ចិនអំពាវនាវឱ្យប្រជាពលរដ្ឋស្តុកស្បៀងអាហារ
រដ្ឋាភិបាលចិនបានចេញសារណែនាំ នៅល្ងាចថ្ងៃចន្ទទី ១ វិច្ឆិកា ២០២១ ឱ្យប្រជាពលរដ្ឋចិនទាំងអស់ ត្រៀមស្តុកស្បៀងអាហារ ដែលចាំបាច់បំផុត ដើម្បីឆ្លើយតបនឹងសេចក្តីត្រូវការប្រចាំថ្ងៃ និងក្នុងករណីមានភាពអាសន្នបន្ទាន់អ្វីកើតឡើង។ សេចក្តីអំពាវនាវធ្វើឡើងក្នុងខណៈដែលប្រទេសកំពុងសាកល្បងប្រយុទ្ធប្រឆាំងនឹងស្ទុះឡើងជាថ្មីនៃជំងឺរាតត្បាតសកលកូវីដ១៩។
ចុះផ្សាយនៅថ្ងៃ៖
ក្រៅអំពីអំពាវនាវឱ្យស្តុកស្បៀងចាំបាច់ដើម្បីប្រឈមនឹងសេចក្តីត្រូវការប្រចាំថ្ងៃ និងក្នុងករណីមានអាសន្ន ក្រសួងពាណិជ្ជកម្មចិន បានណែនាំឱ្យអាជ្ញាធរមូលដ្ឋាន សម្រួលការធ្វើកសិកម្ម សម្រួលចរន្តផ្គត់ផ្គង់ស្បៀង ព្រមទាំងឃ្លាំមើលឃ្លាំងស្តុកបន្លែ សាច់ និងត្រូវរក្សាសិ្ថរភាពតម្លៃស្បៀងអាហារ។
នៅក្នុងសេចក្តីអំពាវនាវរបស់ក្រសួងពាណិជ្ជកម្ម ចុះផ្សាយតាមទំព័រវេបសាយ គ្មានបញ្ជាក់អំពីមូលហេតុដែលរដ្ឋាភិបាលចិនជំរុញឱ្យប្រជាពលរដ្ឋត្រៀមគិតគូរបំរុងទុកស្បៀងអាហារចាំបាច់ទេ ហើយក៏គ្មានបញ្ជាក់ថាប្រទេសកំពុងរងការគំរាមកំហែងខ្វះស្បៀងអាហារដែរ។
ប៉ុន្តែក្នុងខណៈដែលការប្រកួតកីឡាអូឡាំពិករដូវរងារកាន់តែខិតមកដល់ រដ្ឋាភិបាលចិនខ្លាចក្រែងតែប្រទេសត្រូវប្រឈមនឹងរលកចម្លងរាតត្បាតកូវីដ១៩ ជាថ្មី ទើបត្រូវសម្រេចចាត់វិធានការយ៉ាងតឹងតែងនិងទាន់ហន់បំផុត។ គ្រាន់តែមានលេចករណីឆ្លងកើនឡើងជិត១០០ករណីក្នុងមួយថ្ងៃ (៧១នាក់ នៅថ្ងៃអង្គារនិង៩២នាក់កាលពីថ្ងៃចន្ទ) ចិនបានសម្រេចបិទខ្ទប់ខេត្តភាគខាងជើងជាមួយប្រជាជនយ៉ាងហោច៦លាននាក់។
គេនៅចងចាំបានថា កាលពីដើមឆ្នាំ ២០២០ ក្នុងពេលកំពុងផ្ទុះកូវីដ១៩ខ្លាំងដំបូង បណ្តាញផ្គត់ផ្គង់ស្បៀងអាហារចិនជួបការរអាក់រអួលយ៉ាងខ្លាំង ដោយហេតុតែចិនបានបិទខ្ទប់ប្រទេសអស់មួយភាគធំ ឯបណ្តាញផ្លូវសំខាន់ៗក៏ត្រូវកាត់ផ្តាច់មួយរយៈ។ កាលណោះ លោកប្រធានាធិបតីចិន ស៊ីនជីនពីង បានអំពាវនាវឱ្យប្រជាពលរដ្ឋចេះសន្សំសំចៃ និងកុំខ្ជះខ្ជាយអាហារ។ ម្យ៉ាងទៀត ដោយហេតុអាកាសធាតុប្រែប្រួល នៅរដូវវស្សាថ្មីៗនេះ ចិនរងគ្រោះទឹកជំនន់យ៉ាងធ្ងន់ធ្ងរ ដែលបង្កឱ្យមានការខូតខាតផលដំណាំកសិកម្ម និងធ្វើទំនិញឡើងថ្លៃយ៉ាងខ្លាំង។
ជាចុងក្រោយ ក្នុងនាមជាប្រទេសនាំចូលផលិតផលស្បៀងអាហារលំដាប់លេខមួយពិភពលោក ស្ថានភាពស្បៀងអាហារចិនកាន់តែផុយស្រួយ ដោយហេតុតែវិបត្តិការទូតនិងសង្គ្រាមពាណិជ្ជកម្មជាមួយអាមេរិក កាណាដា ឬអូស្ត្រាលី។ កាលពីខែមុន ស្បៀងអាហារចាំបាច់ចំនួន២៨មុខ បានឡើងថ្លៃ១៦% បើប្រៀបទៅនឹងខែមុន។
ក្នុងប្រវត្តិសាស្ត្រ ចិនធ្លាប់ជួបគ្រោះទុរ្ភិក្ស ជាញយដង ជាពិសេសគ្រោះទុរ្ភិក្សនៅចុងឆ្នាំ១៩៥០ និងនៅដើមទសវត្សរ៍ឆ្នាំ១៩៦០ នៅពេលរដ្ឋាភិបាលរបបកុម្មុយនិស្ត ប្រមូលដីដាក់ជារបស់សមូហភាព បណ្តាលឱ្យប្រជាជនអស់រាប់សិបលាននាក់ស្លាប់បាត់បង់ជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ