នយោបាយអភិរក្សធម្មជាតិនេប៉ាល់ រំលោភបំពានសិទ្ធិជនជាតិដើម
បើតាមរបាយការណ៍របស់អង្គការការពារសិទ្ធិមនុស្សអន្តរជាតិ Amnesty International និងអង្គការការពារសិទ្ធិមនុស្សក្នុងស្រុក ដែលចេញផ្សាយនៅថ្ងៃចន្ទទី ៩ សីហា ២០២១ នយោបាយការពារធម្មជាតិរបស់រដ្ឋាភិបាលនេប៉ាល់ប៉ះពាល់និងរំលោភសិទ្ធិជនជាតិដើមណាស់។ ជនជាតិដើមនេប៉ាល់ បានក្លាយជាជនរងគ្រោះ រងការរំលោភបំពាន ធ្វើទុក្ខទារណុកម្ម និងលបធ្វើឃាត ពីសំណាក់អាជ្ញាធរក្រោមផ្លាកការពារបរិស្ថាន។
ចុះផ្សាយនៅថ្ងៃ៖
ស្តាប់ - ០២:១៨
នេប៉ាល់ប្រឹងថែរក្សានិងអភិរក្សធម្មជាតិ សត្វព្រៃប្រឹក្សា ដូចជាសត្វខ្លា រមៀសបានល្អ និងច្រើន ដល់ទៅមួយភាគបួននៃផ្ទៃដីសរុប។ កិច្ចខិតខំប្រឹងប្រែងរបស់រដ្ឋាភិបាលនេប៉ាល់ ត្រូវបានទទួលស្គាល់ដោយសហគមន៍អន្តរជាតិទៀតផង។ ប៉ុន្តែ ដោយសារនយោបាយការពារបរិស្ថាននិងធម្មជាតិនេះ មានប្រជាពលរដ្ឋជាជនជាតិដើមភាគតិច ជាច្រើន ត្រូវបានគេបណ្តេញចេញពីទឹកដីកំណើតពីដូនតារបស់ពួកគេ។ នេះបើតាមរបាយការណ៍បរិហាររបស់អង្គការការពារសិទ្ធិមនុស្សក្នុងស្រុក Community Self-Reliance Centre (CSRC) និងអន្តរជាតិ នាឱកាសទិវាជនជាតិដើមអន្តរជាតិ ថ្ងៃទី ៩ សីហា។
បើតាមលោកស្រីឌីណុយស្ហ៊ីកា ឌីសាណាយ៉ាកេ Dinushika Dissanayake នាយិការងនៃកម្មវិធីអាស៊ីខាងត្បូងរបស់អង្គការAmnesty International តាំងពីឆ្នាំ១៩៧០មក រដ្ឋាភិបាលនេប៉ាល់ បន្តបន្ទាប់គ្នា បានប្រកាន់យកនយោបាយអភិរក្សធម្មជាតិ ដែលកំរិតការស្វែងរកចំណីអាហារនិងថ្នាំសង្កូវ ព្រមទាំងធនធានធម្មជាតិ តាមទម្លាប់ប្រពៃណីបូរាណរបស់ជនជាតិដើមយ៉ាងខ្លាំង។ ការប្រតិបត្តិនយោបាយអភិរក្សយ៉ាងតឹងរ៉ឹងនិងកំណាច បានក្លាយទៅជាការធ្វើទុក្ខទារុណកម្មលើជនជាតិដើមជាច្រើនករណីនិងខ្លះ ក្លាយជាករណីមនុស្សឃាតផង។ នេះបើតាមការអះអាងបន្ថែមរបស់លោកស្រីនាយិករង ដោយលើកឧទាហរណ៍ជាក់ស្តែងករណីជនជាតិដើមម្នាក់ស្លាប់កាលពីខែកក្កដាឆ្នាំ២០២០ ដោយការវាយប្រហារពីសំណាក់យោធាល្បាតព្រៃផង។
ប៉ុន្តែ អ្នកនាំពាក្យនៃការិយាល័យឧទ្យានជាតិនិងអភិរក្សធម្មជាតិ ដែលមិនទាន់បានអានរបាយការណ៍របស់អង្គការការពារសិទ្ធិមនុស្សអន្តរជាតិនិងនេប៉ាល់នៅឡើយវិញ បានអះអាងថារដ្ឋាភិបាលនេប៉ាល់តែងតែសាកល្បងការពារសិទ្ធិជនជាតិដើម មិនឱ្យមានជម្លោះជាមួយច្បាប់ដែរ ព្រោះការពារបរិស្ថានជាអាទិភាពនិងជាទំនួលខុសត្រូវរបស់រដ្ឋាភិបាលដែលក៏គោរពសិទ្ធិរបស់សហគមន៍នៅតាមមូលដ្ឋាននិងជនជាតិដើមភាគតិច។
នយោបាយការពារធម្មជាតិរបស់រដ្ឋាភិបាលនេប៉ាល់ ល្បីរន្ទឺ តែជាជោគជ័យលើគំនរទុក្ខរបស់ជនជាតិដើម ដែលរស់នៅក្នុងតំបន់អភិរក្សនិងដែលរស់អាស្រ័យលើតំបន់អភិរក្ស តាំងពីជាច្រើនជំនាន់មកហើយ។ នេះបើតាមរបាយការណ៍ដដែល ដែលផ្តល់អនុសាសន៍ឱ្យ អាជ្ញាធរនេប៉ាល់កែប្រែច្បាប់បរិស្ថាន ដោយត្រូវតែទទួលស្គាល់សិទ្ធិ សម្បត្តិដើមរបស់ជនជាតិភាគតិច បញ្ចូលជនជាតិដើមទៅក្នុងកម្មវិធីអភិរក្សធម្មជាតិរបស់ខ្លួន និងផ្តល់ជម្រក ជាផ្ទះសម្បែងព្រមទាំងដីធ្លីកសិកម្មដល់ជនជាតិដើមណាដែលរងការប៉ះពាល់ពីនយោបាយបង្កើតឧទ្យានអភិរក្សថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ