ធ្លាក់យន្តហោះ ដឹកមនុស្ស៧២នាក់ នៅភាគកណ្តាលនេប៉ាល់
ហេតុការណ៍ធ្លាក់យន្តហោះមួយ បានកើតឡើងនៅថ្ងៃអាទិត្យទី ១៥មករា នៅភាគកណ្តាលប្រទេសនេប៉ាល់ ដែលស្ថិតនៅតាមជ្រលងជួរភ្នំហិមាល័យ។ យន្តហោះនេះ មានដឹកមនុស្សចំនួន ៧២នាក់ ដែលតាមការស្មាន គឺ ប្រហែលជាមិនមានអ្នករួចរស់ជីវិតទេ។ យោងតាមមន្ត្រីតំបន់ យន្តហោះដែលបានជួបហេតុការណ៍ធ្លាក់ ជាប្រភេទយន្តហោះ ATR 72 របស់ក្រុមហ៊ុនអាកាសចរណ៍នេប៉ាល់ Yeti Airlines ដឹកអ្នកដំណើរចំនួន៦៨នាក់ និងក្រុមបុគ្គលិកបម្រើការលើយន្តហោះ ចំនួន៤នាក់។
ចុះផ្សាយនៅថ្ងៃ៖
យន្តហោះបានចេញដំណើរពីព្រលានយន្តហោះអន្តរជាតិ រដ្ឋធានីកាតម៉ាន់ដូ ឆ្ពោះទៅកាន់ព្រលានយន្តហោះ Pokhara ភាគកណ្តាលប្រទេស មុននឹងធ្លាក់ក្នុងជ្រលងភ្នំ មិនឆ្ងាយប៉ុន្មានពីគោលដៅ។ យោងតាមរូបភាពបង្ហោះផ្សាយតាមបណ្តាញសង្គម គេឃើញមនុស្សម្នាជាច្រើននាក់ ឈរចោមរោមពីលើទីទួល សំឡឹងទៅមើលយន្តហោះដែលកំពុងឆាបឆេះ ផ្សែងខ្មៅខ្មួលខ្មាញ់។ ក្រុមសង្គ្រោះ ព្យាយាមពន្លត់ភ្លើង និងស្វែងរកអ្នករស់រានមានជីវិត បើទោះបីជាគ្មានសង្ឃឹមក្តី។ រដ្ឋាភិបាលនេប៉ាល់ បានបើកការស៊ើបអង្កេត ស្វែងរកមូលហេតុ បណ្តាលឲ្យធ្លាក់យន្តហោះនេះ ដែលលទ្ធផលស៊ើបអង្កេតនិងបង្ហាញឲ្យដឹង ក្នុងរវាង៤៥ថ្ងៃទៀត។
គួរបញ្ជាក់ថា នេប៉ាល់ គឺជាប្រទេសដែលស្ថិតនៅលើជ្រលងភ្នំហិមាល័យ ពុំមានផ្លូវថ្នល់ខ្វាត់ខ្វែងឡើយ។ ប៉ុន្មានឆ្នាំចុងក្រោយនេះ វិស័យអាកាសចរណ៍នេប៉ាល់ បានរីកដុះដាលជាខ្លាំង តាមរយៈការដឹកជញ្ជូនទំនិញសម្ភារៈ និងជាពិសេសអ្នកដំណើរ អ្នកទេសចរណ៍ជាតិនិងអន្តរជាតិ ដែលនិយមធ្វើដំណើរទៅឡើងភ្នំហិម៉ាល័យ។
ក៏ប៉ុន្តែ វិស័យអាកាសចរណ៍ នេប៉ាល់ មានការខ្វះខាត់ខ្លាំងសម្បើមណាស់ ខាងផ្នែកសុវត្ថិភាព។ អ្នកបើកបរយន្តហោះ ពុំមានការហ្វឹកហាត់ជំនាញត្រឹមត្រូវ ហើយការជួសជុលថែទាំយន្តហោះទៀតសោត ក៏ពុំគ្រប់គ្រាន់។ ជាងនេះទៀត សណ្ឋានដីព្រលានយន្តហោះនេប៉ាល់ ដែលភាគច្រើនស្ថិតនៅតាមជំរាលចង្កេះភ្នំ គឺជាលក្ខខណ្ឌចុះចតយ៉ាងលំបាកបំផុត ទោះជាសម្រាប់អ្នកបើកយន្តហោះ មានបទពិសោធន៍រាប់សិបឆ្នាំក៏ដោយ។ បញ្ហាអាកាសធាតុតំបន់ភ្នំខ្ពស់ ដែលប្រែប្រួលយ៉ាងឆាប់រហ័ស ក៏ជាកត្តាមួយបង្កការលំបាកដែរ ដល់ការហោះហើររបស់យន្តហោះ។
ករណីធ្លាក់យន្តហោះ ធ្លាប់បានកើតមានជារឿយៗ នៅនេប៉ាល់។ ឆ្នាំ១៩៩២ មានករណីធ្លាក់យន្តហោះដល់ ទៅ ២លើក។ លើកទីមួយជាយន្តហោះ Thai Airways ធ្លាក់ក្បែរក្រុងកាតម៉ាន់ឌូ ស្លាប់មនុស្ស១១៣នាក់។ លើកទី២យន្តហោះ Pakistan International Airlines ធ្លាក់នៅក្បែរទីតាំងដដែល ស្លាប់មនុស្ស១៦៧នាក់។ ឆ្នាំ២០១៨ យន្តហោះ US-Bangla Airlines ធ្លាក់នៅក្បែរព្រលានយន្តហោះកាតម៉ាន់ឌូដដែល ស្លាប់៥១នាក់។ ហើយកាលពី ខែឧសភា ឆ្នាំ២០២២កន្លងទៅ យន្តហោះប្រភេទ Twin Otter របស់ក្រុមហ៊ុន Tara Air បានធ្លាក់នៅជ្រលងភ្នំ កំពស់ ៤៤០០ម៉ែត្រ ស្លាប់មនុស្ស២២នាក់។ ក្រោយករណីធ្លាក់ចុងក្រោយនេះ អាជ្ញាធរនេប៉ាល់ បានចេញបញ្ជាហាមឃាត់ការហោះហើរទាំងអស់ ក្នុងករណីដែលគ្មានការធានា ថាអាកាសធាតុនឹងអំណោយផលល្អ នៅក្នុងរយៈពេលធ្វើដំណើរទាំងស្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ