ប្រមុខការទូតអាមេរិកទៅម៉ិកស៊ិកដើម្បីសាកល្បងដោះស្រាយវិបត្តិអន្តោប្រវេសន៍
លោកអង់តូនី ប្លីងកិន រដ្ឋមន្ត្រីការបរទេសអាមេរិក ត្រូវអញ្ជើញទៅប្រទេសម៉ិកស៊ិក នាថ្ងៃពុធទី២៧ធ្នូ២០២៣នេះ ដើម្បីសាកល្បងស្វែងរកដំណោះស្រាយឱ្យវិបត្តិអន្តោប្រវេសន៍ដ៏ស្មុគស្មាញ។ រលកអន្តោប្រវេសន៍កំពុងបោកបក់ជាថ្មីនៅតាមព្រំដែន និងកំពុងក្លាយជាប្រធានបទនយោបាយដ៏ក្តៅគគុកនៅសហរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០២:៣៧
លោកប្រមុខការទូតអាមេរិកត្រូវធ្វើដំណើរទៅបំពេញទស្សនកិច្ចដ៏កម្រមួយនៅប្រទេសម៉ិកស៊ិក ព្រោះសម្ពាធនយោបាយផ្ទៃក្នុងបង្ខំ។ រដ្ឋាភិបាលលោកបៃដិនចង់បានកិច្ចព្រមព្រៀងជាមួយសភាអ្នកតំណាងបក្សសាធារណរដ្ឋ ក្នុងវិបត្តិអន្តោប្រវេសន៍ជាថ្នូរនឹងការយល់ព្រមអនុម័តកញ្ចប់ជំនួយថវិកា៦១ពាន់លានថ្មីទៀតសម្រាប់អ៊ុយក្រែន។
ដូច្នេះលោកអង់តូនីប្លីងកិនត្រូវជួបពិភាក្សាជាមួយប្រធានាធិបតីម៉ិកស៊ិកលោក អង់ដ្រេ ម៉ាណុយអែលឡូប៉េ អូប្រាដរ នៅក្រុងម៉ិកស៊ិកូ ព្រមទាំងរដ្ឋលេខាធិការក្រសួងមហាផ្ទៃទទួលបន្ទុកព្រំដែន និងទីប្រឹក្សាសន្តិសុខជាតិ។ អាមេរិកចង់ពិភាក្សាជាមួយប្រធានាធិបតីម៉ិកស៊ិកអំពីភាពបន្ទាន់ចាំបាច់ក្នុងបង្កើតផ្លូវអន្តោប្រវេសន៍ស្របច្បាប់ និងការពង្រឹងសកម្មភាពរួមនគ្នានៅតាមព្រំដែន។ បើតាមអ្នកជំនាញ វ៉ាស៊ីនតោនទំនងជាត្រូវសុំពឹងពាក់ឱ្យម៉ិកស៊ិកបន្តរក្សាជនអន្តោប្រវេសន៍នៅលើទឹកដីខ្លួនសិន តាមរយៈការផ្តល់សិទ្ធិឱ្យធ្វើការជាដើម។ នៅក្នុងការចរចា រដ្ឋាភិបាលអាមេរិកគ្រោងផ្តល់ហិរញ្ញវត្ថុសម្រាប់បង្កើនចំនួនប៉ូលិសព្រំដែនចំនួន១៣០០នាក់។
រដ្ឋបាលលោកបៃដិន ចង់បង្ហាញឱ្យឃើញថាដោយហេតុតែនយោបាយផ្ទៃក្នុង រដ្ឋាភិបាលអាមេរិកបានប្រើគ្រប់លទ្ធភាពដែលមានក្នុងសំណុំរឿងអន្តោប្រវេសន៍នេះ។ គ្រប់គ្នាសុទ្ធតែចង់បានដំណោះស្រាយភ្លាម ប៉ុន្តែអន្តោប្រវេសន៍ជាវិបត្តិពិភពលោក រ៉ាំរ៉ៃកើតមានតាំងពីយូរយារ។
តាំងពីប៉ុន្មានសប្តាហ៍មកនេះ ចំនួនជនអន្តោប្រវេសន៍ប៉ុនប៉ងឆ្លងព្រំដែនទៅអាមេរិកដោយខុសច្បាប់បានកើនឡើងក្នុងចំនួនប្រមាណ១ម៉ឺននាក់ក្នុងមួយថ្ងៃ ពោលគឺច្រើនជិតទ្វេដងបើប្រៀបទៅនឹងពេលមុនកូវីដ។ រលកអន្តោប្រវេសន៍សម្រុកឆ្លងព្រំដែនច្រើនពេករហូតដល់អាជ្ញាធរអាមេរិកសម្រេចបិទប៉ុស្តិ៍ព្រំដែន ដើម្បីងាកមើលខុសត្រូវក្រុមអន្តោប្រវេសន៍ឆ្លងដែនដោយខុសច្បាប់វិញ។
ជនអន្តោប្រវេសន៍រាប់ពាន់នាក់ បានដឹកកូនជញ្ជូនចៅធ្វើដំណើរទាំងហ្វូងៗ ចាកចេញពីភាគខាងត្បូងនៃប្រទេសម៉ិកស៊ិក ជាមួយឆន្ទៈដាច់ខាតថា ជីវិតពួកគេនឹងល្អប្រសើរនៅលើទឹកដីសហរដ្ឋអាមេរិក។ ពួកគេភាគច្រើនបានរត់គេចពីប្រទេសកំណើតនៅតំបន់អាមេរិកកណ្តាល ដែលញាំញីដោយភាពក្រីក្រ អំពើហិង្សា និងគ្រោះមហន្តរាយធម្មជាតិ។ បើតាមអង្គការសហប្រជាជាតិ ចំនួនជនអន្តោប្រវេសន៍មកពីហៃទី ដែលមានហិង្សាបងធំបងតូច និងមកពីវេណេស៊ុយអេឡាដែលលង់ក្នុងវិបត្តិសេដ្ឋកិច្ច បានឡើងដល់ជាង៧លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ