ភូមាចាប់ខ្លួនជនជាតិជប៉ុនម្នាក់ពីបទចូលរួមធ្វើបាតុកម្ម
អាជ្ញាធរភូមាបានចាប់ខ្លួនជនជាតិជប៉ុនម្នាក់ ដែលបានចូលរួមធ្វើបាតុកម្មនៅក្រុងរ៉ង់ហ្គូន កាលពីថ្ងៃសៅរ៍ទី៣០កក្កដា២០២២។ នេះបើតាមសេចក្តីប្រកាសរបស់សកម្មជនភូមា។ នៅថ្ងៃចុងសប្តាហ៍កន្លងទៅ មានសកម្មជនសិទ្ធិមនុស្សនិងប្រជាធិបតេយ្យជាច្រើនបាននាំគ្នាធ្វើបាតុកម្ម ប្រឆាំងនឹងរដ្ឋាភិបាលសឹកភូមា ដែលប្រកាសប្រហារជីវិតសកម្មជនប្រឆាំងចំនួនបួននាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
បើតាមសកម្មជន និងសារព័ត៌មានភូមា ជនជាតិជប៉ុន ដែលរបបសឹក ចាប់ខ្លួនបាន មានឈ្មោះ Taru Kubota ជាសមិទ្ធករភាពយន្តឯកសារ ដែលចាប់អារម្មណ៍ជាពិសេសនឹងជម្លោះជាតិពិន្ធុនិងបញ្ហាអន្តោប្រវេសន៍។ មានអាយុខ្ទង់២០ឆ្នាំ តារ៉ូ គុយបូតា បានមកចូលរួមក្នុងបាតុកម្មនៅក្នុងសង្កាត់ South Dragon នាទីក្រុងរ៉ង់ហ្គូន កាលពីថ្ងៃទី ៣០កក្កដា នៅវេលាម៉ោងបីរសៀល ដើម្បីថតទិដ្ឋភាពបាតុកម្ម ហើយបន្តិចក្រោយមកអ្នកកាសែតរូបនេះក៏បានធ្វើដំណើរទៅចំណតឡាន។ គឺនៅទីនោះហើយ ដែលតារ៉ូ គុយបូតា ត្រូវចាប់ខ្លួន ជាមួយមនុស្សបីនាក់ផ្សេងទៀត។ នេះបើតាមការរៀបរាប់របស់សកម្មជនម្នាក់ស្និទ្ធនឹងអង្គការYangon Democratic Youth Strike។
ទីភ្នាក់ងារសារព័ត៌មាន Reuters មិនអាចផ្ទៀងផ្ទាត់ព័ត៌មាននេះដោយឯករាជ្យទេ ព្រោះអ្នកនាំពាក្យរដ្ឋាភិបាលសឹកភូមា មិនព្រមធ្វើអត្ថាធិប្បាយតបនឹងសំណួរតាមទូរស័ព្ទ។ ចំណែកអាជ្ញាធរជប៉ុនក៏បដិសេធ មិនផ្តល់អត្តសញ្ញាណរបស់បុរសដែលអាជ្ញាធរភូមាបានចាប់ខ្លួននោះដែរ។ ប៉ុន្តែស្ថានទូតជប៉ុនប្រចាំក្រុងណៃពិដោ បានដាក់សម្ពាធឱ្យភូមាដោះលែងពលរដ្ឋខ្លួនហើយ។ នេះបើតាមប្រភពដដែល។
សូមបញ្ជាក់ថា កាលពីថ្ងៃសៅរ៍ទី ៣០កក្កដា ពលរដ្ឋភូមាជាច្រើនបានជំនះ ធ្វើបាតុកម្ម នៅទីក្រុងរ៉ង់ហ្គូន ដើម្បីបរិហារសេចក្តីសម្រេចរបស់រដ្ឋាភិបាលយោធាភូមា ដែលបានប្រកាសកាលពីថ្ងៃចន្ទទី ២៥កក្កដាប្រហារជីវិតសកម្មជនប្រជាធិបតេយ្យបួននាក់ ក្នុងនោះម្នាក់ជាសមាជិកសភាបក្សប្រឆាំង។ បើតាមអង្គការក្រៅរដ្ឋាភិបាល របបសឹកភូមាបន្តបង្ក្រាបយ៉ាងហិង្សាសំឡេងប្រឆាំង ដោយទំនងបានសម្លាប់ជីវិតជនស៊ីវិលអស់ជាង២ពាន់នាក់ និងចាប់ខ្លួនជាង១៥០០០នាក់ គិតចាប់ពីថ្ងៃធ្វើរដ្ឋប្រហារទម្លាក់រដ្ឋាភិបាលស៊ីវិលដឹកនាំដោយលោកស្រីអ៊ុងសានស៊ូជី កាលពីថ្ងៃទី ១កុម្ភៈ២០២១មក។ មិនតែប៉ុណ្ណោះ ដើម្បីមានអំណាចពេញដៃ នៅថ្ងៃទី១សីហានេះ ប្រមុខដឹកនាំយោធាភូមា លោក មីន អ៊ុងឡាំង បានប្រកាសបន្តដាក់ប្រទេសក្នុងភាពអាសន្ន៦ខែទៀត ហើយអះអាងថាត្រូវមានសិ្ថរភាពនិងសន្តិភាពជាមុនសិន ទើបអាចរៀបចំការបោះឆ្នោតដែលនឹងប្រើប្រព័ន្ធសមមាត្រ មិនមែនប្រព័ន្ធឯកត្តនាមដូចមុនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ