ភាពតានតឹងនៅថៃកើនឡើង ក្រោយការចាប់ខ្លួនមេចលនាទាមទារប្រជាធិបតេយ្យ ៣រូប
ចុះផ្សាយនៅថ្ងៃ៖
ស្តាប់ - ០៦:៤០
នៅថៃ ភាពតានតឹងបានកើនឡើងបន្ទាប់ពីមេដឹកនាំចលនាទាមទារប្រជាធិបតេយ្យ ៣ នាក់ ត្រូវអាជ្ញាធរចាប់ខ្លួន។ ក្រុមបាតុករប្រឆាំងរដ្ឋាភិបាលចំនួនរាប់ពាន់នាក់ បានទៅជួបជុំគ្នាសាជាថ្មីនៅឯវិមានប្រជាធិបតេយ្យកណ្តាលទីក្រុងបាងកក នាថ្ងៃអាទិត្យ ទី១៦ សីហានេះ ខណៈដែលក្រុមបាតុករម្ខាងទៀតដែលជាអ្នករាជានិយម ក៏ចេញធ្វើបាតុកម្មដូចគ្នាក្នុងថ្ងៃតែមួយដែរ។
ហេតុអ្វីយុវជនថៃជំនាន់ក្រោយនៅតែបន្តធ្វើការប្រឆាំងតវ៉ានឹងរដ្ឋាភិបាលឥតឈប់?
រយៈពេលប្រមាណជាមួយខែកន្លងមកនេះ គេឃើញមានបាតុកម្មប្រឆាំងរដ្ឋាភិបាលថៃ ដឹកនាំដោយចលនានិស្សិតស្ទើរតែមិនលោះថ្ងៃសោះឡើយ បើទោះបីជាមានវិធានការរឹតត្បិតដើម្បីទប់ស្កាត់ការឆ្លងរាលដាលជំងឺកូវីដ១៩យ៉ាងណាក្តី។ នៅពេលធ្វើបាតុកម្មម្តងៗ គេឃើញបាតុករចំនួនរហូតដល់រាប់ពាន់នាក់និងដែលភាគច្រើនជាយុវជន និស្សិតអាយុក្រោម ៣០ឆ្នាំ នាំគ្នាចេញទៅតវ៉ាទាមទារ៣ចំណុចសំខាន់ៗពីថ្នាក់ដឹកនាំប្រទេសថៃ។
ទី១ គឺទាមទារឲ្យរំលាយសភា។ ទី២ ទាមទារឲ្យសរសេររដ្ឋធម្មនុញ្ញឡើងវិញ និងទី៣ ទាមទារឲ្យអាជ្ញាធរថៃបញ្ឈប់រាល់សកម្មភាពធ្វើទុក្ខបុកម្នេញទៅលើក្រុមអ្នកប្រឆាំង ឬអ្នករិះគន់។
បាតុករថៃដឹកនាំដោយចលនានិស្សិត ដែលយកគំរូតាមសកម្មជនចលនាគាំទ្រលទ្ធិប្រជាធិបតេយ្យរបស់ហុងកុង ធ្លាប់បានអះអាងហើយថា ពួកគេនឹងបន្តធ្វើការប្រឆាំងតវ៉ា ប្រសិនណាបើការទាមទាររបស់ពួកគេទាំងបីចំណុចខាងលើ មិនត្រូវបានផ្តល់ឲ្យទេនោះ។
រឿងគឺវាពិតដូចជាការបញ្ជាក់ប្រាប់របស់ពួកគេមែន។ ក្រោយការចេញធ្វើបាតុកម្មស្ទើរតែរាល់ថ្ងៃ ក្នុងរយៈពេលប្រមាណជាមួយខែកន្លងមកនេះ រដ្ឋាភិបាលនៅតែមិនអើពើ និងព្រមឆ្លើយតបទៅនឹងការស្នើសុំរបស់ពួកគេឡើយ។
មិនតែប៉ុណ្ណោះ អាជ្ញាធរថៃថែមទាំងបានចាប់ខ្លួនមេដឹកនាំចលនាទាមទារប្រជាធិបតេយ្យចំនួន ៣ នាក់ទៀតផងនៅពេលកន្លងមកនេះ។ ជាមួយគ្នានេះ លោកនាយករដ្ឋមន្ត្រី ប្រាយុទ្ធ ចាន់អូចា បែរថែមទាំងនិយាយថាប្រជាជនថៃទូទៅមិនគាំទ្របាតុកម្មទាមទារប្រជាធិបតេយ្យទៅទៀត។
ហេតុដូច្នោះហើយ ទើបក្រុមបាតុករគាំទ្រលទ្ធិប្រជាធិបតេយ្យថៃ កើតទុក្ខមិនសុខចិត្តនិងបានប្រកូកប្រកាសហៅគ្នាចេញធ្វើបាតុកម្មសាជាថ្មីទៀតនៅឯវិមានប្រជាធិបតេយ្យចំកណ្តាលទីក្រុងបាងកក នាថ្ងៃអាទិត្យ ទី១៦ សីហានេះតែម្តង។
ស្ថានការណ៍តវ៉ាក្នុងក្រុងបាងកកនៅថ្ងៃអាទិត្យ ទី១៦ សីហា ឆ្នាំ២០២០នេះ
យ៉ាងហោចណាស់អ្នកតវ៉ាចំនួន ៥ ពាន់នាក់ បានទៅជួបជុំប្រមូលផ្តុំគ្នានៅវិមានប្រជាធិបតេយ្យកណ្តាលទីក្រុងបាងកកនាថ្ងៃអាទិត្យ ទី ១៦ សីហានេះ។ បាតុកម្មលើកនេះ ត្រូវបានគេរាប់ចាត់ចូលជាបាតុកម្មធំបំផុតមួយប្រឆាំងនឹងរដ្ឋាភិបាលថៃ ចាប់តាំងពីវិធានការរឹតត្បិតប្រឆាំងនឹងជំងឺកូវីដត្រូវបានបន្ធូរបន្ថយរួចមក។
គួរគូសបញ្ជាក់ជូនថា បាតុកម្មរបស់អ្នកស្នេហាលទ្ធិប្រជាធិបតេយ្យថៃនាថ្ងៃនេះ ត្រូវបានរៀបចំឡើងដោយក្រុមយុវជនសេរី និងចលនាប្រជាជនសេរីថៃ ក្នុងគោលបំណងដាក់សម្ពាធឲ្យរដ្ឋាភិបាល ឆ្លើយតបទៅនឹងការទាមទាររបស់ពួកគេទាំងបីចំណុចសំខាន់ៗខាងលើ។
បើតាមក្រុមនិស្សិតដែលជាអ្នកដឹកនាំបាតុកម្ម ប្រាប់កាសែតថៃ Bangkokpost បាតុកម្ម គ្រោងធ្វើរហូតដល់ទៅ ៦ ម៉ោង ពោលគឺចាប់ពីម៉ោង៣ ល្ងាច រហូតដល់ម៉ោង៩ យប់ថ្ងៃអាទិត្យនេះ។ ជាមួយគ្នានេះ ពួកគេក៏រំពឹងទៀតថា អ្នកចូលរួមធ្វើបាតុកម្មអាចនឹងកើនរហូតដល់ ១ ម៉ឺន ឬច្រើនជាង ១ ម៉ឺននាក់ឯណោះ។
នៅត្រង់ចំណុចនេះ គួរជ្រាបដែរថាក្នុងចំណោមប្រជាជនថៃដែលទៅចូលរួមធ្វើការប្រឆាំងតវ៉ានឹងរដ្ឋាភិបាលក៏មានផងដែរ លោកផារីត ជីវ៉ារ៉ាក់ (Parit Chiwarak) ដែលជាសកម្មជនយុវជនដ៏លេចធ្លោម្នាក់ និងដែលទើបត្រូវបានដោះលែងឲ្យនៅក្រៅឃុំបណ្តោះអាសន្នដោយការបង់ប្រាក់ធានា កាលពីថ្ងៃសៅរ៍ម្សិលមិញ ក្រោយត្រូវបានចាប់ខ្លួនពីបទចោទប្រកាន់ជាច្រើនរួមទាំងការបះបោរជាដើម។
នៅកន្លែងធ្វើបាតុកម្មឯវិមានប្រជាធិបតេយ្យ កាសែត Bangkokpost បានរាយការណ៍មុននេះបន្តិចថា បាតុករកាន់តែច្រើនឡើងៗបានទៅដល់កន្លែងតវ៉ា ស្របពេលដែលកងកម្លាំងប៉ូលិសជាង ៣០០ នាក់ កំពុងឈរនៅក្បែរនោះដើម្បីការពារសន្តិសុខ។ រហូតមកទល់នឹងពេលនេះដែរ បាតុកម្មនៅបាងកកប្រព្រឹត្តទៅដោយសន្តិភាព គ្មានអំពើហិង្សា ឬក៏ការប៉ះទង្គិចគ្នាណាមួយកើតឡើងនោះទេ។
ក្រុមអ្នករាជានិយមថៃមិនសប្បាយចិត្ត
នៅក្នុងទីក្រុងបាងកកថ្ងៃអាទិត្យនេះ មានបាតកម្មរហូតដល់ពីរ គឺបាតុកម្មប្រឆាំងរដ្ឋាភិបាលដឹកនាំដោយចលនាយុវជនប្រជាធិបតេយ្យថៃ និងបាតុកម្មរបស់ក្រុមអ្នកគាំទ្ររាជានិយម។
ការចេញធ្វើបាតុកម្មកាន់តែច្រើនឡើងៗរបស់ក្រុមយុវជនប្រជាធិបតេយ្យថៃ បានធ្វើឲ្យក្រុមរាជានិយមខឹងសម្បា និងបាននាំគ្នាចេញធ្វើបាតុកម្មដែរ ដើម្បីសម្តែងការមិនពេញចិត្តរបស់ពួកគេចំពោះចលនាគាំទ្រលទ្ធិប្រជាធិបតេយ្យរបស់យុវជនជំនាន់ក្រោយថៃ។
យ៉ាងណាក៏ដោយ បាតុកររាជានិយមមានគ្នាមិនច្រើននោះទេ ពោលមានប្រមាណតែ ៦០ នាក់ប៉ុណ្ណោះ។ នៅថ្ងៃអាទិត្យនេះ គេឃើញអ្នករាជានិយមទាំងនោះ ឈរកាន់ព្រះឆាយាលក្ខមហាក្សត្រថៃ និងបានទៅប្រមូលផ្តុំគ្នាដោយសន្តិភាពដែរ នៅឯវិមានប្រជាធិបតេយ្យ ក្បែរកន្លែងដែលបាតុកម្មប្រឆាំងរដ្ឋាភិបាលកំពុងប្រព្រឹត្តធ្វើទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ