បោះឆ្នោតប្រធានាធិបតីអាមេរិក ៖ ដូណាល់ត្រាំមិនអាចឈរឈ្មោះជាបេក្ខជនប្រធានាធិបតី នៅរដ្ឋMaine
លោកស្រីShenna Bellows ទទួលបន្ទុករៀបចំការបោះឆ្នោតនៅរដ្ឋMaineសហរដ្ឋអាមេរិក បានប្រកាសនៅល្ងាចថ្ងៃព្រហស្បតិ៍ទី ២៨ធ្នូថា លោក ដូណាល់ត្រាំ គ្មានសិទ្ធិឈរឈ្មោះជាបេក្ខជនប្រធានាធិបតីនៅក្នុងរដ្ឋMaineទេ ព្រោះលោកមានពាក់ព័ន្ធនឹងហេតុការណ៍សម្រុកចូលវិមានកាពីតូលកាលពីថ្ងៃទី ៦មករា២០២១។ នេះរដ្ឋទីពីរហើយដែលសម្រេចមិនឱ្យលោកដូណាល់ត្រាំឈរឈ្មោះបោះឆ្នោត។ ដូច្នេះឈ្មោះលោកអតីតប្រធានាធិបតីដែលកំពុងចុះឃោសនាដើម្បីចូលប្រកួតប្រជែងក្នុងការបោះឆ្នោតប្រធានាធិបតីអាមេរិកឆ្នាំ២០២៤ គ្មាននៅក្នុងបញ្ជីបោះឆ្នោតជ្រើសរើសបេក្ខជនប្រធានាធិបតីបក្សសាធារណរដ្ឋនាថ្ងៃទី១៥មីនា២០២៤ទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
លោកដូណាល់ត្រាំ មិនអាចឈរឈ្មោះជាបេក្ខជនប្រធានាធិបតី នៅក្នុងរដ្ឋMaineបានទេ ព្រោះលោកមានពាក់ព័ន្ធនឹងហេតុការណ៍នៅវិមានកាពីតូលកាលពីថ្ងៃទី៦មករា២០២១។ ការសម្រុកចូលវិមានរដ្ឋសភា កាពីតូល ពីសំណាក់បាតុករ ត្រូវបានធ្វើឡើងដោយមានបញ្ជានិងការគាំទ្រពីលោកអតីតប្រធានាធិបតីផុតអាណត្តិ។ នៅក្នុងសេចក្តីថ្លែងការណ៍លោកស្រីShenna Bellowsទទួលបន្ទុករៀបចំការបោះឆ្នោត រដ្ឋMaine បានពន្យល់ទៀតថា លោក ដូណាល់ ត្រាំ មិនសមនឹងទទួលតួនាទីជាប្រធានាធិបតីទេ បើយោងតាមមាត្រ១៤នៃរដ្ឋធម្មនុញ្ញសហរដ្ឋអាមេរិក ដែលមិនអនុញ្ញាតឱ្យបុគ្គលសាធារណៈធ្លាប់បង្កសកម្មភាពបះបោរ មានទំនួលខុសត្រូវដឹកនាំប្រទេស។
Maineគឺរដ្ឋទីពីររបស់សហរដ្ឋអាមេរិកហើយដែលប្រកាសថាលោកដូណាល់ត្រាំ គ្មានសិទ្ធិឈរឈ្មោះជាបេក្ខជនប្រធានាធិបតី។ ក្រោមហេតុផលតែមួយដូចគ្នា កាលពីថ្ងៃទី១៩ធ្នូ តុលាការកំពូលរដ្ឋកូឡូរ៉ាដូ បានចេញដីការបញ្ជាឱ្យដកឈ្មោះលោកដូណាល់ត្រាំ អតីតប្រធានាធិបតីចេញពីសន្លឹកឆ្នោត។
ប៉ុន្តែសេចក្តីសម្រេចចិត្តរបស់រដ្ឋMaine អាចនឹងត្រូវព្យួរវិញ បើមានការតវ៉ាទៅតុលាការ។ ហើយដោយគ្មានបង្អង់ លោកមហាសេដ្ឋីត្រាំ បានប្រកាសឆន្ទៈដាក់បណ្តឹងទៅតុលាការកំពូលសហរដ្ឋអាមេរិកតែម្តងប្រឆាំងនឹងសេចក្តីសម្រេចរបស់រដ្ឋMaine និងដោយចាត់ទុកជាសេចក្តីសម្រេចបែបឆ្វេងនិយមជ្រុល និងបែបគាំទ្រលោកចូបៃដិនងប់ងល់។ ទាំងអ្នកសាធារណរដ្ឋក៏ដូចជាអ្នកប្រជាធិបតេយ្យមួយចំនួន សុទ្ធតែនាំគ្នារិះគន់សេចក្តីសម្រេចរបស់រដ្ឋMaine ថាធ្វើឡើងមុនការជំនុំជម្រះរបស់តុលាការ។
ប្រសិនបើលោកដូណាល់ត្រាំ ពិតជាមិនអាចឈរឈ្មោះជាបេក្ខជនប្រធានាធិបតីបក្សសាធារណរដ្ឋនៅរដ្ឋMaineបានមែន ផលវិបាកអាចធ្ងន់ធ្ងរខ្លាំងសម្រាប់លោកត្រាំ ក្នុងករណីមានលទ្ធផលឆ្នោតប្រធានាធិបតី២០២៤ប្រកៀកប្រកិតគ្នា ព្រោះគឺនៅរដ្ឋMaineនេះហើយដែលកាលពីឆ្នាំ២០២០លោកដូណាល់ត្រាំធ្លាប់មានជោគជ័យទទួលបានអង្គបោះឆ្នោតមួយ សម្រាប់ជាតំណាងទៅបោះឆ្នោតជ្រើសរើសប្រធានាធិបតីនិងអនុប្រធានាធិបតីនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ