ចិនព្រមទទួលទស្សនកិច្ចរបស់ឧត្តមស្នងការសិទ្ធិមនុស្សអង្គការសហប្រជាជាតិ នៅស៊ីនជាំង
បន្ទាប់ពីរង់ចាំអស់ជាច្រើនឆ្នាំ នៅទីបំផុត ឧត្តមស្នងការសិទ្ធិមនុស្សអង្គការសហប្រជាជាតិ លោកស្រី មីឆែល បាស្ហឺឡេ Michelle Bachelet នឹងអញ្ជើញទៅបំពេញទស្សនកិច្ចនៅប្រទេសចិន នៅខែឧសភាខាងមុខ។ រដ្ឋាភិបាលចិនទើបឆ្លើយព្រមព្រៀង កាលពីពេលថ្មីៗនេះ។ នេះ បើតាមការអះអាងរបស់លោកស្រីឧត្តមស្នងការ ទៅកាន់ក្រុមប្រឹក្សាសិទ្ធិមនុស្សនៅទីក្រុងហ្សឺណែវ។
ចុះផ្សាយនៅថ្ងៃ៖
ស្តាប់ - ០២:០៣
លោកស្រីឧត្តមស្នងការសិទ្ធិមនុស្សបានសុំធ្វើដំណើរទៅតំបន់ស៊ីនជាំង ដោយត្រឹមត្រូវ និងដោយគ្មានការរារាំង តាំងពីជាច្រើនឆ្នាំមកហើយ។ តែប៉េកាំងតែងតែបដិសេធជារៀងរហូតមក រាល់គំនិតចង់ចុះទៅអង្កេតនៅស៊ីនជាំង និងយល់ថារាល់គ្រប់ទស្សនកិច្ចនៅតំបន់នេះត្រូវមានលក្ខណៈជាមិត្តភាព។ ប៉េកាំងទើបព្រមទទួលលោកស្រី នាពេលថ្មីៗនេះ បន្ទាប់ពីភាគីទាំងពីររកឃើញកិច្ចព្រមព្រៀងអំពីលក្ខខណ្ឌនៃវិធីសាស្ត្រអង្កេត និងអំពីលក្ខខណ្ឌនៃជំនួបជាមួយសង្គមស៊ីវិល។
ដូច្នេះទស្សនកិច្ចជាផ្លូវការរបស់លោកស្រីឧត្តមស្នងការនៅប្រទេសចិន នឹងអាចប្រព្រឹត្តនៅខែឧសភា។ ប៉ុន្តែនៅខែមេសាក្រោយនេះ សហការីរបស់លោកស្រី និងរដ្ឋាភិបាល ផ្តើមរៀបចំ និងទៅត្រួសត្រាយមុន នៅក្នុងតំបន់ជាច្រើនរបស់ប្រទេស រាប់ទាំងតំបន់ស៊ីនជាំងដែលជាប់ចោទថាជាកន្លែងមានប្រព្រឹត្តអំពើប្រល័យពូជសាសន៍ជនជាតិភាគតិចកាន់សាសនាអ៊ីស្លាមអ៊ុយហ្គួរ។
សេចក្តីប្រកាសចេញទៅបំពេញទស្សនកិច្ចនៅស៊ីនជាំងបានទទួលការអបអរស្វាគមន៍យ៉ាងខ្លាំង ហើយភ្លាមមួយរំពេច អង្គការក្រៅរដ្ឋាភិបាល និងអង្គការការពារសិទ្ធិមនុស្សជិត២០០អង្គការ បានចេញលិខិតចំហមួយ ទាមទារឱ្យលោកស្រីផ្សព្វផ្សាយ ដោយគ្មានបង្អង់ របាយការណ៍សិទ្ធិមនុស្សនៅស៊ីនជាំង ដែលសន្យាផ្សាយតាំងពីយូរមកហើយ។
ក្រុមអង្គការហត្ថលេខីនៃលិខិតចំហ ដែលមានជាអាទិ៍អង្គការ Human Rights Watch និង Amnesty International យល់ថាការផ្សព្វផ្សាយរបាយការណ៍សិទ្ធិមនុស្សនៅស៊ីនជាំង ជាការចាំបាច់ណាស់ សម្រាប់ផ្តល់សារដល់ជនរងគ្រោះ និងដល់ប្រទេសអ្នកប្រព្រឹត្តល្មើស ថាគ្មាននរណានៅលើច្បាប់អន្តរជាតិទេ ទោះជាមហាអំណាចក៏ដោយ។ តាមគម្រោង របាយការណ៍ត្រូវចេញនៅដើមឆ្នាំ តែបែរជាអាក់ខានរហូតមកទល់នឹងពេលនេះ។
បើតាមអង្គការការពារសិទ្ធិមនុស្ស មានជនជាតិអ៊ុយហ្គួរ និងជនជាតិភាគតួកគី យ៉ាងហោចណាស់១លាននាក់ ភាគច្រើនកាន់សាសនាអ៊ីស្លាម បាន ឬ កំពុងជាប់ឃុំឃាំងក្នុងជម្រំលត់ដំនៅស៊ីនជាំង ក្រោមការត្រួតពិនិត្យយ៉ាងតឹងតែងពីអាជ្ញាធរ។ ប៉ុន្តែប៉េកាំងតែងច្រានចោលរាល់គ្រប់ពាក្យចោទប្រកាន់ទាំងអស់ ដោយអះអាងថា ជំរំនោះជាមជ្ឈមណ្ឌលអប់រំវិជ្ជាជីវៈ សង្គ្រោះយុវវជនពីឱ្យចេញឆ្ងាយពីមនោគមវិជ្ជាភេរវនិយម និងផ្តាច់ទឹកដីនិយម ក្រោយមានភេរវកម្មអ៊ីស្លាមជ្រុលនិយមជាច្រើនពីសំណាក់ក្រុមផ្តាច់ទឹកដីនិយមអ៊ុយហ្គួរ។
ប្រឈមនឹងក្តីព្រួយបារម្ភចំពោះការបង្ក្រាបបុគ្គលដែលហ៊ានបញ្ចេញមតិស្តីពីសិទ្ធិមនុស្ស ឬរិះគន់អាជ្ញាធរ លោកស្រី បាស្ហឺឡេ បានអះអាងនៅថ្ងៃអង្គារនេះដែរថា លោកស្រីបានលើកយកមកនិយាយជាមួយរដ្ឋាភិបាលចិន និងបានលើកទឹកចិត្តឱ្យអាជ្ញាធរប៉េកាំងធានាគោរពសេរីភាពនៃការបញ្ចេញមតិនិងយោបល់ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ