នគរបាលហុងកុងចុះចាប់មនុស្ស៥នាក់ ដល់ការិយាល័យកាសែតប្រឆាំង Apple Daily ជាលើកទី២
ព្រឹកថ្ងៃព្រហស្បតិ៍ ទី១៧មិថុនា សមត្ថកិច្ចហុងកុង បានចាប់ខ្លួនមនុស្សចំនួន៥នាក់ នឹងបានចុះទៅរឹបអូសឯកសារ នៅឯទីស្នាក់ការកាសែតប្រឆាំងដ៏ល្បី ឈ្មោះ Apple Daily។ គួរបញ្ជាក់ថា នេះគឺជាលើកទី២ហើយ ក្នុងរយៈពេលមិនដល់មួយឆ្នាំ ដែលសមត្ថកិច្ចហុងកុង ចុះទៅឡោមព័ទ្ធ ចាប់អ្នកកាសែត ដល់ទីស្នាក់ការ ក្រោមបទចោទប្រកាន់ ទាក់ទិននឹងច្បាប់សន្តិសុខជាតិ។ លោក ជីមី ឡៃ ម្ចាស់ក្រុមហ៊ុនកាសែតនេះ កំពុងស្ថិតនៅក្នុងការឃុំឃាំងនៅឡើយ។
ចុះផ្សាយនៅថ្ងៃ៖
ស្តាប់ - ០២:៣០
នគរបាលហុងកុង មានគ្នាជាង៥០០នាក់ បានចុះទៅដល់ទីស្នាក់ការកាសែត Apple Daily នៅព្រឹកថ្ងៃព្រហស្បតិ៍ ទី១៧មិថុនា។ បុគ្គលិកដឹកនាំកាសែតនេះ ចំនួន៥នាក់ ត្រូវបានគេចាប់ខ្លួន ដោយក្នុងនោះមាននិពន្ធនាយកម្នាក់ផង។ យោងតាមនគរបាលហុងកុង ការចាប់ខ្លួននេះ គឺបន្ទាប់ពីកាសែតនេះ បានចុះផ្សាយអត្ថបទមួយ « អំពាវនាវហៅឲ្យមានការដាក់ទណ្ឌកម្មមកលើហុងកុង និងមកលើថ្នាក់ដឹកនាំរដ្ឋបាលហុងកុង »។ ជនទាំង៥នាក់ ត្រូវប្រឈមនឹងបទចោទប្រកាន់ « ឃុបឃិតជាមួយបរទេស ឬ ធាតុខាងក្រៅ សំដៅបង្កគ្រោះថ្នាក់ដល់សន្តិសុខជាតិ »។
លោក Steve Li អគ្គស្នងការនគរបាលហុងកុង បានប្រាប់អ្នកកាសែតថា ជនទាំង៥នាក់ ដែលត្រូវបានចាប់ខ្លួន គឺជាថ្នាក់ដឹកនាំកាសែត Apple Daily។ ដោយយោងលើមុខងារ គឺជនទាំងនេះ ត្រូវទទួលខុសត្រូវ ចំពោះខ្លឹមសារនៃអត្ថបទ ដែលកាសែតនេះចុះផ្សាយ។
សមត្ថកិច្ចហុងកុង បានបញ្ជាក់ផងដែរថា គេបានបង្កកទឹកប្រាក់ចំនួន ១៨លានដុល្លារហុងកុង ដែលជាមូលធនសកម្មរបស់កាសែត Apple Daily ដោយយោងទៅតាមច្បាប់ សន្តិសុខជាតិ ចូលជាធរមាននៅឆ្នាំ២០២០។ ភ្លាមៗនោះ ផ្សារហ៊ុនហុងកុង បានប្រកាសផ្អាកការលក់ភាគហ៊ុន របស់ក្រុមហ៊ុន Next Digital របស់លោក ជីមី ឡៃ។
សូមបញ្ជាក់ថា ភាគច្រើននៃថ្នាក់ដឹកនាំកាសែត គឺត្រូវបាននគរបាលហុងកុង ចុះទៅចាប់ខ្លួនដល់ផ្ទះ រួចហើយបញ្ជូនខ្លួនមកកាន់ទីស្នាក់ការកាសែត នៅវេលាម៉ោង៧ព្រឹក។ យោងតាមវីដេអូផ្សាយផ្ទាល់តាមបណ្តាញហ្វេសបុក ដោយកាសែត Apple Daily គេឃើញសមត្ថកិច្ចហុងកុងជាច្រើននាក់ បានដាក់ព័ទ្ធខ្សែសន្តិសុខ ជុំវិញអាគារទីស្នាក់ការកាសែត ខណៈដែលសមត្ថកិច្ចខ្លះទៀត ចុះទៅរឹបអូសឯកសារ និងពិនិត្យម៉ាស៊ីនកុំព្យូទ័ររបស់អ្នកកាសែត។ លោក Ryan Law និពន្ធនាយក និងលោក Cheung Kim-hung អគ្គនាយកកាសែត Apple Daily ត្រូវបានគេបញ្ជូនខ្លួនចូលទៅទីស្នាក់ការកាសែត ដោយដៃជាប់ចំណង ព័ទ្ធមកក្រោយខ្នង។ បណ្តាញព័ត៌មានអនឡាញហុងកុងមួយទៀត ឈ្មោះ Stand News បានចុះផ្សាយរូបថត បង្ហាញពីទ្វារផ្ទះរបស់លោក Chan Pui-man ដៃស្តាំរបស់លោក ជីមី ឡៃ ត្រូវនគរបាលហុងកុងវាយកំទេច ដើម្បីសំរុកចូលទៅចាប់ខ្លួន។
គួរបញ្ជាក់ថា លោកជីមី ឡៃ មហាសេដ្ឋីនិងជាម្ចាស់ក្រុមហ៊ុនកាសែត Apple Daily កំពុងស្ថិតនៅក្នុងឃុំ រងចាំការកាត់ទោស។ កាសែត Apple Daily របស់លោក បានបង្ហាញជំហរ គាំទ្រចលនាទាមទារលទ្ធិប្រជាធិបតេយ្យ របស់យុវជនហុងកុង ដែលការណ៍នេះ បានធ្វើឲ្យកាសែតនេះ ក្លាយជាសត្រូវធំមួយ របស់រដ្ឋបាលហុងកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ