ឥណ្ឌូណេស៊ី៖ ទឹកជំនន់សម្លាប់មនុស្សជិត៤០នាក់ ហើយរាប់សិបនាក់ទៀត បាត់ខ្លួន
នៅភាគខាងជើងឥណ្ឌូណេស៊ី តុល្យការត្រឹមរសៀលថ្ងៃសុក្រ ទឹកជំនន់ បានសម្លាប់មនុស្ស យ៉ាងហោច ៣៦នាក់ ហើយមនុស្សចំនួន ៦៦នាក់ទៀត កំពុងបាត់ខ្លួន។ ពេលនេះ ក្រុមជួយសង្គ្រោះកំពុងតែបន្តរុករកមនុស្សទាំងឡាយដែលបាត់ខ្លួន ក៏ប៉ុន្តែ ហាក់មិនសូវថានឹងអាចរកឃើញមនុស្សដែលនៅមានជីវិតនោះឡើយ ព្រោះភក់ដីនិងកម្ទេចកម្ទីកប់ច្រើនខ្លាំង។
ចុះផ្សាយនៅថ្ងៃ៖
ស្តាប់ - ០១:៤៣
គ្រោះមហន្តរាយនៅភាគខាងជើងប្រទេសឥណ្ឌូណេស៊ី បានបណ្តាលឱ្យប្រជាជន ប្រមាណ១ម៉ឺន៤ពាន់នាក់ រត់ភៀសខ្លួនចោលផ្ទះសម្បែង ទៅរកទីទួលជម្រកសុវត្ថិភាព។ ទឹកជន់សម្លាប់មនុស្សនេះ បណ្តាលមកពីភ្លៀងខ្លាំង តាំងពីដើមសប្តាហ៍មក ដែលនាំឱ្យទឹកទន្លេបី ជន់ឡើងខ្លាំង ព្រមៗគ្នា។
មន្ត្រីអាជ្ញាធរមូលដ្ឋាន ឥណ្ឌូណេស៊ី បានឱ្យដឹងថា ចំនួនបញ្ជីឈ្មោះមនុស្ស ដែលប្រកាសថាត្រូវបាត់ខ្លួន បានកើនឡើងជាបន្តបន្ទាប់។ តាមអាជ្ញាធរដដែល ក្រុមជួយសង្គ្រោះមានសង្ឃឹមតិចតួចណាស់ ថាអាចរកអ្នកដែលបាត់ខ្លួនឃើញមកវិញ ដោយពួកគេនៅមានជីវិតនោះ ព្រោះថា អ្នកខ្លះបាត់ខ្លួនបួនថ្ងៃហើយ រកមិនឃើញសោះ។ស្ថានភាពពេលនេះ គឺកាន់តែធ្ងន់ធ្ងរខ្លាំង ព្រោះដីភក់ឡើងកម្រាស់ដល់ទៅ២ម៉ែត្រទៅហើយ។ ទោះមានសង្ឃឹមតិចយ៉ាងណាក្តី ក៏ក្រុមអ្នករុករកជួយសង្គ្រោះ នៅតែបន្តខ្វះកកាយភក់ រាវរកមនុស្សបន្តទៀត នៅថ្ងៃសៅរ៍អាទិត្យនេះ។
ឥណ្ឌូណេស៊ី ជាប្រទេសរងគ្រោះមួយនៅជ្រោយអាស៊ីប៉ែកនីរតី ជាចំណីនៃទឹកជំនន់ យ៉ាងញឹកញយ នារដូវភ្លៀង។ ជំនន់ទឹកភ្លៀងខ្លាំង បានសម្លាប់ពលរដ្ឋឥណ្ឌូណេស៊ី ប្រមាណ៧០នាក់ នៅក្បែរក្រុងហ្សាការតា និងនៅកោះជ្វា កាលពីដើមឆ្នាំ២០២០។ ហើយនៅឆ្នាំ២០១៣ ក៏មានជំនន់ទឹកភ្លៀង សម្លាប់មនុស្សអស់ជាច្រើននាក់ដែរ នៅតំបន់ក្រុងហ្សាការតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ