នេប៉ាល់ គ្មានសង្ឃឹមរកឃើញអ្នករួចពីស្លាប់ ក្នុងគ្រោះធ្លាក់យន្តហោះ
ជាគ្រោះថ្នាក់ធ្លាក់យន្តហោះដ៏ធ្ងន់ធ្ងរបំផុត មិនធ្លាប់មានទេគិតចាប់តាំងពីឆ្នាំ១៩៩២មក។ អាជ្ញាធរនេប៉ាល់បានចេញក្រិត្យ កាន់ទុក្ខជាតិមួយថ្ងៃ នៅថ្ងៃចន្ទទី ១៦មករានេះ។ ក្រុមអ្នកសង្គ្រោះ គ្មានសង្ឃឹមថានឹងអាចរកឃើញអ្នកបានរួចជីវិតពីគ្រោះថ្នាក់នេះទេ។
ចុះផ្សាយនៅថ្ងៃ៖
មានផ្ទុកមនុស្សចំនួន ៧២នាក់ យន្តហោះATR72 របស់ក្រុមហ៊ុន Yeti Airlines បានក្នុងជ្រលងតូចមួយជម្រៅប្រមាណ៣០០ម៉ែត្រ បន្ទាប់ពីហោះចេញពីអាកាសយានដ្ឋានអន្តរជាតិក្រុងកដ្ឋមណ្ឌូ បានបន្តិច កាលពីថ្ងៃអាទិត្យទី១៥មករា២០២៣។
ជាមួយនឹងការប្រកាសកាន់ទុក្ខជាតិ នៅថ្ងៃចន្ទនេះ អាជ្ញាធរនេប៉ាល់ បានបន្តស្វែងរកជនរងគ្រោះទៀតដែលបាត់ខ្លួនចំនួន៤នាក់ប៉ុន្តែគេគ្មានសង្ឃឹមថានឹងអាចរកឃើញអ្នកនៅមានជីវិតទេ។ ជាសរុប ក្រុមសង្គ្រោះបានរកឃើញសាកសពចំនួន ៦៨ និងកំពុងវិភាគ អត្តសញ្ញាណ។ សូមបញ្ជាក់ថាក្នុងចំណោមអ្នកដំណើរទាំង៦៨នាក់ មាន១៥នាក់ជាជនបរទេស (ឥណ្ឌា៥នាក់ រុស្ស៊ី៥នាក់ កូរ៉េខាងត្បូង២នាក់ និងបួននាក់ទៀតជាអាហ្សង់ទីន អូស្ត្រាលី បារាំង និងអៀរឡង់)។
ពុំទាន់មានសេចក្តីប្រកាសអំពីមូលហេតុនាំឱ្យយន្តហោះធ្លាក់ទេ ប៉ុន្តែបើតាមអ្នកជំនាញក្នុងវិស័យអាកាសចរណ៍ និងតាមរយៈការវិភាគរូបថតវីដេអូ យន្តហោះទំនងជាបាក់ស្លាបម្ខាង មិនអាចទ្រទម្ងន់យន្តហោះឱ្យហោះឡើងបានទើបត្រូវធ្លាក់។ ក្នុងវីដេអូ គេឃើញម៉ាស៊ីនខាងឆ្វេង សម្រាប់តែញ័រខ្លាំងហើយឮស្នូរផ្ទុះ នៅពេលហោះមកកៀកអាកាសយានដ្ឋានប៉ូខារ៉ា។
ថ្វីបើយន្តហោះធ្លាក់បែកខ្ទេចខ្ទី រាយប៉ាយពេញដី តែប្រអប់ខ្មៅទាំងពីររបស់យន្តហោះ (មួយសម្រាប់ថតសំឡេងក្នុងបន្ទប់អ្នកបើកបរ និងមួយទៀត ថតទិន្នន័យនៃការហោះហើរ)ដែលទើបរកឃើញ នៅល្អទាំងពីរ។ ប្រអប់នេះ អាចផ្តល់ព័ត៌មានបានច្រើនជាជំនួយក្នុងរកស្វែងរកមូលហេតុនៃការធ្លាក់។
នេះជាគ្រោះថ្នាក់ធ្លាក់យន្តហោះដែលមានមនុស្សស្លាប់ច្រើនជាងគេបំផុត ក្នុងអំឡុងពេល៣០ឆ្នាំចុងក្រោយមកនេះ។ តាំងពីឆ្នាំ២០០០មក មានមនុស្សប្រមាណ ៣០០នាក់ បានបាត់បង់ជីវិតក្នុងគ្រោះថ្នាក់ធ្លាក់យន្តហោះឬឧទ្ធម្ភាគចក្រ។ អាកាសធាតុតំបន់ភ្នំដែលប្រែប្រួលយ៉ាងរហ័សជាផ្នែកមួយនាំការហោះហើរងាយជួយគ្រោះថ្នាក់។ តែចរាចរណ៍ផ្លូវអាកាសជាមធ្យោបាយដ៏ចាំបាច់សម្រាប់ឧបត្ថម្ភតំបន់ដាច់ស្រយាលរបស់ប្រទេស និងសម្រាប់ក្រុមអ្នកនិយមការដើរកំសាន្តលើភ្នំ និងឡើងភ្នំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ