FBI ចាប់ខ្លួនទាហានដែលលួចយកព័ត៌មានសម្ងាត់របស់កងទ័ពអាមេរិក ទៅលក់ឲ្យចិន
ប៉ូលិសសហព័ន្ធ FBI បានចាប់ខ្លួនទាហានអាមេរិកម្នាក់ ក្នុងបទចោទប្រកាន់លួចយកព័ត៌មានសម្ងាត់ការពារជាតិអាមេរិក យកទៅលក់ឲ្យចិន។ តាមការប្រកាសរបស់ក្រសួងយុត្តិធម៌អាមេរិក នាយទាហានម្នាក់ ដែលបម្រើការជាអ្នកវិភាគព័ត៌មានសម្ងាត់របស់កងទ័ពអាមេរិក ត្រូវគេចូលចាប់ខ្លួន នៅនឹងកន្លែងធ្វើការ ក្នុងមូលដ្ឋានទ័ពអាមេរិក Fort Campbell ក្នុងរដ្ឋKentucky កាលពីថ្ងៃព្រហស្បតិ៍ទី ៧ មីនា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២១
រដ្ឋអាជ្ញាក្នុងរដ្ឋTennesse បានប្រកាសនៅថ្ងៃព្រហស្បតិ៍ ទី ៧មីនា ពីការចាប់ខ្លួននាយទាហានអាមេរិកម្នាក់ក្នុងបទចោទប្រកាន់ធ្វើចារកម្មឲ្យប្រទេសចិន។ តាមរដ្ឋអាជ្ញា នាយទាហានអាមេរិកឈ្មោះ Korbein Schultz ដែលបម្រើការជាអ្នកវិភាគព័ត៌មានសម្ងាត់នៅមូលដ្ឋានទ័ពអាមេរិកFort Campbell ក្នុងរដ្ឋKentucky បានលួចយកព័ត៌មានសម្ងាត់របស់កងទ័ពអាមេរិកដើម្បីលក់ទៅបុគ្គលម្នាក់ ដែលឈរជើងនៅទីក្រុងហុងកុង។
រដ្ឋអាជ្ញាអាមេរិកមិនបានបញ្ចេញឈ្មោះ បុគ្គល ឬក្រុមហ៊ុនចិនដែលទិញព័ត៌មានសម្ងាត់ពីទាហានអាមេរិក ប៉ុន្តែ គ្រាន់តែបានបញ្ជាក់ថា ព័ត៌មានសម្ងាត់របស់កងទ័ពអាមេរិកដែលបុគ្គលនៅហុងកុង ចាប់អារម្មណ៍ខ្លាំង ចង់បានខ្លាំងពីទាហានអាមេរិក គឺ ព័ត៌មានស្តីពីផែនការរបស់កងទ័ពអាមេរិក នៅក្នុងករណីមានការវាយប្រហារលើកោះតៃវ៉ាន់។
ក្រៅពីនោះ នៅមានឯកសារផ្សេងទៀត ដែលនិយាយពីប្រព័ន្ធជើងទ្របាញ់គ្រាប់រ៉ូក្កែត Himars ព័ត៌មានទាក់ទងគ្រឿងសព្វាវុធអ៊ីពែរសូនិក ការសិក្សាស្តីពីការអភិវឌ្ឍកងទ័ពអាមេរិកនាថ្ងៃអនាគត ការស្រាវជ្រាវរបស់អាមេរិកទៅលើកងទ័ពចិន និងចុងក្រោយ គឺការរបាយការណ៍បូកសរុបស្តីពីសមយុទ្ធ និងបេសកកម្មរបស់កងទ័ពអាមេរិក។
ជាថ្នូរនឹងការលួចផ្ញើឯកសារ ព័ត៌មានសម្ងាត់របស់កងទ័ពអាមេរិកទៅឲ្យបុគ្គល នៅហុងកុង គិតចាប់តាំងពីខែឧសភាឆ្នាំ ២០២២ រហូតដល់ថ្ងៃចាប់ខ្លួន ទាហានអាមេរិក Korbein Schultz បានទទួលលុយប្រមាណ ៤២០០០ដុល្លារ។
សម្រាប់អ្នកទទួលខុសត្រូវរបស់ប៉ូលិសសហព័ន្ធFBI នាយទាហានអាមេរិក ដោយលួចផ្តល់ព័ត៌មានសម្ងាត់របស់កងទ័ព ទៅលក់ឲ្យជនបរទេស នាយទាហានអាមេរិក Korbein Schultz បានក្បត់ពាក្យសម្បថ នៅពេលចូលបម្រើកងទ័ព ដែលថា នឹងការពារជាតិអាមេរិក។ ជាជាងការពារព័ត៌មានដែលទាក់ទងនឹងការណ៍សម្ងាត់កងទ័ពអាមេរិក Korbein Schultz ផ្ទុយទៅវិញ បានសមគំនិតជាមួយជនបរទេស ដើម្បីលក់ព័ត៌មានសម្ងាត់ ដែលអាចធ្វើឲ្យសន្តិសុខជាតិអាមេរិកប្រឈមនឹងគ្រោះថ្នាក់។ នេះជាប្រសាសន៍របស់លោកស្រី Larissa Knapp ទទួលបន្ទុកផ្នែកសន្តិសុខជាតិរបស់ប៉ូលិសFBI។
ទៅតាមសេចក្តីថ្លែងការណ៍របស់ក្រសួងយុត្តិធម៌អាមេរិក Korbein Schultzរងការចោទប្រកាន់ក្នុងបទសមគំនិតដើម្បីទទួលបានព័ត៌មានសម្ងាត់របស់កងទ័ព ការលួចបញ្ចេញទិន្នន័យដោយគ្មានការអនុញ្ញាត និងការសូកប៉ាន់មន្រ្តីរដ្ឋការអាមេរិក។
នៅទីក្រុងប៉េកាំង ឆ្លើយតបនឹងសំណួររបស់អ្នកកាសែត ទាក់ទងនឹងការចាប់ខ្លួនយោធាអាមេរិកដែលត្រូវចាប់ខ្លួន ដោយសារលួចយកការណ៍សម្ងាត់ឲ្យចិន អ្នកនាំពាក្យរបស់ក្រសួងការបរទេសចិន លោកស្រី Mao Ning បានបដិសេធថា ចិនគ្មានជាប់ពាក់ព័ន្ធនឹងរឿងនោះទេ និងថា ចិននៅតែប្រកាន់ខ្ជាប់ ការគោរព និងការពារកម្មសិទ្ធិបញ្ញា។ ផ្ទុយទៅវិញ អ្នកនាំពាក្យចិនខាងលើបានទាមទារឲ្យអាមេរិកឈប់ប្រើលេស ការពារសន្តិសុខជាតិ ដើម្បីយាយី ចោទប្រកាន់ដោយគ្មានមូលដ្ឋាន ក្រុមហ៊ុន និងពលរដ្ឋចិន។
Korbein Schultzជាទាហានអាមេរិកម្នាក់ទៀត ដែលប៉ូលិសFBI ចាប់ខ្លួន ក្នុងបទលួចយកការណ៍សម្ងាត់ទៅលក់សម្រាប់ប្រយោជន៍ចិន។ នៅខែមករាកន្លងទៅ តុលាការអាមេរិកទើបបានផ្តន្ទាទោសទាហានអាមេរិកដើមកំណើតចិន ម្នាក់ ឲ្យជាប់ពន្ធនាគារជាង២ឆ្នាំ បន្ទាប់ពីនាយទាហានរូបនេះសារភាពថា គេបានទទួលសំណូក និងសមគំនិតជាមួយភ្នាក់ងារចារកិច្ចបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ