ក្លឹបអ្នកឆ្លើយឆ្លងព័ត៌មានបរទេសនៅចិនប្រារព្វខួប៤០ឆ្នាំ ក្នុងបរិបទការងារកាន់តែលំបាក
ក្លឹបអ្នកកាសែតបរទេសនៅចិន (FCCC) បានផ្លុំទៀនប្រារព្វខួប៤០ឆ្នាំហើយ នៅថ្ងៃទី ៤ កញ្ញា២០២១នេះ។ ប៉ុន្តែ អាជ្ញាធរប៉េកាំងនៅតែមិនទទួលស្គាល់ក្លឹបនេះទេ បើទោះបីជាក្លឹបបង្ហាញវត្តមាននៅក្នុងប្រទេសចិន អស់រយៈពេលបួនទសវត្សរ៍ក៏ដោយ។ ចំណែកឯលក្ខខណ្ឌការងាររបស់ក្រុមអ្នកយកព័ត៌មានបរទេសនៅក្នុងប្រទេសចិន កាន់តែដុនដាប។
ចុះផ្សាយនៅថ្ងៃ៖
ស្តាប់ - ០២:១៤
ចាប់កំណើតនៅឆ្នាំ១៩៨១ ក្លឹបអ្នកឆ្លើយឆ្លងព័ត៌មានបរទេសនៅចិន ដែលជាប្រភពផ្តល់ជំនួយ និងសាមគ្គីភាព គ្នាទៅវិញទៅមក ជាក្លឹបខុសច្បាប់សម្រាប់ក្រសែភ្នែកប៉េកាំង។
ពីមុន ក្លឹបមានទីស្នាក់ការតូចមួយនៅលើអាហារដ្ឋានប្រេស៊ីលមួយនាទីក្រុងប៉េកាំង ក្រោយមកក្លឹបទៅជួបប្រជុំគ្នា ឬធ្វើសន្និសីទផ្សេងៗនៅក្នុងបណ្ណាគារអង់គ្លេសមួយ តែបណ្ណាគារនោះត្រូវបិទទ្វារ ... ទីបំផុតនៅឆ្នាំនេះ ក្លឹបអាចប្រារព្វខួប៤០ឆ្នាំរបស់ខ្លួន និងមានការជួបជុំអ្នករួមអាជីពជាច្រើននាក់បាន ដោយសារមានជំនួយពីស្ថានទូតប៉ូឡូញ ជាអ្នកផ្តួចផ្តើមនិងផ្តល់កន្លែងរៀបចំកម្មវិធី។
“១៩៨១ ជាការចាប់ផ្តើមចលនាសាមគ្គីនិងសេរីភាព Solidarnosc ដែលត្រូវបង្ក្រាបដោយច្បាប់អាជ្ញាសឹក និងដែលជានាំដល់ការបិទបញ្ចប់របបសាធារណរដ្ឋប្រជាមានិតប៉ូឡូញនៅឆ្នាំ១៩៨៩ និងក៏ជាឆ្នាំដ៏សំខាន់ដែរ សម្រាប់ក្លឹបអ្នកឆ្លើយឆ្លងព័ត៌មានបរទេសនៅចិន និងប្រទេសចិនផង។” នេះជាប្រសាសន៍របស់លោកឯកអគ្គរដ្ឋទូតប៉ូឡូញប្រចាំក្រុងប៉េកាំង ទៅកាន់ភ្ញៀវជាអ្នកការទូត និងជាសមាជិកក្លឹបអ្នកឆ្លើយឆ្លងព័ត៌មានបរទេស ដោយលើកទឹកចិត្តអ្នកកាសែតឱ្យបន្តធ្វើការងារដ៏មានតម្លៃ ពោលគឺផ្តល់ព័ត៌មានស្តីពីប្រទេសចិនទៀត។
ប៉ុន្តែលក្ខខណ្ឌការងាររបស់អ្នកឆ្លើយឆ្លងព័ត៌មានកាន់តែលំបាក។ ការធ្លាក់ចុះដុនដាបបាន ស្តែងឃើញកាន់តែច្បាស់ចាប់ពីឆ្នាំ២០១២-២០១៣មក។ នារយៈពេលប៉ុន្មានឆ្នាំចុងក្រោយនេះ ប្រជាពលរដ្ឋតាមផ្លូវ កាន់តែច្រើនឡើង លែងតបនឹងមីក្រូរបស់បរទេស ដោយហេតុតែនយោបាយជាតិនិយមជ្រុលរបស់មេដឹកនាំចិនបំផុសផ្សាយតាមប្រព័ន្ធសង្គម គំរាមតាមផ្លូវទូត ក្នុងពេលមានសង្គ្រាមពាណិជ្ជកម្មជាមួយសហរដ្ឋអាមេរិក។ ជាចុងក្រោយ ដោយហេតុតែបម្រាមសុខភាព និងចរាចរណ៍ផ្លូវអាកាសដើម្បីទប់ស្កាត់ការរាតត្បាតនៃជំងឺកូវីដ១៩ ចិន ផ្តាច់ខ្លួនកាន់តែខ្លាំងពីពិភពលោកខាងក្រៅ និងរឹតបន្តឹងវិស័យសារព័ត៌មានកាន់តែខ្លាំង ដែលធ្វើឱ្យអ្នកកាសែតកាន់តែឃ្លាតឆ្ងាយពីហេតុការណ៍។ ក្នុងតែមួយឆ្នាំ២០២០ មានអ្នកកាសែតបរទេស១៨នាក់ត្រូវបានបណ្តេញចេញពីប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ