ស្លាប់យ៉ាងហោចជាង១០០នាក់ ក្នុងមហន្តរាយទឹកជំនន់ បាក់ដី នៅឥណ្ឌា និងនេប៉ាល់
មានមនុស្សស្លាប់យ៉ាងហោង ជាង១០០នាក់ នៅភាគខាងជើងប្រទេសឥណ្ឌា និងនៅនេប៉ាល់ បន្ទាប់ពីជួបគ្រោះមហន្តរាយទឹកជំនន់ និងបាក់រមៀលដីភ្នំ កាលពីថ្ងៃអង្គារទី១៩តុលា។ ភ្លៀងបានធ្លាក់យ៉ាងគំហុក និងបន្តធ្លាក់បន្ថែមទៀត ធ្វើឲ្យអាជ្ញាធរមានការព្រួយបារម្ភ ខណៈដែលមានមនុស្សបាត់ខ្លួនជាច្រើននាក់។
ចុះផ្សាយនៅថ្ងៃ៖
ស្តាប់ - ០២:៣១
យោងតាមតួលេខផ្លូវការ នៅថ្ងៃពុធនេះ នៅឥណ្ឌាមានស្លាប់មនុស្សចំនួន៨៥នាក់ បាត់ខ្លួន១១នាក់ និងនៅនេប៉ាល់ មានស្លាប់៣១នាក់ បាត់ខ្លួន៤៣នាក់។ រដ្ឋ Uttarakhand ស្ថិតនៅភាគខាងជើងឥណ្ឌា ជាប់នេប៉ាល់ គឺជាតំបន់ដែលបានរងគ្រោះ ធ្ងន់ធ្ងរបំផុត ជាមួយនឹងចំនួនមនុស្សស្លាប់ យ៉ាងហោច ៤៦នាក់ កាលពីថ្ងៃអង្គារទី ១៩តុលា ដោយសារតែភ្លៀងធ្លាក់យ៉ាងគំហុក បណ្តាលហូរបាក់ដី បោកផ្តាច់ផ្ទះប្រជាជន។ ចំណែក រដ្ឋ Kerala ជាប់មាត់សមុទ្រនៅភាគខាងត្បូងឥណ្ឌា មានមនុស្សស្លាប់ ចំនួន៣៩នាក់ ដោយសារទឹកជំនន់ តាំងតែពីថ្ងៃសុក្រ សប្តាហ៍មុនមក។
រូបភាពវីដេអូផ្សព្វផ្សាយតាមបណ្តាញព័ត៌មានឥណ្ឌា និងតាមបណ្តាញសង្គម បានបង្ហាញឲ្យឃើញនូវការហូរបោកបក់ បាក់រមៀលដី យ៉ាងលឿនរហ័ស ដោយផ្ទះប្រជាជនខ្លះ ត្រូវបោកកំទេច នាំយកមនុស្សទាំងគ្រួសារទៅជាមួយ ក្នុងមួយប៉ព្រិចភ្នែក។ តំបន់ Nainital និង Almora ក្នុងរដ្ឋ Uttarakhand បានរងគ្រោះខ្លាំងបំផុត។
យោងតាមអាជ្ញាធរឥណ្ឌា និង នេប៉ាល់ គឺភ្លៀងបានធ្លាក់ជោគជាំ យ៉ាងគំហុង ប្រមាណជា៣ថ្ងៃជាប់គ្នា។ ហើយបើតាមការព្យាករណ៍ឧត្តុនិយម ទឹកភ្លៀងនឹងបន្តធ្លាក់ខ្លាំង ក្នុងតំបន់នេះ ចំនួន២ថ្ងៃខាងមុខទៀត។ នៅក្នុងរដ្ឋ Uttarakhand អាជ្ញាធរបានចេញបញ្ជា ឲ្យបិទសាលារៀន និងសកម្មភាពជួបជុំសាសនាទាំងអស់។
គួរបញ្ជាក់ថា ករណីជំនន់ទឹកភ្លៀង ហូរបោកបក់ និងបាក់រមៀលដី តែងកើតមានជារឿយនៅតំបន់ ភាគខាងជើងឥណ្ឌា និងនេប៉ាល់ ដែលជាតំបន់ជួរភ្នំហិមាល័យ។ តែយ៉ាងណា យោងតាមអ្នកជំនាញ ករណីនេះបានកើតឡើងកាន់តែញឹកញាប់ និងកាន់តែកាចសាហាវ។ សីតុណ្ហភាពផែនដីក្តៅកាន់តែខ្លាំង ទឹកកកលើកំពូលភ្នំហិមាល័យ បានរលាយកាន់តែច្រើន បូកផ្សំជាមួយនឹងការកាប់បំផ្លាញព្រៃឈើ និងការសាងសង់ទំនប់វារីអគ្គិសនីផង បានធ្វើឲ្យប្រែប្រួលទាំងស្រុង នូវលំហូរទឹក តាមស្ទឹង ទន្លេក្នុងតំបន់នេះ។
កាលពីខែកុម្ភៈ ដើមឆ្នាំនេះទឹកជំនន់យ៉ាងធ្ងន់ធ្ងរ នៅតំបន់ Rishiganga ក្នុងរដ្ឋ Uttarakhand បានផ្តាច់ជីវិតមនុស្សប្រមាណ២០០នាក់ ហើយមានតែសាកសពជាង៦០តែប៉ុណ្ណោះ ដែលត្រូវបានគេរកឃើញ។ ដោយឡែក រដ្ឋ Kerala ស្ថិតនៅភាគខាងត្បូង ដែលជាតំបន់ទេសចរណ៍ដ៏សំខាន់របស់ឥណ្ឌា ក៏កំពុងតែប្រឈមខ្លាំងណាស់ដែរ ជាមួយនឹងទឹកជំនន់ អាចបណ្តាលឲ្យបាក់ទំនប់វារីអគ្គិសនី។ កាលពីឆ្នាំ២០១៨ ទឹកជំនន់បានផ្តាច់ជីវិតមនុស្ស ជិត៥០០នាក់ នៅក្នុងរដ្ឋនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ