ព្យុះស៊ីក្លូនកំណាច“អាំផាន” សម្លាប់មនុស្សយ៉ាងហោច ៨៤ នាក់នៅឥណ្ឌានិងបង់ក្លាដែស
មនុស្សយ៉ាងហោចណាស់ ៨៤ នាក់នៅក្នុងប្រទេសឥណ្ឌានិងបង់ក្លាដែស ត្រូវបានសម្លាប់ដោយព្យុះស៊ីក្លូនដ៏កំណាច “អាំផាន” (Amphan)។ នេះ បើយោងតាមតុល្យការកាលពីយប់ថ្ងៃព្រហស្បតិ៍ ទី២១ ឧសភាម្សិលមិញ។ ក្រៅតែពីបានសម្លាប់ជីវិតមនុស្សចំនួនរាប់សិបនាក់ ព្យុះស៊ីក្លូននេះក៏បានបង្កឲ្យប្រជាជនឥណ្ឌា និងបង់ក្លាដែសចំនួនរាប់ពាន់នាក់ផ្សេងទៀតបាត់បង់ទីជម្រក នៅខណៈពេលដែលពួកគេកំពុងរងគ្រោះដោយសារជំងឺឆ្លងកូវីដ១៩ ស្រាប់ទៅហើយនោះ។
ចុះផ្សាយនៅថ្ងៃ៖
ស្តាប់ - ០២:២៨
ព្យុះស៊ីក្លូនអាំផាន បានផ្តើមបោកបក់ទៅលើទីក្រុង និងតំបន់ឆ្នេរសមុទ្រជាច្រើន ក្នុងប្រទេសឥណ្ឌា និងប្រទេសក្បែរខាងបង់ក្លាដែស តាំងពីរសៀលថ្ងៃពុធ ទី ២០ ខែឧសភា។
ផ្ទះសម្បែងជាច្រើនត្រូវរងការបំផ្លិចបំផ្លាញ ហើយដើមឈើរាប់ពាន់ដើម បូករួមទាំងបង្គោលភ្លើងអគ្គិសនីផង ត្រូវបានបោកបក់ និងទាញឲ្យដួលរលំដោយសារតែកម្លាំងខ្យល់ព្យុះ លាយឡំនឹងទឹកភ្លៀង។ ជាមួយគ្នានេះ បណ្តាញអគ្គិសនី ហើយនិងចរន្តទូរសព្ទនៅក្នុងតំបន់ជាច្រើន ក៏ត្រូវបានកាត់ផ្តាច់ផងដែរ។
ការិយាល័យអង្គការសហប្រជាជាតិ ប្រចាំនៅប្រទេសបង់ក្លាដែស បានប៉ាន់ស្មានថា មនុស្សប្រមាណជា ១០ លាននាក់រងផលប៉ះពាល់ ពីគ្រោះធម្មជាតិមួយនេះ ហើយមនុស្សប្រមាណជា ៥០ ម៉ឺននាក់អាចបាត់បង់ផ្ទះសម្បែងរបស់ពួកគេ។
ប្រធានក្រុមប្រឹក្សាអគ្គិសនីជនបទបង់ក្លាដែស បានឲ្យដឹងថា នៅរសៀលថ្ងៃព្រហស្បតិ៍ម្សិលមិញ យ៉ាងហោចណាស់មនុស្ស ១០ លាននាក់ដែលរស់នៅក្នុងបណ្តាស្រុកដែលរងគ្រោះខ្លាំងជាងគេបំផុតក្នុងប្រទេសបង់ក្លាដែស គ្មានភ្លើងអគ្គិសនីសម្រាប់ប្រើប្រាស់។
ខណៈពេលដែលទាំងប្រទេសឥណ្ឌា និងបង់ក្លាដែស នៅមិនទាន់អាចគ្រប់គ្រងមេរោគកូវីដបាននៅឡើយ គេមានការព្រួយបារម្ភថា គ្រោះខ្យល់ព្យុះអំាផាន អាចបង្កជាគ្រោះថ្នាក់ទ្វេឡើងសម្រាប់ប្រទេសទាំងពីរ។ ជាក់ស្តែង នៅពេលមនុស្សជាច្រើន បាត់បង់ទីជម្រក ហើយត្រូវទៅស្នាក់នៅជុំគ្នាណែនណាន់តាន់តាប់ឯជំរំសុវត្ថិភាព ឱកាសក្នុងការចម្លង និងឆ្លងជំងឺកូវីដក្នុងចំណោមពួកគេមានខ្ពស់ខ្លាំងណាស់។
មន្ត្រីរដ្ឋាភិបាលឥណ្ឌា បានលើកឡើងថា ផលប៉ះពាល់បង្កឡើងដោយព្យុះស៊ីក្លូន អាំផាន គឺធ្ងន់ធ្ងរជាងមេរោគកូរ៉ូណាថ្មីទៅទៀត។ ដើមឈើរាប់ពាន់ដួលរលំ ផ្លូវថ្នល់ត្រូវរងការខូចខាតដោយកម្លាំងទឹកជន់ហូរ ហើយផលដំណាំជាច្រើនទៀតត្រូវខូតខាតទាំងស្រុង។
នាយករដ្ឋមន្រ្តីឥណ្ឌាលោក ណារិនដ្រា ម៉ូឌី កាលពីថ្ងៃព្រហស្បតិ៍ម្សិលមិញ ក៏បាននិយាយដែរថា លោកនឹងនៅរួមសុខទុក្ខជាមួយប្រជាជនឥណ្ឌា ហើយនឹងខិតខំដោះស្រាយបញ្ហាដែលបង្កឡើងដោយព្យុះស៊ីក្លូនជូនប្រជាជន។
គួរជ្រាបថា អាំផានគឺជាព្យុះស៊ីក្លូនដែលមានកម្លាំងខ្លាំងបំផុតមួយ និងបានផ្តើមវាយប្រហារដំបូងលើឆ្នេរសមុទ្របេងហ្គលរបស់ឥណ្ឌា ក្នុងឆ្នាំ១៩៩៩។ ចំនួនអ្នកស្លាប់ ដោយសារព្យុះអាំងផាន នៅពេលនេះ មានចំនួនទាបឆ្ងាយណាស់ពីអ្នកស្លាប់ដោយសារព្យុះមុនៗ។ នេះ គឺជាលទ្ធផលនៃការព្យាករណ៍អាកាសធាតុ និងផែនការឆ្លើយតបបន្ទាន់របស់អាជ្ញាធរក្នុងស្រុកដែលមានលក្ខណៈល្អប្រសើរជាងមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ