តើឃាតករដែលនេប៉ាល់បញ្ជូនមកឱ្យបារាំងវិញជានរណា ?
ឆាល សុផាច ឃាតករដែលបានសម្លាប់មនុស្សអស់យ៉ាងហោច២០នាក់ នៅអាស៊ី ក្នុងអំឡុងទសវត្សរ៍ឆ្នាំ១៩៧០ ទើបត្រូវបានតុលាការនេប៉ាល់ សម្រេចដោះលែង ពីពន្ធនាគារ ហើយបណ្តេញទៅប្រទេសបារាំងភ្លាម នៅថ្ងៃសុក្រទី ២៣ធ្នូ២០២២។ ឃាតករសុផាច ត្រូវមកដល់ក្រុងប៉ារីស នៅព្រឹកថ្ងៃសៅរ៍ទី២៤ធ្នូ តាមជើងហោះហើររបស់ក្រុមហ៊ុនអាកាសចរណ៍កាតា។
ចុះផ្សាយនៅថ្ងៃ៖
ស្តាប់ - ០១:៥១
តុលាការកំពូលនេប៉ាល់ បានសម្រេចដោះលែងឃាតករសញ្ជាតិបារាំង ដោយសំអាងថាឆាល សុផាច មានជំងឺបេះដូង ត្រូវវះកាត់ និងដោយសំអាងលើច្បាប់អនុញ្ញាតឱ្យដោះលែងបើទណ្ឌិតនោះអនុវត្តទោសបានបីភាគបួនហើយ។
មានអាយុ៧៨ឆ្នាំ ម្តាយមានដើមកំណើតវៀតណាមឪពុកជាឥណ្ឌា សុផាច ជាឃាតករជាប់ពាក់ព័ន្ធការសម្លាប់មនុស្សចំនួនយ៉ាងហោច២០ករណី ដោយមានងារ ជាឃាតករប៊ីគីនី ក្រោយរកឃើញសពនារីជាតិអាមេរិកម្នាក់នៅប៉ាតាយ៉ាប្រទេសថៃកាលពីឆ្នាំ១៩៧៥ និងជាប់ងារជាឃាតករ “ពស់” ព្រោះតែជននេះមានសមត្ថភាពលាក់និងប្តូរអត្តសញ្ញាណដើម្បីគេចពីសំណាញ់តុលាការ។
ចាប់ផ្តើមសកម្មភាពនៅឆ្នាំ១៩៧០ ឃាតករនេះបានទៅដល់ក្រុងបាងកក ដោយតាំងខ្លួនជាអ្នកជួញត្បូង។ ដើម្បីទាក់ជនរងគ្រោះ គេសាងមិត្តភាពជាមួយទេសចរបរទេស (លោកខាងលិច)បែបផ្សងព្រេង រួចពង្វក់ពួកគេដោយគ្រឿងញៀន ហើយរំលោភ និងបញ្ចប់ដោយការសម្លាប់។
ចាប់ខ្លួនបាននៅឥណ្ឌា នៅឆ្នាំ១៩៧៦ និងជាប់ឃុំក្នុងពន្ធនាគារ អស់២១ឆ្នាំ សុផាចធ្លាប់បានរត់គេចពីកន្លែងឃុំឃាំងរួច ដោយបំពុលគ្រឿងញៀនដល់អ្នកយាម តែត្រូវប៉ូលិសឥណ្ឌាចាប់បានមកវិញ។ រួចទោសនៅឆ្នាំ១៩៩៧ សុផាច បានត្រលប់មកប៉ារីស មុននឹងលេចមុខជាថ្មីនៅឆ្នាំ២០០៣ នៅនេប៉ាល់ នៅសង្កាត់ទេសចរណ៍ក្រុងកដ្ឋមណ្ឌូ ហើយត្រូវនេប៉ាល់ចាប់ខ្លួននិងកាត់ទោសដាក់ពន្ធនាគារអស់មួយជីវិត ពីបទបានសម្លាប់ស្រ្តីទេសចរអាមេរិកម្នាក់ កាលពីឆ្នាំ១៩៧៥ និងទេសចរកាណាដាម្នាក់។
ប្រវត្តិ និងសកម្មភាពរបស់ឃាតករនេះ ត្រូវបានទូរទស្សន៍BBC និង Netflix ដកស្រង់មកផលិតជាកុនភាគ រឿង Le Serpent ដែលមានអ្នកចូលទស្សនាយ៉ាងច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ