អ.ស.ប. ចង់ឃើញចិនអនុញ្ញាត ឲ្យលោកស្រីប្រធានឧត្តមស្នងការសិទ្ធិមនុស្ស ទៅពិនិត្យនៅស៊ីនជាំង
នៅក្នុងឱកាសចូលរួមកម្មវិធីបើកសម្ពោធកីឡាអូឡាំពិករដូវរងារ នៅទីក្រុងប៉េកាំង លោកអង់តូនីញ៉ូ ហ្គូទែស អគ្គលេខាធិការនៃអង្គការសហប្រជាជាតិ បានជួបជាមួយលោកប្រធានាធិបតីចិន ស៊ី ជីនពីង។ យោងតាមលិខិតប្រកាស ក្នុងជំនួបនោះ លោកអគ្គលេខាធិការអង្គការសហប្រជាជាតិ បានប្រាប់ទៅលោកស៊ី ជីនពីងថា លោករំពឹងរងចាំ ឲ្យភាគីចិនអនុញ្ញាត ឲ្យលោកស្រី មីឈែល បាឆឺឡេ ប្រធានឧត្តមស្នងការសិទ្ធិមនុស្ស អាចចុះទៅពិនិត្យដោយឯករាជ្យ នៅតំបន់ស៊ីនជាំង នាពេលឆាប់ៗខាងមុខនេះ។
ចុះផ្សាយនៅថ្ងៃ៖
ស្តាប់ - ០២:០៧
លោកអគ្គលេខាធិការអង្គការសហប្រជាជាតិ បានអញ្ជើញទៅចូលរួមកម្មវិធីបើកកីឡាអូឡាំពិករដូវរងារទីក្រុងប៉េកាំង។ ក្រោយកម្មវិធីនេះ លោកបានជួបជាមួយលោកស៊ី ជីនពីង ដែលក្នុងជំនួបនោះ លោកបានលើកឡើង អំពីសំណុំរឿងជនជាតិអ៊ុយហ្គួរ នៅតំបន់ស៊ីនជាំង។
យោងតាមលិខិតប្រកាសរបស់អង្គការសហប្រជាជាតិ លោកអង់តូនីញ៉ូ ហ្គូទែស បានប្រាប់ទៅលោកស៊ី ជីនពីងថា លោកចង់ឲ្យក្រុមងារងារឧត្តមស្នងការដ្ឋានសិទិ្ធមនុស្ស និងភាគីរដ្ឋាភិបាលចិន ទាក់ទងគ្នា ដើម្បីរៀបចំឲ្យលោកស្រីមីឈែល បាឆឺឡេ អាចចុះមកទស្សនកិច្ចនិងពិនិត្យ "ដោយឯករាជ្យ" នៅក្នុងប្រទេសចិន ដោយរាប់ទាំងតំបន់ស៊ីនជាំងផងដែរ។
ដោយឡែក យោងតាមលិខិតប្រកាសរបស់ភាគីចិននៅក្រោយជំនួបនេះ គឺមិនបានកត់ត្រាអំពីការនិយាយគ្នា ទាក់ទិននឹងបញ្ហាសិទ្ធិមនុស្សនៅតំបន់ស៊ីនជាំងទេ។
គួរបញ្ជាក់ថា ចិនត្រូវបានក្រុមប្រទេសលោកខាងលិចមួយចំនួនធំ ចោទប្រកាន់ថាបាននឹងកំពុងតែប្រើគោលនយោបាយ បោសសំអាតជាតិសាសន៍នៅខេត្តស៊ីនជាំង។ អង្គការសិទ្ធិមនុស្សខ្លះបានលើកឡើងអំពីអំពើរំលោភសិទ្ធិមនុស្សធ្ងន់ធ្ងរ មានទម្រង់ជាឧក្រិដ្ឋកម្មប្រឆាំងមនុស្សជាតិ និងបទឧក្រិដ្ឋប្រល័យពូជសាសន៍។ យ៉ាងណាមិញ ប្រទេសមួយចំនួនដូចជាសហរដ្ឋអាេមរិក អង់គ្លេសជាដើម មិនបានបញ្ជូនគណៈប្រតិភូផ្លូវការ ទៅចូលរួមកម្មវិធីសម្ពោធកីឡាអូឡាំពិកនៅក្រុងប៉េកាំងទេ ដើម្បីបង្ហាញពីការថ្កោលទោស ទៅលើរដ្ឋាភិបាលចិន។
លោកស្រីមីឈែល បាឆឺឡេ ប្រធានឧត្តមស្នងការសិទ្ធិមនុស្ស បានស្នើទៅកាន់រដ្ឋាភិបាលចិន ជាច្រើនឆ្នាំមកហើយ ដោយសុំចូលទៅតំបន់ស៊ីនជាំង ដើម្បីបើកការស៊ើបអង្កេត ដោយឯករាជ្យ។ ជាការស្នើសុំដែលភាគីចិនបានបដិសេធជានិច្ច។ ទើបតែ កាលពីចុងខែមករាថ្មីៗនេះ លោក ចាវ លីជាន អ្នកនាំពាក្យរដ្ឋាភិបាលចិន បានបញ្ជាក់ថាចិនអាចអនុញ្ញាតឲ្យលោកស្រី មីឈែល បាឆឺឡេ មកទស្សនកិច្ចនៅប្រទេសចិន តែចាំឲ្យចប់កម្មវិធីប្រកួតកីឡាអូឡាំពិកសិន។ តែយ៉ាងណា អ្នកនាំពាក្យរូបនេះ អះអាងថារដ្ឋាភិបាលចិន អនុញ្ញាតិឲ្យមានការចូលទៅតំបន់ស៊ីនជាំង ជាលក្ខណៈ « ទស្សនកិច្ចមិត្តភាព » តែប៉ុណ្ណោះ ដោយមិនឲ្យមានការស៊ើបអង្កេតអ្វីទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ