ចិនបញ្ចូនយន្តហោះប្រដេញទៅព្រំដែន ស្របពេលជំនួបអាមេរិកនិងតៃវ៉ាន់
ចុះផ្សាយនៅថ្ងៃ៖
ស្តាប់ - ០៦:០៧
ថ្ងៃចន្ទទី១០សីហា រដ្ឋមន្ត្រីសុខាភិបាលអាមេរិក លោក Alex Azar បានជួបមេដឹកនាំតៃវ៉ាន់ ដូចការគ្រោងទុក។ ទស្សនកិច្ចរបស់រដ្ឋមន្រ្តីអាមេរិកនៅតៃវ៉ាន់ លើកនេះ ជាដំណើរទស្សនកិច្ចថ្នាក់ខ្ពស់ដ៏កម្រ ចាប់តាំងពីសហរដ្ឋអាមេរិក ប្តូរនយោបាយការបរទេសពី«ការទទួលស្គាល់រដ្ឋតៃវ៉ាន់» ទៅទទួលស្គាល់ចិនដីគោកវិញ កាលពីឆ្នាំ១៩៧៩។ ទស្សនកិច្ចផ្លូវការរយៈពេលបីថ្ងៃរបស់មន្ត្រីជាន់ខ្ពស់អាមេរិកនេះ គឺស្ថិតក្នុងបរិបទពិសេសនៃវិបត្តិកូវីដ១៩ផង និងបរិបទនៃស្ថានការណ៍ដ៏តាន់តឹងខ្លាំងរវាង អាមេរិកនិងចិន ផង។
ចិនខឹងខ្លាំង និងបញ្ចូនយន្តហោះប្រដេញឱ្យហោះហើរនៅព្រំដែន។
ចិនមិនសប្បាយ និងខឹងច្រលោត គឺជាការធម្មតា ព្រោះសម្រាប់ចិន តៃវ៉ាន់ជាទឹកដីរបស់ខ្លួន ជាខេត្តរបស់ខ្លួន។ តាំងពីសប្តាហ៍មុន មុនពេលលោករដ្ឋមន្ត្រីអាមេរិកទៅជាន់ដីតៃវ៉ាន់ ថ្ងៃអាទិត្យម្សិលមិញម្ល៉េះ ដែលចិនបានថ្កោលទោសអាមេរិក និងព្រមានឱ្យលុបចោលដំណើរទស្សនកិច្ចនេះ ហើយនិងបានដាស់តឿនថា ទស្សនកិច្ចនេះវាបង្កការគំរាមកំហែងដល់សន្តិភាពនិងស្ថិរភាព ក្នុងតំបន់។
ថ្ងៃចន្ទនេះទៀត នៅមុនពេលបន្តិចនៃជំនួបសន្ទនាគ្នារវាងរដ្ឋមន្ត្រីអាមេរិក និងប្រធានាធិបតីស្រីតៃវ៉ាន់ ឆៃ អ៊ីងវេន គឺ ចិនបានបញ្ចូនយន្តហោះប្រដេញជាច្រើនគ្រឿង ទៅហោះហើរក្បែរៗព្រំដែនទឹក ជាប់រវាងចិននិងតៃវ៉ាន់។ នេះបើតាមព័ត៌មានពីក្រុមយោធាតៃវ៉ាន់ ដែលប្រាប់អ្នកកាសែតបារាំង AFP ។
ទោះបីជានៅក្រោមកំហឹងចិនយ៉ាងណាក្តី ក៏រដ្ឋមន្រ្តីអាមេរិកនិងប្រធានាធិបតីតៃវ៉ាន់ នៅតែអាចជជែកពិភាក្សាគ្នាបានយ៉ាងល្អូកល្អើន។ អាមេរិកកោតសរសើរតៃវ៉ាន់ជាច្រើនចំពោះចំណាត់ការទប់ស្កាត់កូវីដ ហើយតៃវ៉ាន់វិញ ក៏អរគុណសម្បើមណាស់ដែរ ចំពោះការគាំទ្ររបស់អាមេរិក។
អាមេរិកកោតសរសើរតៃវ៉ាន់ចំពោះចំណាត់ការទប់ស្កាត់កូវីដ ពីព្រោះថា តាមរយៈរបាយការណ៍ផ្លូវការ ក្នុងចំណោមប្រជាជនតៃវ៉ាន ប្រមាណជាង ២៣លាននាក់ គឺតៃវ៉ាន់មានអ្នកឆ្លងកូវីដ១៩ តិចជាង៥០០ករណី ហើយមានស្លាប់តែ៧នាក់ប៉ុណ្ណោះ។ សម្រាប់អាមេរិក គឺតៃវ៉ាន់ បានចាត់ចែងចំណាត់ការទប់ទល់មេរោគ យ៉ាងមានប្រសិទ្ធភាព និងល្អជាងគេលើពិភពលោក បើទោះបីជា តៃវ៉ាន នៅក្បែរជាប់ចិនដែលផ្ទុះមេរោគមុនគេក្តី។ រដ្ឋមន្ត្រីសុខាភិបាលអាមេរិក លោក Alex Azar ថ្លែងសរសើរទៀតថា ចំណាត់ការយ៉ាងមានប្រសិទ្ធភាពរបស់តៃវ៉ាននេះ គឺស្តែងបង្ហាញពីភាពបើកចំហ តម្លាភាព មានប្រជាធិបតេយ្យពិតប្រាកដ ក្នុងសង្គមនិងវប្បធម៌តៃវ៉ាន់។
ចំណែកប្រធានាធិបតីតៃវ៉ាន់ វិញ លោកស្រី ឆៃ អ៊ីងវេន អរគុណអាមេរិកជាថ្មី ដែលសហរដ្ឋអាមេរិកបានគាំទ្របេក្ខភាពតៃវ៉ាន់ជាអ្នកសង្កេតការណ៍នៅក្នុងអង្គការសុខភាពពិភពលោក។ បើទោះជាបេក្ខភាពនេះ ត្រូវប្រទេសចិនច្រានចោលក៏ដោយ។ គួររម្លឹកថា កាលពីឧសភា នៅក្រុងហ្សឺណែវ ប្រទេសស្វីស អង្គការសុខភាពពិភពលោក បានរៀបចំកិច្ចប្រជុំមួយស្តីពីបេក្ខភាពតៃវ៉ាន់ជាអ្នកសង្កេតការណ៍ ក៏ប៉ុន្តែចិនបដិសេធយ៉ាងដាច់អហង្ការ។ នៅថ្ងៃនេះ លោកស្រី ឆៃ អ៊ីងវេន បានរម្លឹករិះគន់ចិនថា មិនគួរយកទស្សននយោបាយទៅលាយឡំនឹងរឿងសុខភាពសោះ ហើយលោកស្រីសោកស្តាយជាខ្លាំងចំពោះការបដិសេធរបស់ចិន ដែលមិនឱ្យតៃវ៉ានចូលជាសមាជិករបស់អង្គការសុខភាពពិភពលោក។
យ៉ាងណាក៏ដោយ សហរដ្ឋអាមេរិកនៅតែគាំទ្រខាងតៃវ៉ាន់ជានិច្ច។ ចំពោះមុខអ្នកកាសែត ក្នុងជំនួបជាមួយប្រធានាធិបតីស្រីតៃវ៉ាន់, រដ្ឋមន្ត្រីសុខាភិបាលអាមេរិក បញ្ជាក់ថា «តៃវ៉ាន់និងអាមេរិកមានតម្លៃរួមគ្នា នោះគឺប្រជាធិបតេយ្យ សេរីភាពជួញដូរពាណិជ្ជកម្ម និងសិទ្ធិសេរីភាព។» លោក Alex Azar ក៏បានពាំនាំពាក្យ នាំសារពីរដ្ឋបាលក្រុងវ៉ាស៊ីនតោន ដែលលោកចង់លើកសង្កត់ធ្ងន់ ជាថ្មី នៅគ្រានេះ គឺពីកិច្ចសហការទ្វេភាគីរវាងតៃវ៉ាន់និងអាមេរិក មានភាពស៊ីជម្រៅ គ្រប់ជ្រុងជ្រោយ ទៅលើគ្រប់ទិដ្ឋភាព ទាំងផ្នែកសន្តិសុខ និង សុខាភិបាល។
រដ្ឋមន្ត្រីអាមេរិកទៅតៃវ៉ាន់ បញ្ឆេះកំហឹងចិន ជៀសមិនរួច តែវាស្ថិតនៅក្នុងកាលៈទេសៈមួយពិសេស។ អ្នកវិភាគនិងអ្នកជំនាញ យល់ថា អាមេរិក ក៏មិនចង់ដើររំលង«បន្ទាត់ក្រហម»ដែលគូសដោយចិនប៉េកាំងដែរ។
ជាការពិត ការបញ្ចូនរដ្ឋមន្ត្រីអាមេរិកទៅតៃប៉ិ គឺសឱ្យឃើញថា អាមេរិកបានចូលក្បែរកៀកកិតបំផុតបន្ទាត់ក្រហមដែលចិនកំណត់ខណ្ឌ។ បន្ទាត់ក្រហមនេះ គឺចិនហាមដាច់ខាត ថាគ្មានត្រូវបញ្ចូនទីប្រឹក្សាសន្តិសុខ ឬរដ្ឋមន្ត្រីទទួលបន្ទុកសន្តិសុខជាតិអាមេរិក ទៅតៃវ៉ាន់ នោះទេ។
ជាក់ស្តែង នាកន្លងមក សហរដ្ឋអាមេរិក ក៏គោរពលក្ខខណ្ឌនេះដែរ។ ប្រមាណ៤០ឆ្នាំចុងក្រោយនេះ តាំងពីអាមេរិកាំងទទួលស្គាល់គោលនយោបាយចិនតែមួយមក គឺជាផ្លូវការ ពុំមានដំណើរទស្សនកិច្ចថ្នាក់រដ្ឋមន្ត្រីការពារជាតិ ទៅតៃប៉ិ នោះឡើយ។ កាលអំឡុងឆ្នាំ១៩៩០ គឺមានមន្ត្រីជាន់ខ្ពស់អាមេរិកខាងពាណិជ្ជកម្ម ចុះទៅតៃវ៉ាន់ច្រើនសា បង្កក្តីតាន់តឹងខ្លាំងបន្តិចដែរ ហើយឆ្នាំ២០១៤ គឺមានត្រឹមតែទស្សនកិច្ច របស់មន្ត្រីជាន់ខ្ពស់និងអ្នកជំនាញខាងបរិស្ថានអាកាសធាតុប៉ុណ្ណោះ។
ពេលនេះ ស្ថិតក្នុងដំណាក់កាលដែលពិភពលោកជួបគ្រោះភ័យមេរោគកូវីដ, ការបញ្ចូនរដ្ឋមន្ត្រីសុខាភិបាលអាមេរិកទៅតៃវ៉ាន់ គឺបង្ហាញរូបផ្សេង។ អាចថា ក្នុងបរិបទនៃការរៀនសូត្រពីចំណាត់ការទប់ស្កាត់កូវីដ ដែលតៃវ៉ានចាត់ចែងបានល្អ មានប្រសិទ្ធភាព។ ក៏ប៉ុន្តែ ការបញ្ចូនមន្ត្រីលំដាប់ថ្នាក់សក្តិរដ្ឋមន្ត្រីទៅតៃវ៉ាន់ ចំពេលដែល ចិន និងអាមេរិក កំពុងតែមានភាពតាន់តឹងគ្នាដ៏សម្បើម ដូចសព្វថ្ងៃនេះ គឺជាចេតនាបង្កហេតុ ដូចជាយកដៃចាក់ភ្នែកចិន អ៊ីចឹងដែរ។
នេះបើតាមការយល់ឃើញរបស់អ្នកជំនាញ លោក Douglas Paal ដែលធ្លាប់ដឹកនាំវិទ្យាស្ថានអាមេរិកនៅតៃវ៉ាន់។ បើតាមការវិភាគរបស់អ្នកជំនាញរូបនេះ ការបញ្ចូនរដ្ឋមន្ត្រីសុខាភិបាលទៅតៃវ៉ាន់ ជាការបង្ហាញថា សហរដ្ឋអាមេរិក នៅគោរពបន្ទាត់ក្រហមរបស់ចិន តែក៏ចង់ទៅកៀកៗក្បែរៗនឹងព្រំខណ្ឌដែលចិនគូសដែរ។ និយាយបែបផ្សេង អាមេរិកចង់ទៅឱ្យកៀកបំផុតនឹងបន្ទាត់ក្រហម តែក៏មិនដើររំលងព្រំខណ្ឌដែរ ដោយគ្រាន់តែឆ្កឹះរុកភ្នែកឱ្យមហាយក្សចិន ក្តៅក្រហាយតែប៉ុណ្ណោះ ដើម្បីចំណេញប្រយោជន៍នយោបាយក្នុងស្រុក និងនៅថ្នាក់តំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ