាច់ដោយឡែកនេះ បានបញ្ជាក់ថា រដ្ឋជាសមាជិក ដែលជាមហាអំណាចប្រកួតប្រជែងគ្នាដូចយ៉ាងសហរដ្ឋអាមេរិកនិងចិន ឬរុស្ស៊ី និងសមាជិកជាប្រទេសមានពលរដ្ឋភាគច្រើនជាអ្នកកាន់សាសនាអ៊ីស្លាម ដូចយ៉ាងឥណ្ឌូណេស៊ីនិងម៉ាឡេស៊ី បានផ្តោះប្តូរទស្សនៈគ្នាទៅវិញទៅមក។ ប្រមុខដឹកនាំខ្លះបានថែមទាំងពាំនាំសាររបស់អង្គការសហប្រតិបត្តិការអ៊ីស្លាមដែលថ្កោលទោសសកម្មភាពដ៏ឃោរឃៅរបស់យោធាអ៊ីស្រាអែល។ យោធាអ៊ីស្រាអែលកំពុងបន្តវាយប្រហារលើតំបន់ហ្កាហ្សា គ្មានបន្ធូរដៃឬផ្អាកបាញ់មនុស្សធម៌ពិតប្រាកដទេ។ បើតាមក្រសួងសុខាភិបាលហ្កាហ្សា នៅថ្ងៃសៅរ៍នេះ ទាហានអ៊ីស្រាអែលបានវាយប្រហារលើអាគារលំនៅឋាននិងសាលារៀនរបស់អង្គការសហប្រជាជាតិ បណ្តាលឱ្យស្លាប់មនុស្សយ៉ាងហោច៥០នាក់ និងកំពុងសម្រុកបាញ់លើមន្ទីរពេទ្យal-Chifaដ៏ធំបំផុតនៅហ្កាហ្សាដោយប្រកាសទុកពេលឱ្យតែមួយម៉ោងដើម្បីជម្លៀសខ្លួនចេញ។
ប៉ុន្តែជាថ្មីម្តងទៀត ពីវេទិកាAPEC ប្រធានាធិបតីអាមេរិកលោក ចូ បៃដិន បានបញ្ជាក់អំពីជំហរគាំទ្រអ៊ីស្រាអែលយ៉ាងមុះមុតដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ