ចលនាប្រជាធិបតេយ្យភូមា អំពាវនាវបាតុកម្មធំក្នុងឱកាស « ទិវាកម្លាំងកងទ័ព » ថ្ងៃទី២៧មីនា
នៅថ្ងៃសៅរ៍ទី២៧មីនានេះ គឺជាទិវាកម្លាំងកងទ័ពជាតិ នៅប្រទេសភូមា។ ឆ្លៀតក្នុងឱកាសនេះ ចលនាប្រជាធិបតេយ្យភូមា បានអំពាវនាវ ឲ្យមានការធ្វើបាតុកម្មទូទាំងប្រទេស ដើម្បីរំលឹកថា កាតព្វកិច្ចរបស់កម្លាំងទ័ព គឺការពារជាតិមាតុភូមិ និងអាយុជីវិតប្រជាពលរដ្ឋ។ សូមបញ្ជាក់ថា គិតត្រឹមពេលនេះ មានបាតុករភូមា ស្លាប់ចំនួនប្រមាណ៣២០នាក់ ដោយសារតែការបង្ក្រាបរបស់សមត្ថកិច្ចនិងកងទ័ពភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
"ទិវាកម្លាំងកងទ័ពជាតិភូមា" ២៧មីនា គឺជាទិវារំលឹកអំពីវីរៈភាពរបស់កងកម្លាំងទ័ពភូមា ដែលបានរំដោះប្រទេស ពីការត្រួតត្រារបស់ជប៉ុន នៅឆ្នាំ១៩៤៥។ គឺលោកឧត្តមសេនីយ៍ អ៊ុងសាន ឪពុករបស់លោកស្រីអ៊ុងសាន ស៊ូជី ដែលបានដឹកនាំការតស៊ូនេះ រហូតភូមាបានទទួលឯករាជ្យ។
ស្ថិតនៅក្នុងបរិបទនៃការបង្រ្កាបបាតុកម្មប្រឆាំងនឹងរដ្ឋប្រហារយោធា នាពេលបច្ចុប្បន្ននេះ ចលនាប្រជាធិបតេយ្យភូមា បានអំពាវនាវ ឲ្យមានបាតុកម្មធំទូទាំងប្រទេសនៅថ្ងៃទី២៧មីនានេះ។ នៅតាមបណ្តាញ Facebook លោក Ei Thinzar Maung សកម្មជនប្រជាធិបតេយ្យម្នាក់ បានសរសេរថា ២៧មីនា ប្រជាជនភូមាទូទាំងប្រទេស និងរួមគ្នាធ្វើបដិវត្ត ផ្តួលរំលំរបបផ្តាច់ការយោធា។
ដោយឡែក កាលពីថ្ងៃសុក្រទី ២៦មីនា ក្រុមសម្ព័ន្ធជាតិការ៉េន (KNU) ដែលជាក្រុមឧទ្ទាមប្រដាប់អាវុធមួយ ធ្វើសកម្មភាពនៅភាគអាគ្នេយ៍ភូមា បានផ្សព្វផ្សាយលិខិតចំហរមួយ ផ្ញើទៅកាន់លោកនាយឧត្តមសេនីយ៍ មីន អ៊ុងឡាំង ដើម្បីជាការឆ្លើយតបទៅនឹងសំណើររបស់កងទ័ពភូមា ដែលចង់ចរចាជាមួយក្រុមប្រដាប់អាវុធនេះ។ ក្រុមសម្ព័ន្ធជាតិការ៉េន បានដាក់កំហិតឲ្យរបបសិកភូមា ត្រូវដោះលែងអ្នកទោសនយោបាយទាំងអស់ ដែលត្រូវបានគេចាប់ខ្លួន ចាប់ពីថ្ងៃធ្វើរដ្ឋប្រហារមក ហើយកងទ័ពភូមា ត្រូវបញ្ឈប់ការប្រើអំពើហិង្សា និងដកខ្លួនឲ្យឆ្ងាយពីជីវិតនយោបាយរបស់ភូមា។
សូមបញ្ជាក់ថា គិតចាប់ពីថ្ងៃទី ១កុម្ភៈមក មានបាតុករភូមាស្លាប់ ចំនួនប្រមាណ៣២០នាក់ ចំណែកមនុស្សដែលត្រូវគេចាប់ឃុំខ្លួន មានប្រមាណ៣០០០នាក់។ នេះបើផ្អែកតាមអង្គការ (AAPP)។ អង្គការនេះអះអាងថា ចំនួនអ្នកស្លាប់អាចមានលើសនេះ ព្រោះថាមានបាតុករបាត់ខ្លួនច្រើនណាស់។ តែយ៉ាងណា ក្នុងសប្តាហ៍នេះ របបសិកភូមាបានដោះលែងអ្នកទោសចំនួន២លើក នៅថ្ងៃពុធ និងថ្ងៃសុក្រ ដោយអ្នកទោសសរុបចំនួនជាង៩០០នាក់ត្រូវបានគេដោះលែង។
គួរកត់សំគាល់ថា សកម្មជននិងអ្នកនយោបាយប្រជាធិបតេយ្យភូមាជាច្រើននាក់ បានរត់គេចខ្លួន ពួនសំងំ នៅតាមទីតាំងផ្សេងៗ ដើម្បីគេចចេញពីការចាប់ខ្លួន។ ដោយឡែក បើផ្អែកតាមលោក Kristian Stokke សាស្ត្រាចារ្យសង្គមវិជ្ជា នៅសកលវិទ្យាល័យក្រុងអូស្លូ បានឲ្យដឹង ចលនាទាមទារលទ្ធិប្រជាធិបតេយ្យរបស់ប្រជាជនភូមានេះ ត្រូវបានស្នើទៅកាន់គណកម្មាធិការណូបែល ដើម្បីទទួលពានរង្វាន់ណូបែលសន្តិភាព ឆ្នាំ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ